1 तेबे राजा अहाबे आपणी लाड़ी ईजेबेला खे एलिय्याह रे सारे कामा रे बारे दे दशेया कि तिने सारे बाल देवते रे नबी तलवारी साथे किंयाँ काये। 2 तेबे ईजेबेले एलिय्याहो गे एक दूत पेजी की सन्देशा पेजेया, "जे आऊँ काल एस ई बखते तेरे प्राण तिना नबीया जेड़े नि करी देऊँ तो देवता मां साथे तेड़ा ई बल्कि तेसते बी जादा करो।" 3 ये सुणी की एलिय्याह आपणे प्राण बचाणे खे नठी गा ओर यहूदा प्रदेशो रे बेर्शेबा जगा दे पऊँची की आपणा सेवक तेथी छाडीता। 4 ओर आपू जंगल़ो दे एकी दिनो रिया बाटा दे जाई की एक झाऊए रे डाल़ो निठे बैठी गा, तेती तिने ये बोली की आपणी मौत मांगी, "ओ यहोवा बस कर, एबे मेरे प्राण लई लो, कऊँकि आऊँ आपणे बुजुर्गा ते ठीक नि ए।" 5 से झाऊए रे डाल़ो निठे लेटी की सयी गा ओर देखो, एकी दूते तेसखे छुँईं की बोलेया, "उठी की खा।" 6 तिने नजर करी की क्या देखेया कि मेरे सरयाणे दे पात्थरो पाँदे पक्की री एक रोटी ओर एक कड़ा पाणिए रा राखी राखेया। तेबे तिने खाया-पिया ओर फेर लेटीगा। 7 दूजी बार यहोवे रा दूत आया ओर तेसखे छुँईं की बोलेया, "उठी की खा, कऊँकि ताखे एबु बड़ा दूर चलणा ए।" 8 तेबे तिने उठी की खाया-पिया ओर तेसा ई रोटिया साथे तागत पायी की चाल़ी दिन-रात चलदे-चलदे परमेशरो रे पाह्ड़ होरेबो दे पऊँचेया।

9 तेथी से एकी गुफा दे जाई की रूकेया ओर यहोवे रा ये वचन तेसगे पऊँचेया, "ओ एलिय्याह तूँ एथी क्या करने लगी रा?" 10 तिने ज्वाब दित्तेया, "सेना रे परमेशर यहोवे रिया तँईं माखे बऊत जल़न ऊई, कऊँकि इस्राएली लोक तेरी वाचा खे पूली गे दे, तेरी बेदिया टाल़ी तिया ओर तेरे भविष्यबक्ता तलवारी साथे काई ते ओर आऊँ ई कल्ला बची गा ओर सेयो मेरे प्राण बी लयी लणा चाओए।" 11 तेबे यहोवे एलिय्याह खे बोलेया, "एता ते निकल़ी की एस पाह्ड़ो पाँदे मां सामणे खड़ा ओ।" मां तेरे नेड़ो रिये ऊई की जाणा। तेबे एक प्रचण्ड तूफान चलेया। जेतेरिया बजा ते पाह्ड़ फटणे लगे, ओर पात्थर टुटणे लगे, तेबे तूफानो ते बाद भूकम्प ऊआ। पर इना दुँईं जगा दे यहोवा तिना बीचे नि था। 12 तेबे भूकम्पो ते बाद आग दिशी, तेबे बी यहोवा तेसा आगी दे नि था; तेबे आगी ते बाद एक दबी री जी आवाज सुणी। 13 ये आवाज सुणदे ई एलिय्याहे आपणा मूँ चाद्दरी साथे टकी ता ओर बारे जाई की गुफा रे द्वारो पाँदे खड़ा ऊआ। तेबे तेसखे एक आवाज सुणी, "ओ एलिय्याह तूँ एती क्या करने लगी रा?" 14 तिने ज्वाब दित्तेया, "माखे सेना रे परमेशर यहोवे रिया तँईं बऊत जल़न ऊई, कऊँकि इस्राएली लोक तेरी वाचा खे पूली गे दे, ओर तेरी बेदिया टाल़ी तिया ओर तेरे नबी तलवारी साथे काई ते ओर आऊँ ई कल्ला रयी गा दा ओर सेयो माखे बी काणे खे टोल़ने लगी रे।"*19:14 रोम. 11:3 15 यहोवे तेसखे बोलेया, "वापस ऊई की दमिश्को रे जंगल़ो खे जा ओर तेती पऊँची की अरामो रा राजा ऊणे खे, हजाएलो रा अभिषेक कर, 16 ओर इस्राएलो रा राजा ऊणे खे निमशीए रे पोते येहूए रा ओर आपणी जगा पाँदे नबी ऊणे खे आबेल-महोला रे शापातो रे पाऊ एलीशा रा अभिषेक करना। 17 ओर हजाएलो री तलवारी साथे जो कोई बची जाओ से यहूए कायी देणे ओर जो कोई येहूए री तलवारी ते बची जाओगे, से एलीशा नबीए काई देणे। 18 तेबे बी मां 7,000 मर्द बचाई की राखणे। यो सेयो ए, जो ना तो बाल देवते रे आगे कुटणे टेके ओर ना ई तिने तेसरी आराधना कित्ती।"

19 तेबे से तेथा ते चली गा ओर शापातो रा पाऊ एलीशा तेसखे मिलेया जिने आपू ते आगे बल़दा रिया बारा जोड़िया करी की आपू बारी जोड़िया साथे अल़ बाणे लगी रा था। तेसगे जाई की एलिय्याहे आपणी चाद्दर तेसखे टखाई ती। 20 तेबे से बल़दा खे छाडी की एलिय्याह पीछे दौड़ेया ओर बोलणे लगेया, "माखे आपणे माया-बाओ खे चूमणे दे, तेबे मां तां पीछे चलणा।" तिने बोलेया, "वापस चली जा, मैं तां साथे क्या करी राखेया?"*19:20 मत्ती 8:21, लूक. 9:61 21 तेबे से तेसगे ते वापस चली गा ओर बल़दा री एक जोड़ी लई की बलि कित्ते ओर बल़दा रा समान फूकी की मास पकाई की आपणे लोका खे दित्तेया ओर तिने खाया; तेबे से लक बानी की एलिय्याह पीछे चलेया ओर तेसरी सेवा-टईल करने लगेया।