1 फेर यहोवे मूसे खे बोलेया, 2 "इस्राएलिया खे आज्ञा दे कि सेयो सबी कोढ़िया खे ओर जितणेया खे प्रमेह री बमारी ओ ओर जितणे लोथ छूणे री बजअ ते अशुद्ध ए, तिना सबी खे छावणिया ते बारे पेजी दे; 3 एड़िया बमारिया वाल़ेया खे चाए से मर्द ओ या जवाणस तिना खे छावणिया ते बारे निकयाल़ी दे; केथी एड़ा नि ओ कि तुसा री छावणी, जिदे आँऊ रऊँआ, तिना री बजअ ते अशुद्ध ऊई जाओ।" 4 ओर इस्राएलिए एड़ा ई कित्तेया, मतलब एड़े लोक छावणिया ते बारे निकयाल़ी ते; जेड़ा यहोवे मूसे खे बोलेया था।

5 तेबे यहोवे मूसे खे बोलेया, 6 "इस्राएलिया खे बोल कि जेबे कोई मर्द या जवाणस यहोवे साथे तोखा करी की ओरी रे खलाफ एड़ा कोई पाप करो, तो से माणूं दोषी ऊणा, 7 तेबे से आपणा कित्तेया रा पाप मानी लओ; जो तिने बुरा करी राखेया ओर तेते नुकशाणो रे बदले पाँजुआ इस्सा बढ़ाई की तेसखे देई देओ जेसरा तिने बुरा करी राखेया। 8 पर जे तेस माणूंए रा कोई टब्बरो वाल़ा नि ओ तो जेसखे दोषो रा बदला देणा ओ, तो तेस दोषो रे बदले जो बी चढ़ावा यहोवे खे दित्तेया जाओ से पुरोईतो रा ओ, ओर तिजी रा मोल तेस प्राश्चित वाल़े खाडूए ते जादा ओ जेते की तेसरा बदला चुकाणा ओ। 9 ओर जितणी पवित्र कित्ती री चीजा इस्राएली चकी री पेंट करी की, पुरोईतो गे ल्याओ, से पुरोईतो री ओ; 10 सबी माणूंआ री पवित्र कित्ती री चीजा पुरोईतो री ओ; कोई जो कुछ बी पुरोईतो खे देओ से तेसरा ई ओ।"

11 तेबे यहोवे मूसे खे बोलेया, 12 "इस्राएलिया खे बोलो कि जे केसी माणूंए री जवाणस कोई बुरी चाल चली की तेस साथे तोखा करो, 13 ओर कोई मर्द तेसा साथे शारीरिक सम्बन्द बणाओ, पर ये गल्ल तेसा रे लाड़े खे पता नि ओ, ओर से अशुद्ध ऊईगी री ओ, पर ना कोई तेसा रे एस कामो रा गवाह् ओ ओर ना ई गल़त काम करदे पखड़ी री ओ; 14 ओर तेसा रे लाड़े रे मनो रे शक पैदा ऊई जाओ, मतलब से आपणी लाड़िया पाँदे शक करने लगी जाओ ओर से अशुद्ध ऊई री ओ; या तेसरे मनो रे जल़न पैदा ओ ओर से आपणी जवाणसा पाँदे जल़ने लगो चाए से अशुद्ध ऊई री नि ओ; 15 तो से मर्द आपणी जवाणसा खे पुरोईतो गे लई जाओ ओर तिजी खे दो किलो जौ रा आटा चढ़ाणे खे लई जाओ; पर से तिजी पाँदे तेल नि पाओ ओर ना ई लोबान राखो, कऊँकि से जल़ने वाल़ा ओर पापो खे याद करवाणे वाल़ी नज्जो री बलि ऊणी।"

