ኢሳያሳ ቲንቢቴ 52

ጾሳይ ዬሩሳላሜ ኣሻና

1 ሃኔ ጺዮኔ ዴንዳ፤ ዴንዳ፤

ዎልቃ ማይኣ፤

ጌሻ ካታማዬ

ዬሩሳላሜ!

ኔ ቦንቾ ማይኦ ማይኣ፤

ሃይሳፌ ጉዬ ቃጻሬቶንታይኔ

ቱናይ ኔ ጊዶ ጌሌና።✝52፡1 ኣጁ 21፡2፥27

2 ሃኔ ዬሩሳላሜ፥ ዴንዳ፤

ጉዱላ ፒታ፤ ኔ ኣራታን ኡታ።

ዲኤቲዳ ጺዮኔ ናዬ፥

ኔ ቆን ቃሼቲዳ

ሳንሳላታ ኬሳ ዬጋ።

3 ጎዳይ፥ «ኢንቴ ጮ

ሃዳ ባይዜቲዴታ፤

ሃኢካ ሚሺ ባይንዳ

ጮ ኢንቴ ዎዜታና» ጌስ።

4 ኡባ ሃሪዛ ጎዳይ፥

«ኮይሮ ታ ዴሬይ ዴኣናስ

ዱጌ ጊብጼ ዎዴስ፤

ጉዬፔ ኣሶሬይ ጋሶይካ ባይንዳ

ኡንኤ ሃሪዴስ።

5 ‹ሂስቲን ታ ዴሬይ

ጋሶይካ ባይንዳ

ዲኤቲ ቢቺን

ታስ ሃን ኣዚ ዲዜ?›

ኢስታ ሃሪዳይቲ

ኢስታ ቦላ ቂልጪዳ፤

ጋላስ ኩሜ ታ ሱን

ፓጬይ ባይንዳ ጫዬቴስ።✝52፡5 ኦሮ 2፡24

6 ሄሳ ጊሻስ ታ ዴሬይ

ታ ሱን ኤራና፤

ሄ ጋላስ ካሴካ ዮቲዳይ

ታና ጊዲዳይሳ ኢስቲ ኤራና።

ኤ ሄሲ ታና» ጌስ።

7 ዙማ ቦላ ኤቂዳ ቶሆቲ፥

ሚሺራቾ ኤኪ ዪዛ ቶሆቲ፥

ሳሮቴ ዮቲዛይቲ፥

ሎኦ ሚሺራቾ ዮቲዛይቲ፥

ኣቶቴ ኣዋጂዛይቲ፥

ጺዮኖካ፥

«ኔ ጾሳይ ካዎቲዴስ»

ጊዛ ቶሆቲ ኣይ ማላ ሎኦ!✝52፡7 ናሆ 1፡15፤ ኦሮ 10፡15፤ ኤፌ 6፡15

8 ሃኔ ሲያ! ኔና ናጊይዛይቲ

ባንታ ቃላ ቁ ሂስቲዳ።

ኢሲ ቦላ ኢሊሊሼ ዬጼቴስ፤

ጎዳይ ጺዮኔ ሲሚዛ ዎዴ፥

ኢስቲ ኢዛ

ባንታ ኣይፌራ ቤኣና።

9 ኢንቴኖ ዬሩሳላሜን

ቆሌቲዳ ሶሆቶ!

ኢንቴ ኢሲ ቦላ ኢሊሊሳን ዬጺቴ፤

ጎዳይ ባ ዴራ ሚንዴስ፤

ዬሩሳላሜ ካታማካ ዎዚዴስ።

10 ጎዳይ ባ ጌሻ ቄሳ

ካዎቴታ ኡባ

ሲንን ቆንጪሳና፤

ቃሴ ቢታ ጋጻን ዲዛ ኡባይካ

ኑ ጾሳ ኣቶቴ ቤኣና።

11 ኢንቴኖ ጎዳ ኬ

ሚሻታ ቶኪዛይቶ!

ሻኬቲቴ፥ ሻኬቲቴ፤

ሄፔ ኬዚቴ።

ቱና ሚሽ ቦቾፍቴ፤

ሄፔ ኬዚቴ፤

ኢንቴ ሁኤሲካ ጌይቴ።✝52፡11 2ቆሮ 6፡17

12 ጊዲኮካ ኤሶን ኬዜኬታ፤

ዎይኮ ቤቲ ቤኬታ፤

ጎዳይ ኢንቴፌ ሲን ኣዲ

ኢንቴና ካሌና፤

ኢስራኤሌ ጾሳይካ

ጉዬራ ኢንቴና ናጋና።

ሜቶይ ኢዛ ጋኪዛ ኦሳንቻ

13 ጎዳይ፥ «ቤኢቴ፥

ታ ኣሽካራይ ኣኬካን ኦና፤

ኢዚ ኤሬቲዳዴ ጊዳና፥

ኢዚ ቁ ቁ ጋና፤

ኢዚ ኬሂ ቦንቼታና።

14 ዳሮ ኣሳይ ኢዛን

ዳጋማናሼ ጋካናስ

ኣስ ኡባፌ ቆሄቲዳ ጊሻስ

ኢዛ ሜይ

ኣሳ ሜፔ ላሜቲዴስ።

15 ሄሳ ጊሻስ ኢዚ

ዳሮ ካዎቴታ ማላሊሳና፤

ኢዛ ጋሶን ካዎቴቲ

ባንታ ዶና ኦይካና፤

ኢስታስ ዮቴቶንታይሳ

ኢስቲ ቤኣና፤

ኢስቲ ሲዪ ኤሮንታ

ሚሽ ኣኬካና» ጌስ።✝52፡15 ኦሮ 15፡21