1 योशिय्याह राजे दूत पेजे, ओर यहूदा प्रदेश ओर राजधानी यरूशलेम शईरो रे सारे बुजुर्ग आपू गे बुलाए। 2 तेबे राजा यहूदा शईरो रे सारे लोका खे ओर यरूशलेम शईरो दे रणे वाल़े सारे लोक ओर पुरोईत ओर नबी, बल्कि छोटे-बड़े सारी प्रजा रे लोका खे साथे लई की यहोवे रे मन्दरो दे गया। तेसखे जो वाचा री कताब यहोवे रे मन्दरो रे मिली थी, तेतेरी सारिया गल्ला पढ़ी की तिना खे सुणाईयां। 3 तेबे राजा योशिय्याह खम्बे गे खड़ा ऊआ। तिने यहोवे साथे ये वादा कित्तेया कि तेस यहोवे पीछे-पीछे चलणा ओर आपणे सारे मन ओर सारे प्राणो साथे तेसरी आज्ञा, ओर चतौणिया, बिदिया रा सदा पालण करेया करना। तेस तेते बिधानो री कताबा दे लिखिया दिया बिदिया खे मानदा रणा। ओर सारी प्रजे बी ये प्रतिज्ञा कित्ती, कि तिना बी बिधानो रा पाल़न करदे रणा। 4 इजी ते बाद राजे हिल्किय्याह बड़े पुरोईतो खे ओर तेसते थालले पुरोईता ओर द्वारपाला खे आज्ञा दित्ती कि जितणे पांडे बाल ओर अशेरा ओर सर्गो रे सारे गणा खे बणी रे, तिना सबी खे यहोवे रे मन्दरो ते निकयाल़ी की ली आओ। तेबे तिने सेयो यरूशलेम शईरो ते बारे किद्रोनो रे डोरूआ रे फूकी की तिना री स्वा बेतेलो दे पऊँचाई ती। 5 जो पुजारी यहूदा रे राजेया यहूदा रे शईरो रे ऊच्ची जगा दे ओर यरूशलेम शईरो रे नेड़े-तेड़े री जगा दे तूप बाल़ने खे ठराए थे, तिना खे ओर बाल, सूरज, चाँद, राशिचक्र ओर सर्गो रे सारे गणा खे तूप बाल़ो थे, सेयो बी राजे दूर करीते। 6 से अशेरा री मूर्तिया खे यहोवे रे मन्दरो ते निकयाल़ी की यरूशलेम शईरो ते बारे किद्रोन नाल़े दे लईगा ओर से तेथी फूकी ती ओर पीसी की चूरा करी ता। तेबे से चूरा आम माणूंआ री कब्रा रे सेटी ता। 7 तेबे पुरूषगामिया रे कअर जो यहोवे रे मन्दरो रे थे, जेती जवाणसा अशेरा खे पर्दे बणाओ थिया, सेयो तिने टाल़ी ते। 8 राजा योशिय्याहे यहूदा रे सबी शईरा ते पुरोईत बुलाई की गेबा ते बेर्शेबा तक तिना ऊच्ची जगा खे, जेती तिने पुरोईते तूप बाल़ेया था, अशुद्ध करी ता ओर बड़े द्वारो री ऊच्ची जगा, मतलब जो जगा शईरो दे यहोशू नाओं रे परदानो रे बड़े द्वारो पाँदे थिया ओर शईरो रे बड़े द्वारो ते पीतरे जाणे वाल़ेया री खूँजी तरफा खे थिया, सेयो तिने टाल़ी तिया। 9 तेबे बी ऊच्ची जगा रे पुरोईत यरूशलेम शईरो रे यहोवे री बेदिया गे नि आए, सेयो बिना सजेड़े री रोटी आपणे पाईया साथे खाओ थे। 10 तेबे तिने तोपेत जो हिन्नोमो दे रणे वाल़ेया री तराईया दे था, अशुद्ध करी ता, ताकि कोई आगी रे देवता मोलेको खे आपणे माठे-बेटिया खे बलिया रे रूपो दे नि चढ़ाओ। 11 जो कोड़े यहूदा रे राजेया सूरजो खे चढ़ाई की, यहोवे रे मन्दरो रे द्वारो पाँदे नतन्मेलेक नाओं रे खुसरे रे बारले कमरे दे राखे थे, सेयो तिने दूर करीते ओर सूरजो रे रथ आगी रे फूकी ते। 12 राजा आहाजो री अटारिया रे छतो पाँदे जो बेदिया यहूदा रे राजेया री बणाई राखिया थिया ओर जो बेदिया मनश्शे यहोवे रे मन्दरो रे दोनो आँगणो रे बणाई राखिया थिया, सेयो राजे टाल़ी की पीसी तिया ओर तिना रा चूरा किद्रोन नाल़े रे सेटी ता। 13 जो ऊच्ची जगा इस्राएलो रे राजा सुलैमाने यरूशलेम शईरो रे पूर्वो रिया तरफा खे ओर विकारी नाओं री पाह्ड़िया पाँदे दक्खणा रिया तरफा खे, ओर अश्तोरेत नाओं री सीदोनिया री कृणित देवी ओर कमोश नाओं रा मोआबिया रा कृणित देवता ओर मिल्कोम नाओं रा अम्मोनिया रे घिनौने देवते खे बणाए थे, सेयो सब राजे अशुद्ध करीते। 14 तिने पात्थरा रे खम्बे तोड़ी ते ओर अशेरा बाडी ती ओर तिना रिया जगा माणूंआ री आड्डिया साथे परी तिया। 15 फेर बेतेलो दे जो बेदी थी ओर जो ऊच्ची जगा नबातो रे पाऊ यारोबामे बणाई थी, जिने इस्राएलो ते पाप कराया था, से बेदी ओर ऊच्ची जगा तिने टाल़ी तिया ओर ऊच्ची जगा फूकी की चूरा करी ता ओर अशेरा फूकी तिया। 16 तेबे योशिय्याहे फिरी की तेथो रे पाह्ड़ा रिया कब्रा खे देखेया ओर लोका खे पेजी की तिना कब्रा ते आड्डिया निकयाल़िया ओर बेदिया पाँदे फूकी की से अशुद्ध करी तिया।* ये यहोवे रे तेस वचनो रे मुताबिक ऊआ, जो परमेशरो रे तिने पग्ते आका पाई की बोलेया था जिने इना ई गल्ला री चर्चा कित्ती थी।

