1 फेर यहोवा का यो वचन मेरै धोरै पोहच्या 2 "हे माणस की सन्तान, भविष्यवाणी करकै कह, परमेसवर यहोवा न्यू कहवै सै: हाय, हाय करो, हाय उस दिन पै! 3 क्यूँके वो दिन यानिके यहोवा का दिन धोरै सै; वो बादळां का दिन, अर जात्तां की सजा का बखत होवैगा। 4 मिस्र म्ह तलवार चाल्‍लैगी, अर जिब मिस्र म्ह माणस मारे जावैंगे, फेर कूश म्ह भी संकट पड़ैगा, माणस मिस्र नै लूट ले जावैंगे, अर उसकी नींवें उलट दी जावैंगी। 5 कूश, पूत, लूद अर सारे अरबी, अर कूबी माणस, और करार करे होए देश के बासिन्दे*, मिस्रियाँ कै गैल तलवार तै मारे जावैंगे।"

6 "यहोवा न्यू कहवै सै, मिस्र के सम्भाळण आळे भी गिर जावैंगे, अर अपणी जिस ताकत पै मिस्री फुल्‍लै सैं, वो टूट्टैगी; मिग्दोल तै लेकै सवेने ताहीं उसके बासिन्दे तलवार तै मारे जावैंगे, परमेसवर यहोवा की याए वाणी सै। 7 वे उजड़े होए देशां कै बीच उजड़े होए ठैहरैगें, अर उनके नगर खण्डहर करे होए नगरां म्ह गिणे जावैंगे। 8 जिब मै मिस्र म्ह आग लगाऊँगा। अर उसके सारे साथ देणीये भी नाश होवैंगे, फेर वे जाण लेवैंगे के मै यहोवा सूं।"

9 "उस बखत मेरे स्याम्ही तै दूत जहाजां पै चढ़कै निडर लिकड़ैंगे अर कूशियाँ नै डरावैंगे; अर उनपै इसा संकट पड़ैगा जिसा के मिस्र की सजा के बखत; क्यूँके देख, वो दिन आवै सै!"

10 "परमेसवर यहोवा न्यू कहवै सै: मै बाबेल के राजा नबूकदनेस्सर के हाथ तै मिस्र की भीड़भाड़ नै नाश करा दियुँगा। 11 वो अपणी बेट्टियाँ समेत, जो सारी जात्तां म्ह भयानक सै, उस देश कै नाश करण नै पोहचाया जावैगा; अर वे मिस्र कै खिलाफ तलवार खींचकै देश नै मरे होया तै भर देवैंगे। 12 मै नदियाँ नै सूखा दियुँगा, अर देश नै बुरे माणसां के हाथ कर देऊँगा; अर मै परदेशियाँ के जरिये देश नै, अर जो कुछ उस म्ह सै, उजाड़ करा दियुँगा; मन्‍नै यहोवा ए नै न्यू कह्या सै।"

13 "परमेसवर यहोवा न्यू कहवै सै, मै नोप म्ह तै मूरतां नै नाश करुँगा अर उस म्ह की मूरतां नै रहण न्ही देऊँगा; फेर कोए प्रधान मिस्र देश म्ह ना उठैगा; अर मै मिस्र देश म्ह भय उपजाऊँगा। 14 मै पत्रोस नै उजाड़ूँगा, अर सोअन म्ह आग लगाऊँगा, अर नो नगर नै सजा देऊँगा। 15 सीन जो मिस्र की मजबूत जगहां सै, उसपै मै अपणी जळजळाहट भड़काऊँगा, अर नो नगर की भीड़भाड़ का अन्त कर दियुँगा। 16 मै मिस्र म्ह आग लगाऊँगा; सीन घणा थरथरावैगा; अर नो नगर पाड़या जावैगा अर नोप के बिरोधी दिन दहाड़े उठैगें। 17 ओन अर पीवेसेत के जवान तलवार तै गिरैंगे, अर ये नगर गुलाम्मी म्ह चले जावैंगे। 18 जिब मै मिस्रियाँ के जूआ नै तहपन्हेस म्ह तोड़ूँगा*, फेर उस म्ह दिन नै अँधेरा होवैगा, अर उसकी ताकत जिसपै वो फूलै सै, वो नाश हो जावैगी; उसपै घटा छा जावैगी अर उसकी बेटियाँ गुलाम्मी म्ह चली जावैंगी। 19 इस तरियां मै मिस्रियाँ नै सजा देऊँगा। अर वे जाण लेवैंगे के मै यहोवा सूं।"

20 फेर ग्यारहवें साल के पैहले महिन्‍ने के सातवें दिन नै यहोवा का यो वचन मेरै धोरै पोहच्या 21 "हे माणस की सन्तान, मन्‍नै मिस्र के राजा फिरौन की बांह तोड़ दी सै; अर देख, ना तो वो जोड़ी गई, ना उसपै लेप लगाकै पट्टी चढ़ाई गई के वो बाँधण तै तलवार पकड़ण कै लायक बण सकै। 22 इस करकै प्रभु यहोवा न्यू कहवै सै, देख, मै मिस्र के राजा फिरौन कै खिलाफ सूं, अर उसकी ठीक अर टूटी दोन्‍नु बाजुआं नै तोड़ूँगा; अर तलवार नै उसके हाथ तै गिराऊँगा। 23 मै मिस्रियाँ नै जात्ति-जात्ति म्ह तित्तर-बितर करुँगा, अर देश-देश म्ह छितराऊँगा। 24 मै बाबेल की राजा की बांह नै ताकतवर करकै अपणी तलवार उसके हाथ म्ह देऊँगा; पर फिरौन की बांह नै तोड़ूँगा, अर वो उसकै स्याम्ही इसा कराहवैगा जिसा मरण आळा घायल कराहवै सै। 25 मै बाबेल के राजा की बांह नै सम्भाळूंगा, अर फिरौन की बांह ढील्‍ली पड़ैंगी, फेर वे जाणैंगे के मै यहोवा सूं। जिब मै बाबेल के राजा के हाथ म्ह अपणी तलवार देऊँगा, फेर वो उसनै मिस्र देश पै चलावैगा; 26 अर मै मिस्रियाँ नै जात-जात म्ह तित्तर-बितर करुँगा अर देश-देश म्ह छितरा दियुँगा। फेर वे जाण लेवैंगे के मै यहोवा सूं।"