1 यहोवा का यो वचन मेरै धोरै पोहच्या 2 "हे माणस की सन्तान, अपणा मुँह सेईर पहाड़ की ओड़ करकै उसके खिलाफ भविष्यवाणी कर, 3 अर उसतै कह, परमेसवर यहोवा न्यू कहवै सै: हे सेईर पहाड़, मै तेरै खिलाफ सूं; अर अपणा हाथ तेरै खिलाफ बढ़ाकै तेरे ताहीं उजाड़ ए उजाड़ कर दियुँगा। 4 मै तेरे नगरां नै खण्डहर कर देऊँगा, अर तू उजाड़ हो जावैगा; फेर तू जाण लेवैगा के मै यहोवा सूं। 5 क्यूँके तू इस्राएलियाँ तै युग-युग की दुश्मनांई राक्खै था, अर उनकी विपत्ति के बखत जिब उनके अधर्म की सजा का बखत पोहच्या*, फेर उन ताहीं तलवार तै मारे जाण ताहीं दे दिया। 6 इस करकै परमेसवर यहोवा की या वाणी सै, मेरे जीवन की कसम, मै तेरे ताहीं हत्या करे जाणकै खात्तर त्यार करुँगा अर खून तेरा पिच्छा करैगा; तू तो खून तै घिण ना करै था, इस कारण खून तेरा पिच्छा करैगा। 7 इस तरियां मै सेईर पहाड़ नै उजाड़ ए उजाड़ कर दियुँगा, अर जो उस म्ह आन्दा-जान्दा हो, मै उस ताहीं नाश करुँगा। 8 मै उसके पहाड़ां नै मारे होया तै भर दियुँगा; तेरे टील्यां, तराइयां अर सारे नाळयां म्ह तलवार तै मारे होए गिरैंगे! 9 मै तेरे ताहीं युग-युग कै खात्तर उजाड़ कर दियुँगा, अर तेरे नगर फेर न्ही बसैंगे। फेर थम जाणोगे के मै यहोवा सूं।"

10 "क्यूँके तन्‍नै कह्या सै, ‘ये दोन्‍नु जात* अर ये दोन्‍नु देश मेरे होवैंगे; अर हम ए उनके माल्‍लिक हो जावांगे,’ तोभी भी यहोवा ओड़ै था। 11 इस कारण, परमेसवर यहोवा की या वाणी सै, मेरे जीवन की कसम, तेरे छो कै मुताबिक, अर जो जळजळाहट तन्‍नै उनपै अपणे बैर कै कारण करी सै, उसे कै मुताबिक मै तेरे तै बरताव करुँगा, अर जिब मै तेरा न्याय करुँ, फेर थारे म्ह अपणे आप नै प्रगट करुँगा। 12 तू जाणैगा, के मन्‍नै यहोवा नै तेरी सारी बदनाम्मी की बात सुणी सैं, जो तन्‍नै इस्राएल के पहाड़ां कै बारै म्ह कही, ‘वे तो उजड़गे, वो म्हारे ताहीं ए दिए गए सैं के हम उननै खा जावां।’ 13 थमनै अपणे मुँह तै मेरे खिलाफ बड़ाई मारी, अर मेरे खिलाफ घणी बात कही सैं; इस करकै मन्‍नै सुण्या सै। 14 परमेसवर यहोवा न्यू कहवै सै: जिब धरती भर म्ह आनन्द होवैगा, फेर मै तेरे ताहीं उजाड़ दियुँगा 15 तू इस्राएल के घरान्‍ने के खास हिस्से के उजड़ण कै कारण आनन्दित होया, इस करकै मै भी तेरे तै उसाए करुँगा; हे सेईर पहाड़, हे एदोम के सारे देश, तू उजाड़ हो जावैगा। फेर वे जाण लेवैंगे के मै यहोवा सूं।"