1 फेर परमेसवर नै मेरे कान्‍नां म्ह ऊँच्‍चे शब्द तै पुकारकै कह्या, "नगर के अधिकारियां नै अपणे-अपणे हाथ म्ह नाश करण का हथियार लिए होए धोरै ल्याओ।" 2 इसपै छः माणस, उत्तर की ओड़ ऊपरी फाटक के राह तै अपणे-अपणे हाथ म्ह घात करण के हथियार लिए होए आए; अर उनके बिचाळै सण का कपड़े पहरे, कमर म्ह लिखण की दवात बाँधे होए एक और माणस था; अर वे सारे भवन कै भित्तर जाकै पीतळ की वेदी कै धोरै खड़े होए।

3 फेर इस्राएल के परमेसवर का तेज करूबां पै तै, जिनके उप्पर वो रह्या करै था, भवन की डेवढ़ी पै उठ आया था; अर उसनै उस सण के कपड़े पैहरे होए माणस ताहीं जो कमर म्ह दवात बाँधे होए था, पुकारया। 4 अर यहोवा नै उसतै कह्या, "इस यरुशलेम नगर कै भित्तर इधर-उधर जाकै जितने माणस उन सारे घृणित काम्मां कै कारण जो उस म्ह करे जावैं सैं, साँस भरदे अर दुःख के मारे चिल्‍लावै सैं, उनके माथ्यां पै निशान्‍नी लगा दे।" 5 फेर उसनै मेरे सुणदे होए दुसरयां तै कह्या, "नगर म्ह उनकै पाच्छै-पाच्छै चालकै मारदे जाओ; किसे पै दया न्ही करणा अर ना कोमलता तै काम करणा। 6 बूढ़े, जवान, कुँवारी, बाल-बच्‍चे, जनान्‍नी, सारया नै मारकै नाश करो*, पर जिस किसे माणस के माथे पै वो निशान्‍नी हो, उसके धोरै न्ही जाणा। अर मेरे पवित्रस्‍थान तै ए शरुआत करो।" अर उननै उन बुजुर्गां तै शरुआत करी जो भवन कै स्याम्ही थे। 7 फेर परमेसवर नै उन छः जल्‍लादां तै कह्या, "भवन नै अशुद्ध करो, अर आँगणां नै लाशां तै भर द्यो। चाल्‍लो, बाहर लिकड़ो।" फेर वे लिकड़कै नगर म्ह मारण लाग्गे। 8 जिब वे मार रहे थे, अर मै एक्ला रहग्या*, फेर मै मुँह के बळ गिरया अर चिल्‍लाकै कह्या, "हाय प्रभु यहोवा! के तू अपणी जळजळाहट यरुशलेम नगर पै भड़काकै इस्राएल के सारे बचे होयां नै भी नाश करैगा?"

9 फेर परमेसवर नै मेरे ताहीं कह्या, "इस्राएल अर यहूदा के घरान्यां का अधर्म भोत-ए घणा सै, उरै ताहीं के देश हत्या तै अर नगर अन्याय तै भरग्या सै; क्यूँके वे कहवैं सै, ‘यहोवा नै धरती ताहीं छोड़ दिया अर यहोवा कुछ न्ही देखदा।’ 10 इस करकै उनपै दया न्ही होवैगी, ना मै कोमलता करुँगा, बलके उनकी चाल उन्हे के सिर पै लौटा दियुँगा।"

11 फेर मन्‍नै के देख्या, के जो माणस सण का कपड़े पहरे होए अर कमर म्ह दवात बाँधे था, उसनै यहोवा परमेसवर तै न्यू कहकै खबर दी, "जिस तरियां तन्‍नै हुकम दिया, मन्‍नै उस तरियां ए करया सै।"