7 पर इतणा ओ कि तूँ याओ बानी की ओर बऊत मजबूत ऊई की जो बिधान मेरे दास मूसे ताखे देई राखे तिजी रे मुताबिक करने रे चौकसी करेआ ओर तिजी ते ना तो दाँणे मुड़ना ओर ना खूँजे, तेबे जेती-जेती तूँ जाणा, तेती-तेती तेरे काम सफल ऊणे। 8 बिधानो री एसा कताबा* दे लिखी रिया इना समजा रिया गल्ला खे याद राखणा, इदे ई रात-दिन त्यान देणा, ओर जो कुछ तिदे लिखी राखेया तेतेरे मुताबिक करदे रणा, कऊँकि एड़ा ई करने ते तेरे सारे काम सफल ऊणे ओर तेरी बढ़ोतरी ऊणी। 9 याद राख कि मैं ताखे आज्ञा देई राखी, "याओ बानी की पक्का ऊई जा; इजी री खातर ना तो डरना ओर ना कबराणा, कऊँकि जेती-जेती तूँ जाणा, तेती-तेती तेरा प्रभु परमेशर तां साथे रणा।"