यहेजकेल 48

गोत्रां म्ह जमीन का बाँटया जाणा

1 "गोत्रां के हिस्से ये हो: उत्तरी हद तै लाग्या होया हेतलोन के राह कै धोरै तै हमात की घाटी ताहीं, अर दमिश्क की हद कै धोरै के हसरेनान तै उत्तर की ओड़ हमात कै धोरै ताहीं एक हिस्सा दान का हो; अर उसकी पूर्वी अर पश्चिमी हद भी हों। 2 दान की हद तै लाग्या होया पूर्व तै पश्चिम ताहीं आशेर का एक हिस्सा हो। 3 आशेर की हद तै लाग्या होया, पूर्व तै पश्चिम ताहीं नप्ताली का एक हिस्सा हो। 4 नप्ताली की हद तै लाग्या होया पूर्व तै पश्चिम ताहीं मनश्शे का एक हिस्सा। 5 मनश्शे की हद तै लाग्या होया पूर्व तै पश्चिम ताहीं एप्रैम का एक हिस्सा हो। 6 एप्रैम की हद तै लाग्या होया पूर्व तै पश्चिम ताहीं रूबेन का एक हिस्सा हो। 7 अर रूबेन की हद तै लाग्या होया, पूर्व तै पश्चिम ताहीं यहूदा का एक हिस्सा हो।"

देश कै बिचाळै धरती का खास हिस्सा

8 "यहूदा की हद तै लाग्या होया पूर्व तै पश्चिम ताहीं वो चढ़ाया होया हिस्सा*48:8 चढ़ाया होया हिस्सा उरै चढ़ाया होया हिस्सा पुरोहितां, लेवियाँ, नगरां अर प्रधानां तै दिया गया इलाका था। इन सारया नै पश्चिम तै पूर्व ताहीं उसाए फैल्या होया था जिसा दुसरे गोत्रां का हिस्सा था। हो, जिस ताहीं थमनै चढ़ाणा होवैगा, वो पच्‍चीस हजार बाँस चौड़ा अर पूर्व तै पश्चिम ताहीं किसे एक गोत्र के हिस्से कै बराबर लाम्बा हो, अर उसके बीच म्ह पवित्रस्‍थान हो। 9 जो हिस्सा थमनै यहोवा तै चढ़ाणा होवैगा, उसकी लम्बाई पच्‍चीस हजार बाँस अर चौड़ाई दस हजार बाँस की हो। 10 यो चढ़ाया होया पवित्र हिस्सा याजकां नै मिलै; वो उत्तर की ओड़ पच्‍चीस हजार बाँस लाम्बा, पश्चिम की ओड़ दस हजार बाँस चौड़ा, पूर्व की ओड़ दस हजार बाँस चौड़ा अर दक्षिण की ओड़ पच्‍चीस हजार बाँस लाम्बा हो; अर उसके बीचों-बीच यहोवा का पवित्रस्‍थान हो। 11 यो खास पवित्र हिस्सा सादोक की सन्तान के उन याजकां का हो जो मेरे हुकम नै पाळदे रहवै, अर इस्राएलियाँ के भटक जाण के बखत लेवियाँ की तरियां ना भटके थे। 12 इस करकै देश के चढ़ाए होए हिस्से म्ह तै यो उनके खात्तर चढ़ाया होया हिस्सा, यानिके परमपवित्र देश ठहरै; अर लेवियाँ की हद तै लाग्या रहवै। 13 याजकां की हद तै लाग्या होया लेवियाँ का हिस्सा हो, वो पच्‍चीस हजार बाँस लाम्बा अर दस हजार बाँस चौड़ा हो। सारी लम्बाई पच्‍चीस हजार बाँस की अर चौड़ाई दस हजार बाँस की हो। 14 वे उस म्ह तै ना तो कुछ बेचै, ना दुसरी धरती तै बदलै; अर ना धरती की पैहली उपज और किसे तै दी जावै। क्यूँके वो यहोवा कै खात्तर पवित्र सै।"

