De Openboarunk von Johanes 19

De Ritta opp een wittet Pieet

11 Un ekj sach dän Himmel opjemoakt, un kjikj, een wittet Pieet, un dee, waut doabowen saut, heet Tru un Woarhauftich, un Hee recht un kjriecht en Jerajchtichkjeit. 12 Un siene Uagen wieren soo aus eene Fiaflaum, un opp sienem Kopp sent väle Kroonen; un Hee haud eenen Nomen jeschräwen, dän kjeena wist, buta Hee selfst. 13 Un Hee wia aunjetrocken met een Kjleet, en Bloot enjedukt, un sien Nomen heet: Daut Wuat Gottes. 14 Un de Armeeen em Himmel foljden Am opp witte Pieed, aunjetrocken en feinet Lienzeich, witt un rein. 15 Un ut sien Mul jeit een schoapet Schwieet, om de Nazionen doamet to schlonen; un Hee woat äant rejieren met eene Iesastang, un Hee klunjt de Wienpras ut met de Wutt un Oaja von Gott, däm Aulmajchtjen. 16 Un Hee haft opp sien Kjleet un opp siene Hoft eenen Nomen jeschräwen: Kjennich von Kjennichs un Har von Haren.

De Enjel en de Sonn

17 Un ekj sach eenen Enjel en de Sonn stonen, un dee schrieech met lude Stemm un säd to aule Väajel, dee medden em Himmel flieejen: Komt un saumelt junt fa dän grooten Gott sien Owentkost, 18 om daut jie muchten fräten daut Fleesch von Kjennichs un daut Fleesch von bowaschte Offizieren un daut Fleesch von Stoakje un daut Fleesch von Pieed un dee doabowen setten un daut Fleesch von aule, beides, Friee un Sklowen, un beides, Kjliene un Groote. 19 Un ekj sach daut Tia un de Kjennichs von de Ieed un äare Armeeen vesaumelt Kjrich to moaken met däm, dee opp daut Pieet sett un met däm siene Armee. 20 Un daut Tia wort jenomen un met am de faulscha Profeet, waut de Wundatieekjens ver am deed, wuamet hee dee vefieed, dee daut Moltieekjen von daut Tia neemen un dee, waut sien Bilt aunbäden; läwendich worden dise beid en dän Fiasee jeschmäten, dee met Schwäwelblitt brent. 21 Un de äwaje worden dootjeschloagen met daut Schwieet, woont ut däm sien Mul kjeem, dee opp daut Pieet saut; un aule Väajel worden saut-jefoodat von dee äa Fleesch.