Lucas 1

Mbazi yizabikisa mbutukulu yi Yesu

26 Zimi di Elizabeti bu dilungisa ngonda sambanu. Nzambi wufidisa mbazi Ngabileli ku mbanza mosi yi Ngalili yi bakwe tumisinanga ti Nazaleti, 27 ku ndumba yimosi yi nkumbu Maliya yilembolo teka zaba babakala, yi bahaana nsilulu yi makwela ku bakala dimosi diba mu kanda di Davidi, nkumbu andi Yosefi. 28 Mbazi yi yenda kota mu nzo andi na yi muteela ti: «Yangalala kwaku, ngeye tambudi mulemvo mpe Mfumu wu naku.» 29 Maliya wusunsumuka mu mpova bezozo na wukifuula mu zaba: Nkye mpila mbangudulu yi mbote beyoyo e? 30 Kansi, mbazi yi muteela ti: «Maliya, kubandi na bunkuta ko, mu dyambu ti Nzambi wu kuyangaladi. 31 Wuna baka zimi mpe wuna buta mwana wu bakala na wuna muhaana nkumbu yi Yesu. 32 Wuna ba muntu wumfunu na bamutumisina Mwana wu Nzambi Yihyokidi Kuzangama. Mfumu Nzambi wuna muhaana kintinu ki tata andi Davidi, 33 wuna yaala mvimba nzo yi Yakobi na kimfumu kyandi kyaaba na nsukunu ko.» 34 Kansi Maliya wuteela mbazi ti: «Bwedi musamu bewuwu wulendi hidimina, mu dyambu ti naazebi babakala ko e?» 35 Mbazi yi muvutudila ti: «Mpeve Yilongo yina kwiza ku ngeye na lulendo lu Nzambi luna kufuka bonso mposi. Ni hahoho, mwana bewowo wa butuka waaba wulongo, mbo bamutumisina Mwana Nzambi. 36 Tala! Elizabeti mwisi kanda dyaku, yandi mpe weka na zimi mu bununu bwandi. Wuna buta mwana wu bakala. Mpeleko bedi mu tumisinanga ti kisita, kansi bwabu weka mu ngonda yi sambanu. 37 Kunani musamu, Nzambi kalendi lembana.» 38 Maliya wuvutula ti: «Meno kisadi ki Mfumu nidi, biika bu hilama mu meno bonso buwuntedidi!» Mboki Mbazi wuyenda kwandi.