1 एक दिन शिमशोन तिम्नाह शईरो खे गया ओर तेती तेसखे पलिश्ती जातिया री एक जवान छोट्टी देखी, 2 तेबे तिने जायी की आपणे माये-बाओ खे बोलेया, "तिम्नाह दे मैं पलिश्ती जातिया री एक जवान छोट्टी देखी राखी, एबे तुसे तेसा साथे मेरा ब्या कराई देयो।" 3 पर तेसरे माये-बाओए तेसखे बोलेया, "क्या म्हारे रिश्तेदारा री छोट्टिया बीचे, या म्हारे सबी जातिया रे लोका बीचे कोई छोट्टी नि ए, कि तूँ बिना खतना कित्ते रे पलिश्तिया री छोट्टिया साथे ब्या करना चाएया?" शिमशोने आपणे बाओ खे बोलेया, "तेसा साथे ई मेरा ब्या कराई देयो; कऊँकि से माखे बऊत पसंद ए।" 4 पर तेसरे माये-बाओ नि जाणो थे कि ये गल्ल यहोवे रिया तरफा ते ओई, कि से पलिश्तिया रे खलाफ बाह्ना टोल़ने लगी रा। तेस बखते तो पलिश्ती लोक इस्राएली लोका पाँदे राज करो थे।

5 तेबे शिमशोन आपणे माया-बाओ साथे तिम्नाह शईरो खे चलेया, पर जेबे से तिम्नाह गे एक अंगूरा रे बगीचे गे पऊँचेया, तेती तेस सामणे एक जवान शेर दहाड़ने लगेया ओर तेस सामणे आईगा। 6 तेबे यहोवे तेसखे एड़ी तागत दित्ती कि जेबे तेसरे आथो दे कुछ पनि नि था, तेबे बी तिने से शेर एड़ा फाड़ेया, जेड़ा कोई बाकरिया रे बच्चे खे फाड़ोआ। तिने आपणा ये काम आपणे माये बाओ गे नि बताया।

7 तेबे तिने जाई की तेसा छोट्टिया साथे गल्ल बात कित्ती ओर से शिमशोनो खे ओर बी अच्छी लगी। 8 कुछ दिना ते बाद से तेसा छोट्टिया खे ब्या करी की ल्याऊणे खे तिम्नाह खे गया पर बाटा दे से तेस शेरो री लोथ देखणे खे मुड़ेया, तो तेती तिने देखेया कि शेरो री लोथा दे पँऊरी रा एक छत्ता ए ओर तिदे सयीत बी ए। 9 तेबे से तेते बीचा ते कुछ सयीत आथो दे लयी की खांदे-खांदे आपणे माये-बाओ गे गया ओर तिना खे ये बिना बताए कि मैं ये शेरो री लोथा ते निकयाल़ी राखेया, कुछ दित्तेया ओर तिने बी से खाया। 10 तेबे शिमशोनो रा बाओ तेसा छोट्टिया रे कअरे गया ओर शिमशोने ब्याओ री रवाजा रे मुताबिक तेती तिना खे एक ताम दित्ती। 11 तेबे पलिश्ती लोके देखेया कि शिमशोन ताम देणे लगी रा, तिने तेस साथे तीई जवान मर्द पेजी ते। 12 शिमशोने तिना खे बोलेया, "आऊँ तुसा खे एक पुजाणी बोलूँआ; जे तुसे एसा ब्याओ रिया तामा रे साता दिना रे पीतरे पुजाणिया खे समजी की मतलब बताई देयो, तो मां तुसा खे तीई कुर्ते ओर तीई मलमलो रे टाल्लेया रे जोड़े देणे। 13 पर जे तुसे मतलब नि बताई सके, तो तुसा माखे तीई कुर्ते ओर तीई मलमलो रे टाल्लेया रे जोड़े देणे पड़ने।" तिने मर्दे तेसखे बोलेया, "आपणी पुजाणी बोल कि आसे तिजी खे सुणूँ।" 14 तेबे शिमशोने तिना खे बोलेया, "खाणे वाल़े बीचा ते खाणा ओर तागतवरो बीचा ते मीठी चीज निकल़ी।" पर सेयो एसा पुजाणिया रा मतलब तीऊँ दिना तक नि देई सके। 15 पर चौथे दिने तिने शिमशोनो री ऊणे वाल़ी लाड़िया खे बोलेया, "आपणे ऊणे वाल़े लाड़े खे बईकेर की से आसा गे पुजाणिया रा मतलब बताओ, नई तो आसा तूँ तेरे बाओ रे कअरो समेत आगी दे फूकी देणी। क्या तुसे लोके म्हारा तअन लूटणे खे आसा खे निऊँदा देई राखेया?" 16 तेबे से शिमशोनो गे गयी ओर ये बोली की तेस सामणे रोणे लगी, "तूँ मांते प्यार नि करदा पर बैर ई राखेया; कि तैं एक पुजाणी मेरी जातिया रे लोका गे तो बोली राखी, पर माखे तेतेरा मतलब पनि बताया।" तिने बोलेया, "मैं इजी रे बारे दे आपणे माये या बाओ गे पनि दशी राखेया, तो आऊँ ताखे किंयाँ बताऊँ?" 17 से तामा रे सातो दिना तक शिमशोनो सामणे रोंदी रयी ओर सातुए दिने जेबे तेसे से बऊत तंग कित्तेया, तेबे तिने तेसा गे पुजाणिया रा मतलब बताईता। तेबे तेसे जाई की तिना आपणी जातिया रे लोका खे तेतेरा मतलब बताईता। 18 तेबे सातुए दिने सूरज डूबी नि रया था कि तिने शईरो रे लोके शिमशोनो गे जाई की बोलेया, "सयीतो ते जादा क्या मीठा ए ओर शेरो ते जादा कुण तागतबर ए?" शिमशोने तिना खे बोलेया, "जे तुसे मेरी बाच्छिया खे अल़ो दे नि जोड़दे, तो मेरी पुजाणिया खे कदी नि समजदे।" 19 तेबे यहोवे तेसखे एड़ी तागत दित्ती कि तिने अश्कलोन शईरो दे जायी की तेथो रे तीई मर्द काई ते ओर तिना रा तअन लूटी की तीई जोड़े टाल्लेया रे पुजाणिया रा मतलब बताणे वाल़ेया खे देई ते। तेबे से बऊत रोष ऊई की आपणे बाओ रे कअरो खे चली गा। 20 ओर शिमशोनो री ऊणे वाल़ी लाड़िया रा ब्या तेसा रे बावे शिमशोनो रे एकी दोस्तो साथे करिता जो तेती तामा दे तेस साथे था।