1 ओ मेरे बच्चेयो, जे तुसे मेरिया गल्ला खे मानो

ओर मेरी आज्ञा खे आपणे मनो दे राखो,

2 ओर अक्ला रिया गल्ला त्यानो साथे सुणे,

ओर समजा री गल्ल मन लगाई की सोचे;*

3 ओर जे तूँ ओशियारी ओर समजा खे बऊत कोशिशा ते आका पाई की बुलाए,

4 ओर जे तूँ तिजी खे चाँदिए रिया खानी जेड़ा टोल़ो,

ओर गुप्त खजाने जेड़ा तिजी खे टोल़दा रये;*

5 तेबे तां यहोवे रा डर समजणा,

ओर परमेशरो रा ज्ञान ताखे मिलणा।

6 कऊँकि यहोवा ई बुद्धि देओआ,

ओर तेसरे मुंए तेई ज्ञान ओर समजा रिया गल्ला निकल़ोईया।*

7 से सीदे लोका खे खरी बुद्धि देओआ;

जिना रा चाल-चलण खरा ओआ, तिना रा से रक्षक बणोआ।

8 से न्याय रिया बाटा दे चलणे वाल़ेया री देख-पाल़ करोआ,

ओर आपणे विश्वासो जोगे रणे वाल़ेया रिया बाटा री रक्षा करोआ।

9 जे तू मेरिया गल्ला खे सुणे, तो ताखे पता लगी जाणा कि क्या ठीक, न्याय ओर बिना पक्ष-पातो ते ए।

ताखे पता लगी जाणा कि ताखे क्या करना चाईयो।

10 कऊँकि बुद्धि तो तेरे मनो रे आऊणी,

ओर ज्ञान ताखे सुख देणे वाल़ा लगणा;

11 विवेको तेरी निगरानी राखणी,

ओर समजा तू सम्बाल़ी की राखणी,

12 ताकि यो वरदान ताखे बुराईया रिया बाटा ते,

ओर उल्टिया-फुल्टिया गल्ला करने वाल़ेया ते बचाओ,

13 जो सच्चाईया री बाटा खे छाडी देओए,

ताकि बुरिया बाटा दे चलो।

14 सेयो बुराई करने ते खुश ओए,

ओर दुष्ट माणूंए री उल्ट फेरो रिया गल्ला ते खुश रओए;

15 तिना लोका रा चाल-चलण ठीक नि ए,

ओर तिना रिया बाटा प्रष्ट ऊई गी रिया।

16 बुद्धि ओर विवेक ग्रईण करने ते तूँ पराई जवाणसा ते बी बचणा,

जो मीठिया-मीठिया गल्ला बोली की फसाई देओई,

17 से आपणे जवानिया रे लाड़े खे छाडी देओई;

ओर आपणे परमेशरो सामणे कित्ती री वाचा खे पूली जाओई।

18 एड़िया जवाणसा रे कअरो रिया तरफा खे जाणा तेड़ा ई ए जेड़ा मौता रिया बाटा दे जाणा,

तेती जाणा नरको रिया तरफा खे जाणे रे बराबर ए;

19 जो तेसा गे जाओए, तिना बीचा ते कोई बी वापस नि आऊँदा;

ओर ना ई फेर तिना खे जिन्दगिया री बाट मिलदी।

20 इजी रिया तँईं तूँ खरे माणूंआ रिया बाटा दे चल,

ओर तर्मिया री बाटा खे पकड़ी की राख।

21 कऊँकि सीदे लोक देशो दे बसे दे रणे,

ओर खराईया साथे चलणे वाल़े लोक ई तिदे टिके दे रणे।

22 पर दुष्ट लोक तेस देशो बीचा ते नाश ऊणे,

ओर विश्वासघाती तेथा ते बारे करी देणे।