17 तेबे राजा योशिय्याहे पूछेया, "जो खम्बा माखे दिशणे लगी रा, से क्या ए?" तेबे शईरो रे लोके तेसखे बोलेया, "ये परमेशरो रे तेस पग्त माणूंए री कब्र ए, जिने यहूदा ते आई की एस कामो री चर्चा आका पाई की कित्ती थी, जो तैं बेतेलो री बेदिया साथे कित्तेया।"

18 तेबे तिने बोलेया, "एसखे छाडी देयो; एसरी आड्डिया खे कोई नि टाओ।" तेबे तिने तेसरी आड्डिया तेस नबीए री आड्डिया साथे जो सामरिया ते आया था, रणे दित्तिया।

19 फेर ऊच्ची जगा रे जितणे मन्दर सामरिया रे शईरो रे थे, जिना खे इस्राएलो रे राजे बणाई की यहोवे खे रोष दलाया था, सेयो सारे योशिय्याहे टाल़ी ते ओर जेड़ा-जेड़ा तिने बेतेलो रे कित्तेया था, तेड़ा ई तिने तिना साथे बी कित्तेया। 20 तिना ऊच्ची जगा रे जितणे पुरोईत तेती थे सेयो सारे तिने तिना ई बेदिया पाँदे बलि करीते ओर तिना पाँदे माणूंआ री आड्डिया फूकी की यरूशलेम शईरो खे वापस ऊईगा।

21 राजे सारी प्रजा रे लोका खे आज्ञा दित्ती, "एसा बिधानो री कताबा दे जो लिखी राखेया, तिजी रे मुताबिक आपणे परमेशर यहोवे खे फसह रा त्यार हर साल मनाओ।" 22 जरूर एड़ा फसह ना तो न्यायिया रे दिना दे मनाया गया था जो इस्राएलो रा न्याय करो थे ओर ना इस्राएल ओर यहूदा रे राजेया रे दिना दे मनाया था। 23 राजा योशिय्याह रे राजो रे ठारूए साले यहोवे रिया तँईं यरूशलेम शईरो दे ये फसह रा त्यार मनाया। 24 तेबे आत्मा साथे गल्ल करने वाल़े, जादू-टोणा वाल़े, गृहदेवता, मूर्तिया ओर जितणी घिनौनी चीजा यहूदा देश ओर यरूशलेम शईरो दे जेती-केथी दिशिया, सेयो सारिया योशिय्याहे एड़ी इच्छा ते नाश करी तिया कि बिधानो री जो गल्ला कताबा दे लिखी राखिया थिया जो हिल्किय्याह पुरोईतो खे यहोवे रे मन्दरो दे मिली थी, तिना खे से पूरी करो।

