यहेजकेल 34

लापरवाह पाळी

1 यहोवा का यो वचन मेरै धोरै पोहच्या 2 "हे माणस की सन्तान, इस्राएल के पाळीयाँ कै बिरुध्द भविष्यवाणी करकै उन पाळीयाँ तै कह, परमेसवर यहोवा न्यू कहवै सै: हाय इस्राएल के पाळीयाँ पै जो अपणे-अपणे पेट भरै सैं! के पाळी नै भेड़-बकरियाँ का पेट न्ही भरणा चाहिए? 3 थम माणस चर्बी खावैं, ऊन पहरै अर मोट्टे-मोट्टे पशुआं नै काट्टो सो; पर भेड़-बकरियाँ नै थम न्ही चरान्दे। 4 थमनै कमजोरां ताहीं बलवान न्ही करया, ना रोगियाँ ताहीं चंगा करया, ना घायलां के घावां ताहीं बाँध्या, ना लिकाड़ी होई नै बोहड़ा ल्याए, ना खोई होई ताहीं ढूँढ्या, पर थमनै जोर अर जबरदस्ती तै हक चलाया सै। 5 वे पाळी के ना होण कै कारण तित्तर-बितर होई; अर सारी जंगळी-पशुआं का भोजन होगी। 6 मेरी भेड़-बकरियाँ तित्तर-बितर होई सै; वे सारी पहाड़ां अर ऊँचे-ऊँचे टील्यां पै भटकै थी; मेरी भेड़-बकरियाँ सारी धरती कै उप्पर तित्तर-बितर होई; अर ना तो कोए उनकी सुधि लेवै था, ना कोए उननै ढूँढै था।"

7 "इस कारण, हे पाळीयो, यहोवा का वचन सुणो: 8 परमेसवर यहोवा की या वाणी सै, मेरे जीवन की कसम, मेरी भेड़-बकरियाँ जो लुटगी, अर मेरी भेड़-बकरियाँ जो पाळी के ना होण कै कारण सारी जंगळी-पशुआं का भोजन होगी; अर इस करकै के मेरे पाळीयाँ नै मेरी भेड़-बकरियाँ का ख्याल न्ही करया, अर मेरी भेड़-बकरियाँ का पेट न्ही, अपणा ए अपणा पेट भरया; 9 इस कारण हे पाळीयो, यहोवा का वचन सुणो, 10 परमेसवर यहोवा न्यू कहवै सै: देक्खो, मै पाळीयाँ के बिरुध्द सूं; अर मै उनतै अपणी भेड़-बकरियाँ का लेक्खा ल्यूँगा, अर उन ताहीं फेर उननै चराण न्ही देऊँगा; वे फेर अपणा-अपणा पेट भरण न्ही पावैंगें। मै अपणी भेड़-बकरियाँ नै उनके मुँह तै छुड़ाऊँगा के आगै तै वे उनका खाणा ना हों।"

परमेसवर, सच्‍चा पाळी

11 "क्यूँके परमेसवर यहोवा न्यू कहवै सै, देक्खो, मै खुद ए अपणी भेड़-बकरियाँ का ख्याल राक्खूँगा*34:11 मै खुद ए अपणी भेड़-बकरियाँ का ख्याल राक्खूँगा यहोवा अपणे माणसां का पाळी सै। वो पाळी की सारी जिम्मेदारियांँ नै निभावैगा जो पाळी नै करणे थे पर करे न्ही। ये वादे अधूरे रूप म्ह उनके बाबेल तै बोहड़ आण म्ह पूरे होगे थे।, अर उननै ढूँढ़ूगा। 12 जिस तरियां पाळी अपणी भेड़-बकरियाँ म्ह तै भटकी होई नै बोहड़ा कै अपणे झुण्ड म्ह मिला लेवै सै, उस्से तरियां मै भी अपणी भेड़-बकरियाँ नै मिलाऊँगा; मै उननै उन सारी जगहां तै लिकाड़ ले आऊँगा, जड़ै-जड़ै वे बादळ अर घोर अन्धकार के दिन तित्तर-बितर होगी हों। 13 मै उननै देश-देश कै माणसां म्ह तै लिकाड़ूंगा, अर देश-देश तै कठ्ठा करुँगा, अर उन्हे की अपणी धरती म्ह ले आऊँगा; अर इस्राएल के पहाड़ां पै अर नाळयां म्ह अर उस देश के सारी बसी होई जगहां म्ह चराऊँगा। 14 मै उननै आच्छी चराई म्ह चराऊँगा, अर इस्राएल के ऊँचे-ऊँचे पहाड़ां पै उननै चराई मिलैगी; ओड़ै वे आच्छी हरियाली म्ह बैठ्या करैंगी, अर इस्राएल के पहाड़ां पै बढ़िया तै बढ़िया चराई चरैंगी। 15 मै खुद ए अपणी भेड़-बकरियाँ का पाळी होऊँगा, अर मै आप्पे उननै बिठाऊँगा, परमेसवर यहोवा की याए वाणी सै। 16 मै खोई होई नै ढूँढ़ूगा, अर लिकाड़ी होई नै बोहड़ा ल्याऊँगा, अर घायल के घाव नै बाँधूँगा, अर बीमार नै ठीक करुँगा, अर जो मोट्टी अर ताकतवर सैं उननै मै नाश करुँगा; मै उनकी चरवाही न्याय तै करुँगा।"

