1 ኣሞጼ ና ኢሳያሳስ ጎዳይ ባቢሎኔ ጊሻስ ቆንጪሲን ኢዚ ቤኢዳይሲ ሃይሳፌ ካሊዛይሳ፤✝

2 ኣይኮይ ባይንዳ ሜላ ዲዛ

ዙምቡላ ቦላ ማላታ ኤሲቴ፤

ኢንቴ ቃላ ቁ

ሂስቲ ዋሲቴ፤

ኢስታ ሹሜታ ፔንጌራ

ጌላና ማላ ማላታ ቤሲቴ።

3 ታ ጾኖን ኡፋዬቲዛይታ

ታ ጌሻታ ኣዛዛዲስ፤

ታ ሃንቆ ኢስቲ ፖላና ማላ

ታ ኦላንቻታ ጼይጋዲስ።

4 ዳሮ ዴሬይ ዎጫሚዛ ማላ

ዙማታ ቦላ ዎጫሚዛ

ዎጫማ ሲዪቴ!

ካዎቴታ ጊዶን

ሜቶቲዳ ዴሬይ

ጉጉሚዛ ጉጉን ሲዪቴ!

ኡባፌ ዎልቃማ

ጎዳይ ኦላንቻታ

ኦላስ ሳልፊሲዴስ።

5 ጎዳይኔ ኢዚ ባ ሃንቆ ፖሊሳናስ

ጎኤቲዛ ሚሻቲ

ቢታ ኡባ ይሳናስ

ሃሆ ቢታፌ

ሳሎታ ጋጻፔ ዪዳ።

6 ጎዳ ጋላሲ

ማቲዳ ጊሻስ ዬኪቴ!

ሄ ጋላስ ኡባ ዳንዳይዛ

ጾሳ ማታፔ ባሺ ያና።✝

7 ሄሳ ጊሻስ ኩሼ ኡባይ ሲላና፤

ኣሳ ኡባ ዎዚናይካ ሴራና።

8 ኢስቲ ሺሮታና፤

ኢስታ ዋዬይኔ ሜቶይ ጋካና፤

ሚጻይ ኦይኪዳ ማጫሳ ማላ

ኢስቲ ሚጻታና፤

ኢሶይ ኢሳራ ዳጋማን ጼሌታና፤

ኢስታ ኣይፌሶይ ዳጋማን

ሻላ ማይኢዴስ።

9 ቤኢቴ ጎዳ ጋላሳይ ሜንጼ ኢታ፤

ቢታ ሜላ ኣሻናስ

ኢዚን ዲዛ ናጋራንቻታ

ይሳናስ ባሻራኔ

ጊታ ሃንቆራ ያና።

10 ሳሎ ጾሊንቴቲኔ

ኢስታ ቡቴቲ ፖኦ ኢሜቴና፤

ኣርሼይ ቡሮ

ሞኪዳ ማላ ማና፤

ኣጊናይካ ባ ፖኦ ኢሙኩ።✝

11 ጎዳይ፥ «ታኒ ኣላሜ

ኢዚ ኢታቴ ጊሻስ

ቃጻያና፤

ኢታታካ ኢስታ

ናጋራ ጊሻስ ቃጻያና።

ታኒ ኦቶራንቻታ

ኦቶሬቴ ሻራና፤

ሜንጼ ኢታታ ኦቶሬቴ

ታ ካዉሻና።

12 ኣቲዳ ኣሳቲ ሙሩታ

ዎርቃፌ ቦላራ ኣልኦ ጊዳና፤

ኦፊሬ ዎርቃፌካ ኣልኦ ጊዳና።

13 ሄሳ ጊሻስ ታኒ ኡባፌ

ዎልቃማ ጎዳይ፥

‹ታኒ ታ ሃንቆ ቆንጪሲዛ ዎዴ

ሳሎ ቃና፤

ሳኣካ ኢዚ ዴኢዛሶን

ኮኮርሳና› ጌስ።

14 ሻንካቲዛዴፌ

ባቃቲዛ ጌኔሳ ማላ፥

ሄሚዛዴይ ባይንዳ

ዶርሳ ዉዴ ማላ፥

ኣሲ ኡባይ

ባ ኣሳኮ ኣሳኮ ሲማና፤

ኢሶይ ኢሶይ ባ ዴሬ ባቃታና።

15 ዲኤቲዳ ኡባይ ጫዴታና፤

ኦይኬቲዳ ኡባይ

ማሻን ሃይቃና።

16 ኢስታ ኣይፌይ ቤኢሺን

ኢስታ ናይታ ቡሳካና፤

ኢስታ ኬቲካ ቦንቄታና፤

ኢስታ ማቼታካ

ሃራይ ጋይታና» ጌስ።

17 ቤኢቴ፥ ቢራስ ዉዱ ጎንታይታ፥

ዎርቃንካ ኡፋዬቶንታይታ

ሜዶኔ ዴሬ ኣሳ

ታ ኢስታ ቦላ ዴንና።

18 ኢስታ ዎንዳፌቲ ዎዳላታ ዉርሳና፤

ቄሪ ናይታካ ማሬቴና፤

ኢስታ ዎዚናይካ

ናይታስ ሚሼቴና።

19 ካዎቴታስ ቦንቾ፥

ካላዳዌታስ

ጬቆ ጊዲዳ ባቢሎኔ

ጎዳይ ሶዶሜ ማላኔ

ጋሞራ ማላ ኢዞ ሺሪ ዬጋና።✝

20 ሄ ቢታን ሙሌካ ኣሲ ዴኤና፤

ኢዚን ኡቲዛ ኣሲካ ዴና፤

ኣራቤ ኣሲካ ሄን

ባ ዱንካኔ ቶኬና፤

ሜሄ ሄሚዛይቲካ

ባንታ ዉዴ

ሄን ሼምፒሴቴና።

21 ጊዶ ኣቲን ባዞ ዶኣቲ

ሄን ኢቻና፤

ኢዚ ኬን ዎራካናቲ ኩማና፤

ሄን ጉቶቲ ዴኣና፤

ባዞን ዴይሽ ሚሳቲዛ

ዳይዳንቲ

ኢዚ ቦላ ጉፓና።✝

22 ኢዚ ሚጻን ጎዳሬቲ ዋሳና፤

ሎኢዛ ኢዚ ካዎቴ

ኬንካ

ዎራካናቲ ዋሳና፤

ኢዚ ዎዴይ ማቲዴስ፤

ኢዚ ጋላሳይካ ኣዱቄና።