यहेजकेल 28

सोर के राजा कै बिरुध्द न्याय

1 यहोवा का यो वचन मेरै धोरै पोहच्या 2 "हे माणस की सन्तान, सोर के प्रधान तै कह, परमेसवर यहोवा न्यू कहवै सै के तन्‍नै मन म्ह फूलकै न्यू कह्या सै, ‘मै ईश्वर सूं, मै समुन्दर कै बिचाळै परमेसवर के आसन पै बैठ्या सूं,’ पर, फेर भी तू अपणे-आपनै परमेसवर जिसा दिखावै सै, तोभी तू ईश्वर न्ही, माणस ए सै। 3 तू दानिय्येल तै घणा बुद्धिमान तो सै; कोए भेद तेरे तै छिप्या न्ही होवैगा; 4 तन्‍नै अपणी बुद्धि अर समझ के जरिये धन प्राप्त करया, अर अपणे भण्डारां म्ह सोन्‍ना-चाँदी राख्या सै; 5 तन्‍नै बड़ी बुद्धि तै लेण-देण करया जिसतै तेरा धन बढ़या, अर धन कै कारण तेरा मन फूल उठ्या सै। 6 इस कारण परमेसवर यहोवा न्यू कहवै सै, तू जो अपणा मन परमेसवर जिसा दिखावै सै, 7 इस करकै देख, मै तेरे पै इसे परदेशियाँ तै चढ़ाई कराऊँगा, जो सारी जात्तां तै घणे जुल्मी सैं; वे अपणी तलवारां नै तेरी बुद्धि की शोभा पै चलावैंगे अर तेरी चमक-दमक नै बिगाड़ैंगे। 8 वे तेरे ताहीं कब्र म्ह उतारैंगे, अर तू समुन्दर कै बीच के मारे होया की तरियां मर जावैगा। 9 फेर, के तू अपणे घात करण आळे कै स्याम्ही कहन्दा रहवैगा, ‘मै परमेसवर सूं?’ तू अपणे घायल करण आळे के हाथ म्ह ईश्वर न्ही, माणस ए ठहरैगा। 10 तू परदेशियाँ के हाथ तै खतनाहीन माणसां की तरियां मारया जावैगा; क्यूँके मन्‍नै ए इसा कह्या सै, परमेसवर यहोवा की याए वाणी सै।"