25 तेस जेड़ा ना तो तेसते पईले एड़ा कोई राजा ऊआ ओर ना तेसते बाद एड़ा कोई राजा उठेया, जो मूसे रे पूरे बिधानो रे मुताबिक आपणे पूरे मन ओर पूरे प्राण ओर पूरी शक्तिया साथे यहोवे री तरफा खे फिरेया ओ। 26 तेबे बी यहोवे रा पड़केया रा बड़ा कोप शान्त नि ऊआ, जो इजी बजा ते यहूदा पाँदे पड़केया था कि राजा मनश्शे यहोवे खे रोषो पाँदे रोष दलाया था। 27 यहोवे बोलेया था, "जिंयाँ मैं इस्राएल प्रदेश आपू सामणे ते दूर करिता दा ए, तिंयाँ ई यहूदा प्रदेश बी दूर करी देणा। जो यरूशलेम शईर मैं चूणी राखेया था, से मां छाडी देणा। जेस मन्दरो रे बारे दे मैं ये बोलेया था कि मां तेती आपणा नाओं ऊच्चा करना से बी मां छाडी देणा।"

28 राजा योशिय्याह रे ओर सब काम जो तिने कित्ते, सेयो यहूदा रे राजेया रे इतिआसो री कताबा दे लिखी राखे। 29 तेसरे दिना दे फिरोन-नको नाओं रा मिस्रो रा राजा अश्शूरो रे राजे रे खलाफ फरात नदिया तक गया तो योशिय्याह राजा बी तेसरा सामणा करने खे गया ओर फिरौने तेसखे देखदे ई से मगिद्दो दे काई ता। 30 तेबे तेसरे कर्मचारिये तेसरी लाश एकी रथो दे राखी की मगिद्दो ते लई जाई की यरूशलेम शईरो खे पऊँचाई ओर तेसरिया आपणिया कब्रा दे राखी ती। तेबे आम माणूंए योशिय्याह रा पाऊ यहोआहाज लई की तेसरा अभिषेक करी की तेसरे बाओ री जगा पाँदे राजा नियुक्त करी ता।

31 जेबे राजा यहोआहाज यहूदा प्रदेशो दे राज करने लगेया, तेबे से तेईया साला रा था ओर तीन मीन्ने तक यरूशलेम शईरो दे राज करदा रया; तेसरी माया रा नाओं हमूतल था, जो लिब्ना शईरो दे रणे वाल़े यिर्मयाह री बेटी थी। 32 तिने ठीक आपणे बुजुर्गा जेड़ा कित्तेया, जो यहोवे री नजरा रे बुरा था। 33 से मिस्रो रे राजा फिरौन-नके हमात इलाके रे रिबला शईरो दे कैद करिता, ताकि से यरूशलेम शईरो दे राज नि करी सको, तेबे तिने देशो पाँदे 3,400 किलो चाँदी ओर चौंती किलो सूईना जुर्माना कित्तेया। 34 तेबे फिरौन-नके योशिय्याह रा पाऊ एल्याकीम तेसरे बाओ योशिय्याह री जगा पाँदे राजा नियुक्त कित्तेया ओर तेसरा नाओं बदली की यहोयाकीम राखेया ओर यहोआहाजो खे लईगा। ओर यहोआहाज मिस्रो रे जाई की तेथी मरी गा।

35 राजा यहोयाकीमे फिरौनो खे से चाँदी ओर सूईना तो दित्तेया, पर प्रदेशो पाँदे इजी खे कर लगाया कि फिरौनो री आज्ञा रे मुताबिक तिजी खे देई सको, मतलब प्रदेशो रे लोका ते जितणा जेस पाँदे लगान लगेया, तिथणा चाँदी ओर सूईना तेसते फिरौन-नको खे देणे खे लई ला।

36 जेबे राजा यहोयाकीम राज करने लगेया, तेबे से पच्चीया साला रा था, ओर ग्यारा साल तक यरूशलेम शईरो दे राज करदा रया ओर तेसरी माया रा नाओं जबीदा था जो रूमा शईरो दे रणे वाल़े पदायाह री बेटी थी। 37 तिने ठीक आपणे बुजुर्गा जेड़ा से कित्तेया, जो यहोवे री नजरा दे बुरा था।