यहेजकेल 37

सूक्खी हाड्डियाँ की तराई का दर्शन

1 यहोवा की शक्ति मेरै पै आई, अर वो मेरे म्ह अपणा आत्मा समवाकै बाहर लेग्या अर मेरे ताहीं तराई कै बिचाळै खड़या कर दिया; वो तराई हाड्डियाँ तै भरी होई थी। 2 फेर उसनै मेरे ताहीं उनके च्यांरु ओड़ घुमाया, अर तराई की तळी म्ह घणीए हाड्डियाँ थी; अर वे घणी सूक्खी थी। 3 फेर उसनै मेरे तै पूच्छया, "हे माणस की सन्तान, के यें हाड्डी जी सकै सैं?" मन्‍नै कह्या, "हे परमेसवर यहोवा, तू ए जाणै सै।" 4 फेर उसनै मेरे ताहीं कह्या, "इन हाड्डियाँ तै भविष्यवाणी*37:4 भविष्यवाणी वे हाड्डी घात होया की हाड्डियाँ थी। इसा हाल कसदियाँ कै आक्रमण के बखत होगा। करकै कह, ‘हे सूक्खी हाड्डियो, यहोवा का वचन सुणो। 5 परमेसवर यहोवा थम हाड्डियाँ तै न्यू कहवै सै: देक्खो, मै आप थारे म्ह साँस समवाऊँगा, अर थम जी उठोगी। 6 मै थारी नसां नै पैदा करकै माँस चढ़ाऊँगा, अर थमनै चमड़े तै ढकुगाँ; अर थारे म्ह साँस समवाऊँगा अर थम जी जाओगी; अर थम जाण ल्योगी के मै यहोवा सूं।’"

7 इस हुकम कै मुताबिक मै भविष्यवाणी करण लाग्या; अर मै भविष्यवाणी करण ए लाग रह्या था, के एक आहट आई, अर भूकम्प होया, अर वे हाड्डी कठ्ठी होकै हाड्डी तै हाड्डी जुड़गी। 8 मै देखदा रह्या, के उन म्ह नस पैदा होई अर माँस चढ़या, अर वे उप्पर चमड़े तै ढकगी; पर उन म्ह कुछ साँस ना था। 9 फेर उसनै मेरे ताहीं कह्या, "हे माणस की सन्तान साँस तै भविष्यवाणी कर, अर साँस तै भविष्यवाणी करकै कह, हे साँस, परमेसवर यहोवा न्यू कहवै सै के च्यांरु दिशा तै आकै इन घात करे होया म्ह समा जा*37:9 घात करे होया म्ह समा जा इस्राएल का अपणे स्वदेश म्ह पुनर्वास, आणआळे राजा कै खात्तर राह त्यार करैगा। वो दाऊद की औलाद होवैगा जो अपणे राज्य म्ह सच्‍चे इस्राएल नै कठ्ठा करैगा। के ये जी उठै।" 10 परमेसवर के इस हुकम कै मुताबिक मन्‍नै भविष्यवाणी करी, फेर उन म्ह साँस आ ग्या, अर वो जीकै अपणे-अपणे पैरां कै बळ खड़े होगे; अर एक घणी बड़ी सेना होगी।

11 फेर उसनै मेरे ताहीं कह्या, "हे माणस की सन्तान, ये हाड्डी इस्राएल के सारे घरान्‍ने का उदाहरण सैं। वे कहवै सैं, म्हारी हाड्डी सूखगी, अर म्हारी आशा जान्दी रही; हम पूरी तरियां तै कट चुके सां। 12 इस कारण भविष्यवाणी करकै उनतै कह, परमेसवर यहोवा न्यू कहवै सै: हे मेरी प्रजा के माणसों, देक्खो, मै थारी कब्र खोलकै थमनै उनतै लिकाड़ूंगा, अर इस्राएल के देश म्ह पोंहचा देऊँगा। 13 इस करकै जिब मै थारी कब्रां खोल्‍लूं, अर थमनै उनतै लिकाड़ूं, फेर हे मेरी प्रजा के माणसों, थम जाण ल्योगे के मै यहोवा सूं। 14 मै थारे म्ह अपणा आत्मा समवाऊँगा, अर थम जीओगे, अर थमनै थारे खास देश म्ह बसाऊँगा; फेर थम जाण ल्योगे के मन्‍नै यहोवा ए नै यो कह्या, अर करया भी सै, यहोवा की याए वाणी सै।"

