1 "इस्राएल के प्रधानां कै बारै म्ह तू यो विलापगीत सुणा: 2 तेरी माँ एक किसी शेरणी* थी! वो शेरां कै बीच बैठ्या करदी अर अपणे बच्‍चयां नै जवान शेरां कै बिचाळै पाळै पोस्सै थी। 3 अपणे बच्‍चयां म्ह तै उसनै एक ताहीं पाळ्या अर वो जवान शेर होग्या, अर शिकार करणा सीख ग्या; उसनै माणसां ताहीं भी पाड़ खाया। 4 जात्ति-जात्ति के माणसां नै उसका जिक्र* सुण्या, अर उस ताहीं अपणे खोद्दे होए खड्डे म्ह फँसाया; अर उसकै नकेल डालकै उसनै मिस्र देश म्ह लेगे। 5 जिब उसकी माँ नै देख्या के वो धीरज धरे रही तोभी उसकी उम्मीद टूटगी, फेर अपणे एक और बच्‍चे ताहीं लेकै उसनै जवान शेर कर दिया। 6 फेर वो जवान शेर होकै शेरां कै बीच चाल्‍लण-फिरण लाग्या, अर वो भी शिकार करणा सीख ग्या; अर माणसां ताहीं भी पाड़ खाया। 7 उसनै उनके भवनां ताहीं बिगाड़या, अर उनके नगरां ताहीं उजाड़या बलके उसके गरजण के डर के मारे यहूदा देश अर जो कुछ उस म्ह था सारा किमे उजड़ ग्या। 8 फेर च्यांरु ओड़ के जात्ति-जात्ति के माणस अपणे-अपणे प्रान्त तै उसकै खिलाफ लड़ण खात्तर लिकड़ आए, अर उसकै खात्तर जाळ लगाया; अर वो उनके खोद्दे होए खड्डे म्ह फँस ग्या। 9 फेर वे उसकै नकेल डालकै अर कठघरे म्ह बन्द करकै बाबेल के राजा कै धोरै लेगे, अर गढ़ म्ह बन्द करया, के उसका बोल इस्राएल के पहाड़ी देश म्ह फेर सुणाई ना देवै।"

10 "तेरी माँ जिसतै तू पैदा होया, वो किनारे पै लाग्गी होई दाखलता की तरियां थी, अर ढुंघे पाणी के कारण फळां अर डाळियाँ तै भरी होई थी। 11 प्रभुता करण आळयां के राजदण्डां कै खात्तर उस बेल म्ह मोट्टी-मोट्टी डाळी थी; अर उसकी ऊँचाई इतणी होई के वो बादळां के बीच ताहीं पोहची; अर अपणी घणी सारी डाळियाँ समेत घणीए लाम्बी दिखाई पड़ी। 12 तोभी वा बेल जळजळाहट कै गैल उखाड़ कै धरती पै गिराई गई, अर उसके फळ पुरवाई हवा के लागण तै सूखगे; अर उसकी मोट्टी डाळी टूटकै सूखगी; अर वे आग तै भस्म होगी। 13 इब वो जंगळ म्ह, बलके निर्जल देश म्ह लगाई गई सै। 14 उस बेल की डाळियाँ की टह्णीयाँ म्ह तै आग लिकड़ी*, जिसतै उसके फळ भस्म होगे, अर प्रभुता करण के लायक राजदण्ड कै खात्तर उस म्ह इब कोए मोट्टी डाळी ना रही।"

योए विलापगीत सै, अर यो विलापगीत बण्या रहवैगा।