ኢሳያሳ ቲንቢቴ 5

ዎይኔ ቶኪዛ ጋዴ ጊሻስ ዮቴቲዳ ጊንጾ

1 ታኒ ታ ሲቆ ላጌዛ ጊሻሲኔ

ኢዛ ዎይኔ ቱራ

ቶኪዛሶሆ ጊሻስ

ሲቆ ማዛሙሬ ዬጻና።

ታኒ ሲቂዛ ላጌዛስ

ኣራዳ ዙምቡላን

ዎይኔ ቱራ ቶኪዛሶሆይ ዴስ።

2 ቢታ ቦኪዲ፥

ሹቻ ቆሪ ኬሲዲ፥

ኡባፌ ሎኢዛ

ዎይኔ ቱራ ቶኪዴስ፤

ሂስቲዲ ኢዛ ናጋናስ

ሻኮ ጊግሲዴስ፤

ዎይኔ ኡሹ ጉምኢዛሶሆ

ኦላ ቦኪ ጊግሲዴስ።

ሄሳፌ ጉዬ ሎኦ ኣይፌ ኣይፋና

ጊዲ ናጊዴስ፤

ጊዶ ኣቲን ጫላ ጳንቂዳ

ኣይፌ ኣይፊዴስ።✝5፡1-2 ማቶ 21፡33፤ ማር 12፡1

3 ሂስቲን ታ ሲቆይ፥

«ኢንቴኖ ዬሩሳላሜን

ዴኢዛይቶ!

ኢንቴኖ ዩሁዳ ኣሳቶ!

ታፔኔ ታ ዎይኔ ቱራ

ቶኪዛ ሶሆዛፔ ጊዶን

ዴኢዛ ዮኦዛ

ኣኔ ሃኢ ኢንቴ ፒርዲቴ።

4 ታኒ ታ ዎይኔ ቱራ

ሶሆዛሲ ኦዳይሳፌ

ሃራ ኣይ ኦናይሲ ኣቲዴ?

ኢዚ ሎኦ ኣይፌ ኣይፋና ጋዳ

ታ ናጊሺን ኣይስ ጫላ ጳንቂዳ

ኣይፌ ኣይፊዴ?

5 ሃኢ ታኒ ታ ዎይኔ

ቶኪዛ ጋዴዛ ቦላ

ኦናዝ ኢንቴስ ዮታይስ።

ዲርሳ ሾዳና፤

ኢዚካ ያና ማላ ኦና፤

ታኒ ጊምቤዛ ላላና፤

ሄ ሶሆይካ ዱሬታና።

6 ታኒ ሄ ሶሆዛ

ማጎ ቢታ ኦና።

ሄ ቱራይ ጹንቄቴናኔ

ቡልኤቴና፤

ሂስቲን ኪንዲቾይኔ

ኣጉን ኢዛን ሞካና።

ኢራይ ኢዛን ቡኮንታ ማላ፥

ታኒ ሻራታ ኣዛዛና» ጊዴስ።

7 ኡባፌ ዎልቃማ

ጎዳ ዎይኔ ቶኪዛ ጋዴይ

ኢስራኤሌ ኣሳ።

ዩሁዳ ኣሳይ

ኢዚ ኡፋዬቲዛ ኣታኪልቴ።

ኢስቲ ሱሬ ፒርዳ ፒርዳና

ጊዲ ናጊዴስ፤

ጊዶ ኣቲን

ሱ ጉሲሺን ቤዪዴስ።

ኢዚ ጺሎቴ ኮዪዴስ፤

ጊዶ ኣቲን ሜቶ ዋሶ ሲዪዴስ።

8 ሃራታስ ሶሆይ

ያናሼ ጋካናስ፥

ኬ ኬ ቦላ ጉጂዛይቶ!

ጋዴ ጋዴራ ጋ ኦይዲ፥

ኢንቴርካ ጻላ ቢታ ቦላ

ኣኪ ዴኢዛይቶ!

ኢንቴስ ኣዬ ኣና!

9 ኡባፌ ዎልቃማ ጎዳይ

ታኒ ታ ሃይራ ሲዪሺን፥

«ጊታ ኬቲ ካይዚ ኣታና፤

ሄ ሎኦ ኬታን ዴኣናስ

ኣሲ ያና።

10 ታሙ ዋጻ ቦራታን

ቶኪዳ ዎይኔ ኣይፌፔ

ኢሲ ኦቶ ጊዲዛ ዎይኔ

ኡሺ ጻላ ኬኣና፤

ታሙ ቁንኣ ካ ዜሪን

ኢሲ ቁንኣ ካ

ጻላ ኣይፋና» ጊዴስ።

11 ማሲዛ ኡሹ ኮያናስ

ማላዶ ጉራራ ዴንዲዲ

ዎይኔ ኡሻን

ጹጌታና ጋካናስ፥

ሳኣ ቃሚሲዛይታስ ኣዬ ኣና!