यहूदा अर इस्राएल का फेर एक होणा

15 फेर यहोवा का यो वचन मेरे धोरै पोहच्या 16 "हे माणस की सन्तान, एक लाकड़ी लेकै उसपै लिख, ‘यहूदा की अर उसके संगी इस्राएलियाँ की;’ फेर दुसरी लाकड़ी लेकै उसपै लिख, ‘यूसुफ की यानिके एप्रैम की, अर उसके संगी इस्राएलियाँ की लाकड़ी।’ 17 फेर उन लाकड़ियाँ नै एक दुसरी तै जोड़कै एके कर ले के वे तेरे हाथ म्ह एके लाकड़ी बण जावै। 18 जिब तेरे माणस तेरै तै पूछै, ‘के तू हमनै न्ही बतावैगा के इनतै तेरा के मतलब सै?’ 19 फेर उनतै कहणा, परमेसवर यहोवा न्यू कहवै सै: देक्खो, मै यूसुफ की लाकड़ी नै जो एप्रैम के हाथ म्ह सै, अर इस्राएल के जो गोत्र उसके संगी सैं, उननै लेकै यहूदा की लाकड़ी तै जोड़कै उसके गैल एके लाकड़ी कर दियुँगा; अर दोन्‍नु मेरे हाथ म्ह एके लाकड़ी बणैंगी। 20 जिन लाकड़ियाँ पै तू इसा लिखैगा, वे उनके स्याम्ही तेरे हाथ म्ह रहवै। 21 फेर तू उन माणसां तै कह, परमेसवर यहोवा न्यू कहवै सै, देक्खो, मै इस्राएलियाँ नै उन जात्तां म्ह तै लेकै जिन म्ह वे चले गये सैं, च्यांरु ओड़ तै कठ्ठा करुँगा; अर उनके खास देश म्ह पोहचाऊँगा। 22 मै उननै उस देश यानिके इस्राएल के पहाड़ां पै एके जात्ति कर दियुँगा; अर उन सारया का एके राजा होवैगा; अर वे फेर दो न्ही रहवैंगे अर ना दो राज्याँ म्ह कदे बटैंगे। 23 वे फेर अपणी मूरतां, अर घिनोणे काम्मां या अपणे किसे तरियां के पाप के जरिये अपणे नै अशुद्ध न्ही करैंगे; पर मै उननै उन सारी बस्तियाँ तै, जड़ै वे पाप करै थे, लिकाड़कै शुद्ध करुँगा, अर वे मेरी प्रजा होवैंगे, अर मै उनका परमेसवर होऊँगा।"

24 "मेरा दास दाऊद उनका राजा होवैगा; अर उन सारया का एके पाळी होवैगा। वे मेरे नियमां पै चाल्‍लैगें अर मेरी विधियाँ नै मानकै उनके मुताबिक चाल्‍लैगें। 25 वे उस देश म्ह रहवैंगे जिस ताहीं मन्‍नै अपणे दास याकूब तै दिया था; अर जिस म्ह थारे पुरखा रहवै थे, उसे म्ह वे अर उनके बेट्टे-पोत्ते सदा बसे रहवैंगे; अर मेरा दास दाऊद सदा उनका प्रधान रहवैगा। 26 मै उनकै गैल शान्ति का करार करुँगा; वो सदा का करार ठहरैगा; अर मै उननै जगहां देकै गिणती म्ह बढ़ाऊँगा, अर उनके बीच अपणा पवित्रस्‍थान सदा बणाए राखूँगा। 27 मेरे निवास का तम्बू उनके उप्पर तण्या रहवैगा; अर मै उनका परमेसवर होऊँगा, अर वे मेरी प्रजा होवैंगे। 28 जिब मेरा पवित्रस्‍थान उनके बीच सदा कै खात्तर रहवैगा, फेर सारी जात जाण लेवैगी के मै यहोवा इस्राएल का पवित्र करण आळा सूं।"