17 "हे मेरे झुण्ड, थारे तै परमेसवर यहोवा न्यू कहवै सै, देक्खो, मै सारी भेड्डां कै बीच अर मिंढयाँ अर बकरयां कै बीच न्याय करुँ सूं। 18 के थमनै या छोट्टी बात जाण पड़ै सै के थम आच्छी चराई चर ल्यो अर बाकी चराई नै अपणे पैरां तै रौंदो; अर के थमनै या छोट्टी बात जाण पड़ै सै के थम निर्मल पाणी पी ल्यो अर बाकी पाणी नै अपणे पैरां तै गंदळा करो? 19 के मेरी भेड़-बकरियाँ नै थारे पैरां तै रौंदे होए नै चरणा, अर थारे पैरां तै गंदळे करे होए नै पीणा पड़ैगा?"

20 "इस कारण परमेसवर यहोवा उनतै न्यू कहवै सै, देक्खो, मै आप मोट्टी अर दुबळी भेड़-बकरियाँ कै बीच न्याय करुँगा। 21 थम जो सारे बिमारां नै बाजू अर कंधे तै उरै ताहीं दकेलदे अर सींग तै उरै ताहीं मारो सो के वे तित्तर-बितर हो जावै सैं, 22 इस कारण मै अपणी भेड़-बकरियाँ नै छुड़ाऊँगा, अर वे फेर न्ही लुटैंगी, अर मै भेड़-भेड़ के अर बकरी-बकरी कै बीच न्याय करुँगा। 23 मै उनपै इसा एक पाळी ठहराऊँगा जो उनकी चरवाही करैगा, वो मेरा दास दाऊद होवैगा, ओड़ै उननै चरावैगा, अर ओड़ै उनका पाळी होवैगा। 24 मै, यहोवा, उनका परमेसवर ठहरूँगा, अर मेरा दास दाऊद उनके बीच प्रधान होवैगा; मन्‍नै यहोवा ए नै यो कह्या सै।"

25 "मै उनकै गैल शान्ति का करार करुँगा, अर दुष्ट जन्तुआं नै देश म्ह न्ही रहण देऊँगा; अंत म्ह वे बियाबान म्ह निडर रहैवैंगे, अर बण म्ह सोवैंगे। 26 मै उननै और अपणी पहाड़ी के लोवै-धोरै की जगहां नै आशीष का कारण बणा दियुँगा; अर मिह नै मै ठीक बखत म्ह बरसाया करुँगा; अर वे आशीष की बारिस होवैगी। 27 मैदान के दरखत फळैगें अर धरती अपणी उपज उपजावैगी, अर वे अपणे देश म्ह निडर रहैवैंगे; जिब मै उनके जूए नै तोड़कै उन माणसां के हाथ तै छुड़ाऊँगा, जो उनतै सेवा करावैं सैं, फेर वे जाण लेवैंगे के मै यहोवा सूं। 28 वे फेर जात्ति-जात्ति तै लूटे न्ही जावैंगे, अर ना जंगळी-पशु उननै पाड़ खावैंगे; वे निडर रहैवैंगे, अर उननै कोए न्ही डरावैगा। 29 मै उनकै खात्तर उपजाऊ बारी उपजाऊँगा, अर वे देश म्ह फेर भूखे न्ही मरैगें, अर ना जात्ति-जात्ति के माणस फेर उनकी निन्दा करैंगे। 30 अर वे जाणैंगे के मै परमेसवर यहोवा, उनके गैल सूं, अर वे जो इस्राएल का घरान्‍नां सै, वे मेरी प्रजा सैं, मेरी परमेसवर यहोवा की याए वाणी सैं। 31 थम तो मेरी भेड़-बकरियाँ, मेरी चराई की भेड़-बकरी हो, थम तो माणस सो, अर मै थारा परमेसवर सूं, परमेसवर यहोवा की याए वाणी सै।"