Mateus 20

Vanyigendwa mumgunda va misabibu

1 "Ung’achale va kuluhano uwana na munu mwene mgunda va misabibu, yeilavile kuvasindika vanyigendwa mumgunda vake. 2 Akapatine navo kuvahomba sendi yimwi lya madini lya feza kwa kigono, baho akavasindike mumgunda vake va misabibu. 3 Akahegile pamilau lya saa udatu, akavawene vanu vangi vihimile pasoko, vihela kasi. 4 Akawalongile, ‘Mwelele na nyenye mukagite kasi kumgunda vangu va misabibu na nene dandikuvahomba kila kyemwing’ang’wa kuhombwa.’ 5 Suwe, vakahelela, uyo munya mgunda akahega muda va saa sita na saa tisa, akagitile ndeni ndeni. 6 Chipindi cha saa kyumi na imwi palumiye, akahega kangi, akavawene vanu vangi vihimle pala pasoko. Suwe, akavahucha, ‘Wuli muhimile baha kigono kyonda ngajila kugita kasi?’ 7 Vakamuhigile, ‘Kwakuva kwihela munu yeatugavile kasi.’ Mwene akavahigile muhelele na nyenye mukagite kasi mumgunda vangu va misabibu."

8 Pekukiye, yula munya mgunda akamlongiye muhimilicha vake, vakemele vanyigendwa ukavahombe sendi chawo, uvahombe tandi vala va mwiso na kumalila na vala va kwanja. 9 Ndeni, vala vanyigendwa pevakachile chipindi kya palumiye, vakahombilwe kila yumwi sendi yimwi lya madini lya fesa. 10 Vala vakwanja pevafikile, vakali viwocha vipata kuchumba ila yeahombilwe mweyage, ila ata vawo vakahombilwe ndeni ndeni kila yumwi sendi yimwi lya madini lya fesa. 11 Vakachiwanuka sendi chawo vakavanga kumusugwima yula munu munya mgunda. 12 Vakalonga, vanu ava vakagavilwe kasi mumwiso vakagitile kasi kwa muda va lisaa limwi hela, wuli utuhombile ngita avo chipindi nefwe tugitile kasi ngomi na lichuwa likali? 13 "Baho yula munya mgunda akamuhigile yumwi vawo, ‘Mganja sendikanile kukuhomba! Wuli, setukapatine dandikuhomba sendi yimwi lya madini lya fesa kwa kigono? 14 Nyamule mahombo gako na uhelele. Ndikela kumgavila uyu va mwiso ngita pendikugavile veve. 15 Wuli, nene sending’ang’wa kugita kyekyonda kyendisaka kwa sendi changu? Awu ukuniwonela wifu kwakuva nene ndi mnofu?’"

16 Yesu akamalile kwa kulonga, "Ndeni ndeni, yeivecha va mwiso daivecha va kwanja na va kwanja daivecha va mwiso."