सोर के राजा का पतन

11 फेर यहोवा का यो वचन मेरे धोरै पोहच्या 12 "हे माणस की सन्तान, सोर के राजा कै बारै म्ह विलाप का गीत बणाकै उसतै कह, परमेसवर यहोवा न्यू कहवै सै: तू तो बढ़िया तै भी बढ़िया सै; तू बुद्धि तै भरपूर अर सबतै सुन्दर सै। 13 तू परमेसवर की अदन नाम के बाग म्ह था; तेरे धोरै गहणे, माणिक्य, पुखराज, हीरा, फीरोजा, सुलैमानी मणि, यशब, नीलमणि, मरकत, अर लाल सारी तरियां की मणि*28:13 सारी तरियां की मणि उरै जितनी भी मणियाँ का नाम सै, सारे प्रधान पुरोहित के कपड़े म्ह लाग्गे होए थे। अर सोन्‍ने के पिहरावे थे; तेरे डफ अर बाँसुरी सिर्फ तेरे म्ह ए बणाई गई थी; जिस दिन तू सिरज्या गया था; उस दिन वे भी त्यार करी गई थी। 14 तू हिफाजत करण आळा अभिषिक्त करूब था, मन्‍नै तेरे ताहीं इसा ठहराया के तू परमेसवर के पवित्र पर्वत पै रहवै था; तू आग की तरियां चमकण आळी मणियाँ*28:14 आग की तरियां चमकण आळी मणियाँ उज्जवल अर चमकदा। उज्जवल गहणे तै सजाए गए, राजकुमार खूबसूरत महिमा म्ह गहण्यां कै बीच चल्या। कै बिचाळै चाल्‍लै-फिरै था। 15 जिस दिन तै तू सिरज्या गया, अर जिस दिन तक तेरे म्ह बुराई ना पाई गई, उस बखत ताहीं तू अपणी सारी चाल चलण म्ह निर्दोष रह्या। 16 पर लेण-देण की बहुतायत कै कारण तू हुड़दंग तै भरकै पापी होग्या; इस करकै मन्‍नै तेरे ताहीं अपवित्र जाणकै परमेसवर के पहाड़ पै तै उतारया, अर हे हिफाजत करण आळे करूब मन्‍नै तेरे ताहीं आग की तरियां चमकण आळी मणियाँ कै बीच तै नाश करया सै। 17 सुन्दरता कै कारण तेरा मन फूल उठ्या था; अर वैभव कै कारण तेरी बुद्धि बिगड़गी थी। मन्‍नै तेरे ताहीं धरती पै पटक दिया; अर राजयां कै स्याम्ही तेरे ताहीं राख्या के वे तेरे ताहीं देक्खैं। 18 तेरे अधर्म कै काम की बहुतायत तै अर तेरे लेण-देण की बुराई तै तेरे पवित्रस्‍थान अपवित्र होगे; इस करकै मन्‍नै तेरे म्ह तै इसी आग पैदा करी जिसतै तू भस्म होया, अर मन्‍नै तेरे ताहीं सारे देखण आळयां कै स्याम्ही धरती पै तै भस्म कर गेरया सै। 19 देश-देश कै माणसां म्ह तै जितने तेरे ताहीं जाणै सैं सारे तेरे कारण अचम्भित होए; तू डर का कारण होया सै अर फेर कदे पाया न्ही जावैगा।"

सीदोन कै बिरुध्द न्याय

20 यहोवा का यो वचन मेरै धोरै पोहच्या 21 "हे माणस की सन्तान, अपणा मुँह सीदोन की ओड़ करकै उसके खिलाफ भविष्यवाणी कर, 22 अर कह, प्रभु यहोवा न्यू कहवै सै: हे सीदोन, मै तेरै खिलाफ सूं; मै तेरे बीच अपणी महिमा कराऊँगा। जिब मै उसके बिचाळै सजा देऊँगा अर उस म्ह अपणे ताहीं पवित्र ठहराऊँगा, फेर माणस जाण लेवैंगे के मै यहोवा सूं। 23 मै उस म्ह मरी फैलाऊँगा, अर उसकी सड़कां म्ह लहू बहाऊँगा; अर उसके च्यांरु ओड़ तलवार चाल्‍लैगी; फेर उसके बीच घायल माणस गिरैंगे, अर वे जाण लेवैंगे के मै यहोवा सूं।"

इस्राएल नै आशीष मिलैगी

24 "इस्राएल के घरान्‍ने कै च्यांरु ओड़ की जितनी जात उनके गैल घमण्ड का बरताव करै सैं, उन म्ह तै कोए उनका चुभण आळा काँटा या बेधण आळी शूळ फेर न्ही ठहरैगी; फेर वे जाण लेवैंगी के मै परमेसवर यहोवा सूं।"

25 "परमेसवर यहोवा न्यू कहवै सै, जिब मै इस्राएल के घरान्‍ने नै उन सारे माणसां म्ह तै कठ्ठा करुँगा, जिनके बिचाळै वे तित्तर-बितर होए सैं, अर देश-देश कै माणसां कै स्याम्ही उनके जरिये पवित्र ठहरूँगा, फेर वे उस देश म्ह वास करैंगे जो मन्‍नै अपणे दास याकूब तै दिया था। 26 वे उस म्ह निडर बसे रहवैंगे; वे घर बणाकै अर दाख की बारियाँ लगाकै निडर रहैवैंगे; फेर मै उनके च्यांरु ओड़ के सारे माणसां नै सजा देऊँगा जो उनतै घमण्ड का बरताव करैं सैं, फेर वे जाण लेवैंगे के उनका परमेसवर यहोवा ए सै।"