13 Mu kyo kilumbu kwandi, milongoki myole miyenda ku bwala bumosi bu nkumbu Emawusi, wu kitatu na Yelusalemi, mu nyenda yi bilokola byole. 14 Bamokinina mu misamu mimvimba mihyoka koko. 15 Mu ntangu yi bedi kwe mokingi na hekasana zimvutu mu byuhu, Yesu yandi bende wuyiza ha baaba na wedi kwe yenzi ha kimosi nawu. 16 Bamuyena, kansi bedi lembana mu mubakula. 17 Yesu wubafuula ti: «Nkye musamu luna kwe mokini mu nzila e?» Ni batelama na kyadi kyonso. 18 Yandi mosi mu ya babole nkumbu andi Kehopase wumuteela ti: «Mu Yelusalemi yimvimba, nganunu ngeye kwandi lembolo zaba misamu mi hyokidi bilumbu bebibi e?» 19 Wubafuula ti: «Nkye misamu e?» Bamuvutudila ti: «Myo mitadidi Yesu mwisi-Nazaleti! Wubedi mumbikudi wululendo mu nsalulu na mu nzonzolo ha ntadisi yi Nzambi na yi mukangu wumvimba. 20 Zimfumu zinganga-Nzambi na zimfumu zeto zimuyekodi, mwanki zimuzengila lufwa, ni zimukomini ha kulunsi. 21 Yeto tubedi na kivuvu ti yandi waakuula Isaeli. Kansi tuka misamu bemimi mibwidi, kii kyeka ni kilumbu kibitatu. 22 Kansi, mwa ndambu yi bakento mu kabu dyeto batupamuni, bu bayenzi mu mene ku ndyamu, 23 kansi kabayeni nitu andi ko. Bu bavutukidi, batuteedi ti zimbazi zibayenikini na zibateedidi ti Yesu moyo kadi. 24 Mwa ndambu yi bantu ha kati dyeto, bayenda mpe ku ndyamu, bayena mimvimba bonso bakento bateela myo. Kansi yandi bamuyena ko.» 25 Buna wubateela ti: «Kyadi ku yeno lulembolo ba na madyela, mitima myeno mikwe tumbu kwikilanga ko mu myo mimvimba mizonza mimbikudi! 26 Nga bufweni ko ti Klisto kayena mpasi bezozo teekila kakota mu nkembo andi e?» 27 Mboki wubahaana mbangudulu yii mu Masonama mamvimba mi mu tadidi yandi, kutonina ku buuku di Mose natee ku mabuuku ma mimbikudi mimvimba.

28 Bu batuula bela-bela na bwala bu bedi kwenda, Yesu wusa bonso muntu wuna hyoka kwandi. 29 Kansi bamusimbidila, bamuteela ti: «Zakala neto, nkokila ye tula, bwisi mpe bwe yila», wukota mu nzo mu zakala nawu. 30 Bu kazakala nawu ha meza, wubonga dimpa wusakumuna dyo, wubukuna dyo na wubahaana dyo. 31 Mboki meso mawu mazibuka na bamubakula. Ni katumbu zimbala ha ntadisi awu. 32 Bateelasana yawu na yawu ti: «Ni hahoho mu nzila, mitima myeto mibedingi tiya-tiya bu kabedi kwe tuzonzisingi na tubangudidingi masonama e?»

33 Hansi na nsi, batumbu teelama na bavutuka ku Yelusalemi. Bayenda bata milongoki kumi na wumosi bayonzama na bampwanawu. 34 Babateela ti: «Kedika! Mfumu wufulukidi na wuyenikini Simoni!» 35 Milongoki mya mimyole miyala mpolo zi misamu mihyoka mu nzila na bwedi babakudila Yesu bukedi bukuna dimpa.