Etɛp e syela Sisim natel Zaŋ ɛ 14

Mɔn bhata nɛ bot ɛ zebaabela tsik ɔ

1 Mɛ nadi ebaabee, wɔ gwaa, mɛ zɛbee Mɔn bhata tetel kɔ ɛtsok ɛ Siyɔŋ. É di nyɛ nadi ɔ, ye nabɛ ɛ́ nɛ bɛdhiiti bot bɛmil dhet nɛ bɛmil mɛkam-mɛná nɛ ɛná (144 000), nadi nɛ din ɛ lɛ nɛ yii Sɛɛg kwyala kɔ ebhata-bhwoob bɔɔ ɔ. 2 Mɛ eezɛgwak dhiiti gwood tɔ gwoo é swak dáa eboo mɛsok, dáa boo bham ghɛl ɛko. Tin, ɛtap ɛ mɛ nagwak ɛ nadi ɛ́ dáa yii bot ɛ di ebwom ngɔmbi ɔ. 3 Bɛtɛ nɛ bot binɔk nadi etii djeeb na bes sok bhwoob bóó mɛkoozi, sok bhwoob edjema ená di nɛ tsik ɔ, zɛnɔɔ bɛpaa. Mot nabɛ ɛ́ ààbɛ nɛ ghwyil ɛdjek djeeb tak, yɛ di ààbɛ bot bɛmil dhet nɛ bɛmil mɛkam-mɛná nɛ ená (144 000) nadi kɔ bɔs ɔɔ, bot ɛ Mɔn bhata natsik ɔ.

4 Bot binɔk nabɛ ɛ́, bot ɛ nadi ààsaab mɛnyel mɔɔ nɛ mɛzɔ kɔ ɛko ɛ bɔs ɔ, bɛ naabaal mɛnyel mɔɔ tɔ edɛɛ. Bɛ ɛpedu Mɔn bhata é edi djas nyɛ di etɔ́ ɛ. Bɛ naadjɛaa tsik tɔ sama bot ɛ nadi kɔ ɛko ɛ bɔs ɔ, étɛp bɛ needi bot ɛ mɛkɛn aadjɛaa Zɛɛb bɛ nɛ Mɔn bhata ɔ. 5 Bɛ ààwyisal etɛp e etsal tɔ enuub bɔɔ, bɛ tok nɛ ghwyil kwyeselaa ndjɛ sɔs.