यहेजकेल 32

फिरौन अर मिस्र कै खात्तर विलाप

1 बारहवें साल के बारहवें महिन्‍ने के पैहले दिन नै यहोवा का यो वचन मेरै धोरै पोहच्या 2 "हे माणस की सन्तान, मिस्र के राजा फिरौन कै बारै म्ह विलाप का गीत बणाकै उस ताहीं सुणा जात्ति-जात्ति म्ह तेरी तुलना जवान शेर तै करी गई थी, पर तू समुन्दर के दानव की तरियां सै; तू अपणी नदियाँ म्ह टूट पड्या, अर उनके पाणी ताहीं पैरां तै मथकै कै गंदळा दिया। 3 परमेसवर यहोवा न्यू कहवै सै: मै भोत सी जात्तां की सभा के जरिये तेरे पै अपणा जाल फैलाऊँगा, अर वे तेरे ताहीं मेरे महाजाळ म्ह खींच लेवैंगे। 4 फेर मै तेरे ताहीं धरती पै छोड़ूँगा, अर मैदान म्ह फेंक कै अकास के सारे पक्षियां नै तेरे पै बिठाऊँगा; अर तेरे माँस तै सारी धरती के जीवजन्तुआं नै छिकाऊँगा। 5 मै तेरे माँस नै पहाड़ां पै धरुँगा, अर तराइयां नै तेरी ऊँचाई तै भर दियुँगा। 6 जिस देश म्ह तू तिरै सै, उसनै पहाड़ां ताहीं मै तेरे लहू तै सींचूँगा; अर उसके नाळे तेरे तै भर जावैंगे। 7 जिस बखत मै तेरे ताहीं मिटाण लागूँ, उस बखत मै अकास नै ढाँप्पूँगा अर तारयां नै धुँधळा कर दियुँगा; मै सूरज नै बादळ तै छिपाऊँगा, अर चाँद अपणी रोशनी ना देवैगा। 8 अकास म्ह जितनी प्रकाशमान ज्योतियाँ सैं, उन सारया ताहीं मै तेरे कारण धुँधळा कर दियुँगा, अर तेरे देश म्ह अन्धकार कर देऊँगा, परमेसवर यहोवा की याए वाणी सै।"

9 "जिब मै तेरे विनाश की खबर*32:9 जिब मै तेरे विनाश की खबर जिस घटना का उरै उल्‍लेख करया गया सै वे प्रभु के दिन या न्याय के दिन तै सुसंगत सैं। फिरौन के पतन का मतलब सै परमेसवर की प्रभुता कै सामणै विश्व-शक्ति का पतन जात्ति-जात्ति म्ह अर तेरे अनजाण देशां म्ह फैलाऊँगा, फेर बड़े-बड़े देशां के माणसां के मन म्ह रिस उपजाऊँगा। 10 मै भोत सी जात्तां नै तेरे कारण अचम्भित कर दियुँगा, अर जिब मै उनके राजयां कै स्याम्ही अपणी तलवार भेज्जूँगा, फेर तेरे कारण उनके रुगं खड़े हो जावैंगे, अर तेरे गिरण के दिन वे अपणी-अपणी जान कै खात्तर काँम्बदे रहवैंगे। 11 क्यूँके परमेसवर यहोवा न्यू कहवै सै: बाबेल के राजा की तलवार तेरे पै चाल्‍लैगी। 12 मै तेरी भीड़ नै इसे शूरवीरां की तलवारां के जरिये गिराऊँगा जो सारी जात्तां म्ह भयानक सैं।"

"वे मिस्र के घमण्ड नै तोड़ैंगे, अर उसकी सारी भीड़ का सत्यानाश होवैगा। 13 मै उसके सारे पशुआं नै उसके घणखरे चोयां कै किनारे पै तै नाश करुँगा; अर भविष्य म्ह वे ना तो माणस के पैरां तै अर ना पशुआं के खुरां तै गंदळे करे जावैंगे। 14 फेर मै उनका पाणी निर्मल कर दियुँगा, अर उनकी नदियाँ तेल की तरियां बहवैंगी, परमेसवर यहोवा की याए वाणी सै। 15 जिब मै मिस्र देश नै उजाड़ दियुँगा अर जिसतै वो भरपूर सै, उस ताहीं छूछा कर देऊँगा, अर जिब मै उसके सारे रहण आळयां नै मारूँगा, फेर वे जाण लेवैंगे के मै यहोवा सूं।"

16 "माणसां के विलाप करण कै खात्तर विलाप का गीत योए सै; जात-जात की जनान्‍नी इसनै गावैंगी; मिस्र अर उसकी सारी भीड़ कै बारै म्ह वो योए विलापगीत गावैंगी, परमेसवर यहोवा की याए वाणी सै।"

