De Openboarunk von Johanes 14

Daut Laum un de 144,000

1 Un ekj sach, un kjikj, daut Laum opp däm Boajch Zion stonen, un met am hundat-vea-un-vieetich-dusent, dee dän Nomen von sien Voda*14:1 Ooda: sien Nomen un dän Nomen von sien Voda. opp äare Stierns jeschräwen hauden. 2 Un ekj hieed eene Stemm vom Himmel, soo aus daut Ruzhen von väle Wotasch un soo aus de Stemm von grootet Donren. Un de Stemm, waut ekj hieed, wia soo aus von Hoapenspäla, dee opp äare Hoapen spälen. 3 Un see sungen soo aus een nieet Leet ver däm Troon un ver de vea läwendje Tieren un de Eltestasch. Un kjeena kunn daut Leet lieren, buta de hundat-vea-un-vieetich-dusent, dee loosjekoft wieren von de Ieed. 4 Dise sent daut, dee nich met Frues ve-onreinicht wieren, wiels see junkfrulich sent. Dise sent dee, dee daut Laum nofoljen, wuaemma daut hanjeit. Dise wieren loosjekoft von mank de Menschen aus de ieeschte Frucht fa Gott un daut Laum. 5 Un en dee äa Mul wia kjeen Faulschet jefungen; wiels dee sent onen Fäla ver Gott sien Troon.