15 "चौड़ाई के पच्‍चीस हजार बाँस कै स्याम्ही जो पाँच हजार बच्या रहवैगा, वो नगर अर बस्ती अर चराई कै खात्तर साधारण हिस्सा हो; अर नगर उसके बीच म्ह हो। 16 नगर का यो माप हो, यानिके उत्तर, दक्षिण, पूर्व अर पश्चिम की ओड़ साढ़े च्यार-च्यार हजार हाथ। 17 नगर कै धोरै उत्तर, दक्षिण, पूर्व, पश्चिम, चराईयाँ हों। जो ढाई-ढाई सौ बाँस चौड़ी हों। 18 चढ़ाए होए पवित्र हिस्से कै धोरै की लम्बाई म्ह तै जो कुछ बचै, यानिके पूर्व अर पश्चिम दोन्‍नु ओड़ दस-दस बाँस जो चढ़ाए होए हिस्यां कै धोरै हो, उसकी फसल नगर म्ह मेहनत करण आळयां के खाण कै खात्तर हो। 19 इस्राएल के सारे गोत्रां म्ह तै जो नगर म्ह मेहनत करै, वे उसकी खेत्ती करया करैं। 20 सारा चढ़ाया होया हिस्सा पच्‍चीस हजार बाँस लाम्बा अर पच्‍चीस हजार बाँस चौड़ा हो; थमनै चकोर पवित्र हिस्सा चढ़ाणा होवैगा जिस म्ह नगर की खास धरती हो।"

21 "जो रह जावै, वो प्रधान नै मिलै। पवित्र चढ़ाए होए हिस्से की, अर नगर की खास धरती की दोन्‍नु ओड़ यानिके उनकी पूर्व अर पश्चिम की ओड़ के पच्‍चीस-पच्‍चीस हजार बाँस की चौड़ाई कै धोरै, जो और गोत्रां के हिस्यां कै धोरै रहवै, वो प्रधान नै मिलै। अर चढ़ाया होया पवित्र हिस्सा अर भवन का पवित्रस्‍थान उनके बीच म्ह हो। 22 जो प्रधान का हिस्सा होवैगा, वो लेवियाँ कै बिचाळै अर नगरां की खास धरती हो। प्रधान का हिस्सा यहूदा अर बिन्‍यामीन की हद कै बीच म्ह हो।"

दुसरे गोत्रां के हिस्से

23 "दुसरे गोत्रां के हिस्से इस तरियां हों: पूर्व तै पश्चिम ताहीं बिन्‍यामीन का एक हिस्सा हो। 24 बिन्‍यामीन की हद तै लाग्या होया पूर्व तै पश्चिम ताहीं शिमोन का एक हिस्सा। 25 शिमोन की हद तै लाग्या होया पूर्व तै पश्चिम ताहीं इस्साकार का एक हिस्सा। 26 इस्साकार की हद तै लाग्या होया पूर्व तै पश्चिम ताहीं जबूलून का एक हिस्सा। 27 जबूलून की हद तै लाग्या होया पूर्व तै पश्चिम ताहीं गाद का एक हिस्सा। 28 अर गाद की हद कै धोरै दक्षिण ओड़ की हद तामार तै लेकै मरीबा कादेश नाम के चोए ताहीं, अर मिस्र के नाळे अर महासागर ताहीं पोहचै। 29 जो देश थमनै इस्राएल के गोत्रां तै बाँटणा होवैगा वो योए सै, अर उनके हिस्से भी योए सैं, परमेसवर यहोवा की याए वाणी सै।"

नया नगर

30 "नगर के फाटक ये हों, यानिके उत्तर की ओड़ जिसकी लम्बाई च्यार हजार पाँच सौ बाँस की हो। 31 उस म्ह तीन फाटक हों, यानिके एक रूबेन का फाटक, एक यहूदा का फाटक, अर एक लेवी का फाटक हो; क्यूँके नगर के फाटकां के नाम इस्राएल के गोत्रां के नाम्मां पै धरणे होवैंगे। 32 पूरब की ओड़ हद च्यार हजार पाँच सौ बाँस लाम्बी हो, अर उस म्ह तीन फाटक हों; यानिके एक यूसुफ का फाटक, एक बिन्‍यामीन का फाटक, अर एक दान का फाटक हो। 33 दक्षिण की ओड़ हद च्यार हजार पाँच सौ बाँस लाम्बी हो, अर उस म्ह तीन फाटक हों; यानिके एक शिमोन का फाटक, एक इस्साकार का फाटक, अर एक जबूलून का फाटक हो। 34 अर पश्चिम की ओड़ हद च्यार हजार पाँच सौ बाँस लाम्बी हो, अर उस म्ह तीन फाटक हों; यानिके एक गाद का फाटक, एक आशेर का फाटक अर नप्ताली का फाटक हो। 35 नगर के च्यांरु ओड़ का घेरा अठारह हजार बाँस का हो, अर उस दिन तै आग्गै नै नगर का नाम ‘यहोवा शाम्मा’ रहवैगा।"