मरे होया का संसार

17 फेर बारहवें साल के पैहले महिन्‍ने के पन्द्रहवें दिन नै यहोवा का यो वचन मेरै धोरै पोहच्या 18 "हे माणस की सन्तान, मिस्र की भीड़ कै खात्तर हाय-हाय कर, अर उस ताहीं प्रतापी जात्तां की बेटियाँ समेत कब्र म्ह गड़े होया कै धोरै अधोलोक म्ह उतार। 19 तू किसतै मनोहर सै? तू उतरकै खतनाहीनां कै गैल पड़या रह।"

20 "वे तलवार तै मरे होया कै बिचाळै गिरैंगे, उनके खात्तर तलवार ए ठहराई गई सै*32:20 तलवार ए ठहराई गई सै यानिके तलवार खींच ली गई सै जिस किसे ताहीं मृत्युदण्ड कै खात्तर खींच्या जावै सै।; इस करकै मिस्र नै उसकी सारी भीड़ समेत घसीट ले जाओ। 21 ताकतवर शूरवीर उसतै अर उसके साथ देणीये तै अधोलोक म्ह बात करैंगे; वे खतनाहीन माणस ओड़ै तलवार तै मरे पड़े सैं।"

22 "अपणी सारी सभा समेत अश्शूर भी ओड़ै सै, उसकी कब्र उसके च्यांरु ओड़ सैं; सारे के सारे तलवार तै मारे गये सैं। 23 उनकी कब्र खड्डे के कुण्यां म्ह बणी होई सैं, अर उसकी कब्र के च्यांरु ओड़ उसकी सभा सै; वे सारे के सारे जो जीवन लोक म्ह डर उपजावै थे, इब तलवार तै मरे पड़े सैं।"

24 "ओड़ै एलाम सै, अर उसकी कब्र की च्यांरु ओड़ उसकी सारी भीड़ सै; वे सारे के सारे तलवार तै मारे गये सैं, वे खतनारहित अधोलोक म्ह उतरगे सैं; वे जीवन लोक म्ह डर उपजावै थे, पर इब कब्र म्ह और गड़े होया कै गैल उनके मुँह पै भी उदासी छाई होई सै। 25 उसकी सारी भीड़ समेत उसनै भी मारे होया के बीच सेज मिली, उसकी कब्र उसे के च्यांरु ओड़ सैं, वे सारे के सारे खतनारहित तलवार तै मारे गये; उननै जीवन लोक म्ह डर उपजाया था, पर इब कब्र म्ह और गड़े होया कै गैल उनके मुँह पै उदासी छाई होई सै; अर वे मरे होया कै बिचाळै धरे गये सैं।"

26 "ओड़ै सारी भीड़ समेत मेशेक अर तूबल सैं, उनके च्यांरु ओड़ कब्र सैं; वे सारे के सारे खतनारहित तलवार तै मारे गये, क्यूँके जीवन लोक म्ह वे डर उपजावै थे। 27 उन गिरे होए खतनारहित शूरवीरां कै गैल वे पड़े न्ही रहवैंगे जो अपणे-अपणे युद्ध के हथियार खात्तर होए अधोलोक म्ह उतरगे सैं, ओड़ै उनकी तलवार उनके सिर कै नीच्‍चै धरी सैं, अर उनके अधर्म के काम उनकी हड्डियाँ म्ह पूरा सैं; क्यूँके जीवन लोक म्ह उनतै शूरवीरां नै भी भय उपजै था। 28 इस करकै तू भी खतनाहीनां कै गैल अंग-भंग होकै तलवार तै मरे होया कै गैल पड़या रहवैगा।"

29 "ओड़ै एदोम अर उसके राजा अर उसके सारे प्रधान सैं, जो पराक्रमी होण पै भी तलवार तै मरे होया कै गैल धरे सैं; खड्डे म्ह गड़े होए खतनारहित माणसां कै गैल वे भी पड़े रहवैंगे।"

30 "ओड़ै उत्तर दिशा के सारे प्रधान अर सारे सीदोनी भी सैं जो मरे होया कै गैल उतरगे; उननै अपणे पराक्रम तै भय उपजाया था, पर इब वे शर्मिन्दा होए अर तलवार तै अर मरे होया कै गैल वे भी खतनारहित पड़े होए सैं, अर कब्र म्ह दुसरे गड़े होया कै गैल उनके मुँह पै भी उदासी छाई होई सै।"

31 "इसनै देखकै फिरौन भी अपणी सारी भीड़ कै बारै म्ह शान्ति पावैगा*32:31 शान्ति पावैगा यो जाणकै के उसका विनाश दुसरी किसी भी विश्व-शक्ति तै घणा न्ही सै, हाँ फिरौन अर उसकी सारी सेना जो तलवार तै मारी गई सै, परमेसवर यहोवा की याए वाणी सै। 32 क्यूँके मन्‍नै उसके कारण जीवन लोक म्ह डर उपजाया था; इस करकै वो सारी भीड़ समेत तलवार तै और मरे होया कै समेत खतनारहितां कै बिचाळै लिटाया जावैगा, परमेसवर यहोवा की याए वाणी सै।"