1 Sɔ’am Teofil, tɔ mɛkana mam yii ɛsok, mɛ naakaada etɛp e Yezu nasa ɛ, nɛ mɛlyo mɛ nyɛ nalyo é mɛkɛn ɛ, 2 kɛkum dwoo Zɛɛb nasa náá, nyɛ byet tɔ́ tɔ gwoo ɛ. Ɛsok nɛ nyɛ nɛ byet tɔ́ tɔ gwoo, ye nabɛ ɛ́ nyɛ eelik bot ɛ lwoma mɛlyo nɛ ghwyil Sisim na Dɛɛ. 3 Etɛɛ náá, bhii mezuk mɛ nyɛ nazuk gwyɛ ɛ, nyɛ nadidi elelyaal bɛ nyel, étɛp bɛ neemyaal náá, nɛ tsɛɛtsɛ nyɛ ɛ́ nɛ tsik. Mɛlu mɛkam-mɛná, nyɛ nadi elelyaal bɛ nyel, nyɛ nadi elii nɛ nɔɔ kɔ ɛsu ɛ Ɛyoŋ ɛ Zɛɛb. 4 Dhiiti dwoo, nyɛ nadi edɛ edee lɔɔg wat bɛ nɛ bɛnɔɔ, nyɛ eezɛke nɛ nɔɔ náá: «Sa mot ààtseta nɛ ghaada Yeluzalɛm. Bwoodka sa Saagam nakɛk ɛ, sa mɛ nalɛɛ bin ɛ. 5 Etɛɛ náá, Zaŋ Nduuel-bot naduu bot Zɛɛb ɛ́ tɔ mɛdii, yɛ kabɛ biyɔ ɔɔ, tɔ mɛlu mɛ di ezyɛ yenek, bi aaduwa Zɛɛb ɛ́ tɔ ghwyil Sisim na Dɛɛ.»

6 Deenek, bot ɛ nasɛɛga é di wat bɛ nɛ Yezu ɔ boozɛdji nyɛ náá: «Ghɛŋ, yɛ ɛ́ é ɛwala ɛlak ɛ wɔ aagomal ɛyoŋ ɛ Yisalaɛl é?» 7 Yezu eezɛbɔɔza náá: «Dum nɛ tɛp ɛwala, nɛ dwoo lenek, yɛ ààgwyák biyɔ, etɛɛ náá, Saagam naazekoobal yenek nɛ ghwyil’ɛ. 8 Yɛ kabɛ biyɔ ɔɔ, bi ɛ́ waabela boo ghwyil é sok Sisim na Dɛɛ aasul kɔ len ɛ, bi aadi ɛ́ bɛtyaasɛs bam pɛ Yeluzalɛm, pɛ kyee dik Yude nɛ Samaali kɛkum pɛ mɛsik mɛ bɔs.» 9 Bhii Yezu nake deenek ɛ́, nyɛ eezɛbyet tɔ́ tɔ gwoo, bɔɔ djas ebee, wɔ gwaa, eguud zokazɛdipal nyɛ é mis mɔɔ. Yezu eebyet tɔ́ pɛ tɔ gwoo é mis mɛ bɛdjekel bɛ

10 Dáa bɛ nadi egwyák tɔ́ gwoo é sok Yezu nadi ebyet ɛ, é di tak, bot ɛbá nɛ ekaad e na puu eezɛtuula bɛ, 11 bɛ eezɛke nɛ nɔɔ náá: «Bot ɛ Ghalile, étɛp yé bi di egwyɛ é gwyák tɔ gwoo? Yezu yenɔk, mot Zɛɛb zedis nyɛ pak’en, nyɛ tɔ́ tɔ gwoo ɔ, nyɛ aabaazobula ɛ́ dhatyee bi bee nyɛ é byet yenek.»

12 Dáa bɛ nadus pɛ ɛtsok ɛ pyeeb oliv ɛ, bot ɛ lwoma eezɛsik pɛ Yeluzalɛm. Ɛtsok ɛ́ tak natseta nɛ ghaada ɛ, tyee pes ɛwala wat e kyeed mɛko. 13 Dáa bɛ nakum pɛ Yeluzalɛm ɛ, bɛ eezɛni tɔ dhiiti dhɛŋ nadi pɛ ɛko ɛ, ye nabɛ ɛ́ di bɛ nadi ezezyɛ nɛ ɛsɛɛga sok ɔ. Ye nabɛ ɛ́ Pyɛɛd, Zaŋ, Zak, Andele, Filip nɛ Toma, zɛnɔɔ Bhaatelemi, nɛ Matye, Zak mɔn ɛ Alfe, Simɔŋ mot di tɔ ɛdhuu ɛ bot ɛ nadi edjóoaa eZɛlɔt ɔ, zɛnɔɔ Zuud, mɔn ɛ Zak. 14 Bɔɔ djas, bɛ nabɛ ɛ́ nɛ mɛfulu mɛ ɛsesɛɛga é zɛɛga mendjaala bɛ nɛ boa, nɛ Maali nyɛɛg ɛ Yezu, zɛnɔɔ bɔn-nyɛɛg ɛ Yezu esok nɛ esok.