12 ኢስታ ጊቢራሶሆን ማሲንቆይ፥

ዲ፥ ካራቤይ፥ ሱሱልኤይኔ

ዎይኔ ኡሺ ዴስ፤

ጊዶ ኣቲን

ኢስቲ ጎዳ ኦሶዛስ

ዉዴቲቤቴና፤

ኢዚ ባ ኩሼን ኦዳ

ኦሶካ ቦንቺቤቴና።

13 ሂስቲን ታ ዴሬይ

ኣኬካ ይዳ ጊሻስ

ዲኤቲ ባና፤

ኢስታ ሹሜቲ ኮሻን ሃይቃና፤

ኢስታ ዴሬ ኣሳይካ

ሃ ሳሞን

ጹጌቲ ሃይቃና።

14 ዱፎይ ባ ጎምፓ ኣሳዱስ፤

ባ ዶናካ

ዛዋፔ ቦላራ ዶያዱስ፤

ዬሩሳላሜን ዴኢዛ

ጊታ ኣሳቲኔ

ሃንኮ ዴሬይ፥ ዎጫሚዛይታኔ

ጉፒዛይታ ኢሲ ቦላ ሚታና።

15 ኣሲ ኡባይ ቶሼታናኔ

ካዉያና፤

ኦቶራንቻቲ ኡባይ ዬላታና።

16 ጊዶ ኣቲን ኡባፌ

ዎልቃማ ጎዳይ፥

ሱሬ ፒርዳን

ቁ ቁ ጋና፤

ጌሻ ጾሳይ

ባ ጌሻቴ

ባ ጺሎቴን ቤሳና።

17 ሄ ዎዴ ዶርሳቲ

ባንታ ቆሮን

ሄሜቲዛ ማላ ሄሜታና፤

ዶርሳ ላቃቲ ላሌቲዳ ዱሬታ

ኬታ ሶሆን ማታ ማና።

18 ጪሞ ዎዶሮን ናጋራ

ጎቺዛይታስ፥

ፓራ-ጋሬ ዎዶሮን ኢታቴ

ጎቺዛይታስ ኣዬ ኣና!

19 «ኑኒ ኑ ኣይፌራ ቤኣና ማላ

ኣኔ ጾሲ ኤሌሎ!

ባ ኦሶካ ኤሶሶ!

ኑኒ ኤራና ማላ

ኢስራኤሌ ጌሻይ

ቆፒዳ ቆፋይ

ማታን ፖሌቶ»

ጊዛይታስ ኣዬ ኣና!

20 ኢታ ሎኦ፥ ሎኦዛ ኢታ ጊዛይታስ፥

ማ ፖኦ

ፖኦዛ ማ ኦዛይታሲኔ

ጫሚዛይሳ ማልኦ፥

ማልኢዛይሳ ጫሞ

ኦዛይታስ ኣዬ ኣና!

21 ባንታና ባርካ፥

«ታኒ ኣ ኤራንቻ!

ታኒ ቃራ ጊዲኪና!»

ጊ ቆፒዛይታስ ኣዬ ኣና!

22 ዎይኔ ኡሻን ኤሬቲዳይታሲኔ

ማሲዛ ኡሹ ዋላካናስ

ጎቢዛይታስ ኣዬ ኣና!

23 ማታኤ ኤኪዲ፥

ሞራንቻታ

ጺሊሲዛይታሲኔ

ጺሎ ኣሳታሲ ሱሬ ፒርዳ

ዲጊዛይታስ ኣዬ ኣና!

24 ኢስቲ ኡባፌ ዎልቃማ ጎዳ

ዎጋ ኢጺዳ ጊሻስ፥

ኢስራኤሌ ጌሻ ቃላካ

ካዳ ጊሻስ፥

ታማ ላጮይ

ቡጻ ኦይኪዛ ማላኔ

ሜላ ማታይ ኤጺ ይዛ ማላ

ኢስታ ጻጶይ ዎቃና፤

ኢስታ ጪሻይካ ቡሄ ማላ

ላሌቲ ያና፤

25 ጎዳ ሃንቆይ ኢዛ ዴራ ቦላ

ኤጺ ኬኢዴስ፤

ኢዚ ባ ኩሼ ዴንዲ

ኢስታ ሾጪዴስ።

ዙማቲ ቃጺዳ፤

ሃይቂዳ ኣሳ ኣሃይ

ኦጌ ቦላ ፒቲ ዬጊዳ

ቡራ ማላ ጊዲዴስ፤

ሂስቲ ፔኢንካ

ኢዛ ሃንቆይ ሲሚቤና፤

ኢዛ ኩሼይ ሃኢካ

ዴንዲዳ ማላ ዴስ።

26 ጎዳይ ሃኮን ዴኢዛ

ካዎቴታስ

ማላታ ቃን ኤሴስ፤

ሳኣ ጋጻን ዴኢዛ

ሞርኬታስካ ዋይቄስ፤

ኢስቲካ ኤሶን ቢቻሪሼ

ፑቱ ጋና።

27 ኢስታ ጊዶን ዳቡራንቻይኔ

ዎቤይ ዴና፤

ኢስታፌ ኢሶይኔ

ስኬናኔ ኢቼና።

ጼሳን ጊጺዳ ቃባቶይካ

ቢርሼቴና፤

ኢስታ ጫማ ዳፎይካ

ዱጼና።

28 ኢስታ ዪሻይ ሆጼ፤

ኢስታ ዎንዳፌይካ

ዋጼቲ ኡቲዴስ።

ኢስታ ፓራታ ቂንጫፊሌይ

ዛላ ሹቻ ማላ፤

ኢስታ ፓራ-ጋሬታ ኤርዞይካ

ጎቴ ማላ።

29 ኢስታ ጻጎይካ

ጋሞ ጻጎ ማላ፤

ዎዳላ ጋሞታ ማላ

ጻጌቴስ፤

ባንታስ ሚዛ ሚሽ

ሻንካቲ ኦይኪዲ ጻጌቴስ፤

ኢስቲ ኦይኪዳይሳ

ቶኪ ኤኪ ቤቴስ፤

ኢስታፌ ዎ ኤካናይ

ኦኒካ ዴና።

30 ሄ ጋላስ ኢስቲ

ጊታ ኣባ ዳምባላ ማላ፥

ኢስራኤሌ ቦላ ጉማና፤

ኦኒካ ዱጌ ዛሪ

ቢታ ጼሊኮ

ማኔ ሜቶ ቤኣና፤

ፖኦይካ ሻራን ካሜታና።