16 तेबे पुरोईत तेसा जवाणसा खे यहोवे री मौजुदगिया रे खड़ी करो; 17 तेबे पुरोईत माट्टिया रे पांडे रे पवित्र पाणी पाओ, पवित्र तम्बूए री जमीना पाँदा ते कुछ तूड़ चकी की तेते पाणिए रे पाओ। 18 तेबे पुरोईत तेसा जवाणसा खे यहोवे रे सामणे खड़ी करी की तेसा रे सिरो रे बाल़ पतींगो, ओर याद करवाणे वाल़ी नज्जो री बलि जो जल़न वाल़ी ए तेसा रे आथो रे देओ। फेर पुरोईत आपणे आथो रे कड़ुआ पाणी लई राखो जो स्राप लगाणे री बजअ ऊणा। 19 तेबे पुरोईत तेसा जवाणसा खे कसम देई की बोलो, कि जे तूँ बेकसूर ओ ओर किने मर्दे तां साथे गल़त काम नि करी राखेया ओर आपणे लाड़े खे छाडी की केसी ओरी साथे ऊई की अशुद्ध नि ऊई री ओ, तो तूँ एस कड़ुए पाणिए रे गुणो ते जो स्रापो री बजअ ते आऊणे वाल़ी आफत ओई बची जाणी। 20 पर जे तूँ आपणे लाड़े खे छाडी की केसी दूजे साथे ऊई की अशुद्ध ऊई री ओ ओर तेरे लाड़े खे छाडी की किने ओरी मर्दे तां साथे शारीरिक सम्बन्द बणाई राखेया ओ, 21 ओर पुरोईत तेसा खे स्राप देणे वाल़ी कसम देई की बोलो, यहोवा तेरी खुटिया खे सड़ाओ ओर तेरा पेट फुलाओ ओर लोक तेरा नाओं लई की ताखे स्राप ओर बदुआ देओ; 22 मतलब एबे से पाणी जो स्रापो री बजअ बणोआ तेरी आंजा रे जाई की तेरे पेटो खे फुलाओ ओर तेरी खुटिया खे साड़ी देओ। तेबे से जवाणस बोलो, आमीन्, आमीन्।

23 तेबे से पुरोईत स्रापो रे ये शब्द कताबा रे लिखी की तेस कड़ुए पाणिए ते मिटाई की, 24 फेर तेसा जवाणसा खे से कड़ुआ पाणी पल़्याओ जो स्रापो री बजअ ओआ ओर से पाणी जो स्रापो री बजअ बणोआ तेसा जवाणसा रे पेटो रे जाई की तेस कड़ुए पाणिए तेसा खे बऊत दुख देणा। 25 ओर पुरोईत तेसा जवाणसा रे आथो बीचा ते जल़ने वाल़ी नज्जो री बलिया खे लई की यहोवे रे आगे ईलाई की बेदिया रे नेड़े पऊँचाओ; 26 फेर पुरोईत तेस नज्जो री बलिया बीचा ते तिजी रा याद करवाणे वाल़ा पाअग, मतलब एक मुट्ठी लई की बेदिया पाँदे फूको ओर तिजी ते बाद जवाणसा खे से पाणी पल़्याओ। 27 जे से जवाणस अशुद्ध ऊई री ओ ओर आपणे लाड़े साथे तोखा करी राखेया ओ, तो से पाणी जो स्रापो री बजअ ओआ तेसा जवाणसा रे पेटो रे जाई की कड़ुआ ऊई जाणा ओर तेसा रा पेट फूलणा ओर तेसा री खुटी सड़ी जाणी ओर तेसा जवाणसा रा नाओं तेसा रे लोका बीचे स्रापित ऊणा। 28 पर जे से जवाणस अशुद्ध नि ऊई री ओ ओर शुद्ध ई ओ तो से बेकसूर ठईरनी ओर से बच्चेया खे पैदा करी सकोई।

29 जल़ने रा बिधान येई ए कि जेबे कोई जवाणस ब्या ऊणे ते बाद आपणे लाड़े खे छाडी की दूजे मर्दो साथे रई की अशुद्ध ऊई ओ, 30 तेबे चाए मर्दो रे मनो रे जल़न पैदा ओ ओर से आपणी जवाणसा पाँदे जल़ने लगो; तो से तेसा खे यहोवे री मौजुदगिया रे खड़ी करी देओ ओर पुरोईत तेसा पाँदे ये सारा बिधान पूरा करो। 31 तेबे से जवाणस आपणे पापो री आपू ई जिम्मेबार ऊणी पर मर्द बेकसूर रणा।