15 Dwoo wat, wɔ gwaa, bot ɛ nadi edum koŋ nɛ Zɛɛb ɔ zokazɛsɛɛga é di wat, mɛtaŋ mɛ bot ɛ tak nabɛ ɛ́ tyee bot dhet nɛ mɛkam-mɛmbá (120). Wɔ gwaa, Pyɛɛd zɛtyaa tetel kuku ɛbwak ɛ lɔɔ, nyɛ eezɛke náá: 16 «Bɔn-nyɛɛg bam, ye nagoka ɛ́ náá, sa Sisim na Dɛɛ naloolɛɛ tɔ Ekwyala e Zɛɛb ɛ́ sael. Pɛ tɔ nuub ɛ Dhavid, nyɛ naaloolii dum nɛ Yudas náá, yɛ ɛ́ Yudas ɛ nadul bot ɛ nazɛmɛt Yezu ɔ. 17 Nyɛ nadi ɛ́ ngɔt tɔ lɔɔg’es, nyɛ nabɛ ɛ́ nyɛ eebela yɛ kyee ɛkɛɛ tɔ lwomel bis nalwomaa ɛ. 18 Deenek, nɛ epata ee bɛ nadjɛ nyɛ, étɛp nyɛ neekɛka Yezu ɛ, nyɛ naabɔm pyeeb. Nyɛ nabɛ ɛ́ nyɛ eeduma si nɛ ɛghet é bɔs, mɔ tii nyɛ, mendja djas pɛ kel. 19 Bot ɛ Yeluzalɛm djas naagwak tɛp tak, é di tak ɛ́ bɛ naget pyeeb tak tɔ lii’ɔɔ "Akɛledama". Ye kwyɛl ɛlɛɛ ɛ́ "pyeeb ghiya".»

20 «Tinaak, beeka sa di kwyala tɔ mɛkana mɛ Mɛdjeeb ɛ:

"Ndjaŋ’ɛ goka nɛ ɛlik ɛ́ wum;

sa dhiiti mot ààlik tɔ tak."

Ye nabaakwyalel ɛ́ náá:

"Da dhiiti mot ɛ́ zɛdjila nyɛ tɔ mɛsa mɛ.*"

21 Ye goka nɛ ɛnɔŋaa ɛ, mot ngɔt tɔ sama bot ɛ nadi egyee mena nɛ bɛnɔɔ é sok mena nadi ekɛka mɛlu djas mena nɛ Ghɛŋ Yezu ɛ, 22 kɛkan dwoo Zaŋ naduu nyɛ Zɛɛb ɛ, kɛyaka nɛ dwoo Zɛɛb nadis nyɛ pak’enaka ɛ. Mot tak aakadi ɛ́ tyaasɛs mena nɛ bɛnɔɔ, étɛp ɛkɛbaŋa nɛ bot náá, Yezu naazegom bhis ɛsyee ɛ lɛ.»

23 Tin, bɛ eezɛlyaal bɛ bot ɛbá: Ye nabɛ ɛ́ Zozɛf, dhiiti din ɛ lɛ nabɛ ɛ́ Bhaalasabhas, nyɛ nabaadi edjóoaa ɛ́ Yustus, zɛnɔɔ Matyas. 24 Bhii tak bot ɛ nadi edum koŋ nɛ Zɛɛb ɔ zokazɛsɛɛga, bɛ moo tin edjaala náá: «Ghɛŋ, wɔy mot di egu ebhum elyem e bot ɔ, lyaala bis mot wɔ tɔ, tɔ sama bot ɛbá bak ɔ, 25 étɛp nyɛ needi ngɔt tɔ sama bot ɛ lwoma, é di mɛsa ɛ Yudas mot lik bis, da tɔ́ yɛ é di di egoka nɛ nɛ ɔ.» 26 Wɔ gwaa, bɛ zɛsa dhiiti ɛgwyeeg, ɛgwyeeg ɛ tak kasɛ́ɛ ɛ́ Matyas. Matyas ɛ́ boozɛni tɔ sama bot ɛ lwoma kam nɛ ngɔt.