ናጋራ ማሬቴኔ ዎዜቴ
1 ሄኮ ጎዳ ኩሼይ ኢንቴና
ኣሻናስ ቃሚቤና፤
ኢዛ ሃይ
ሲያናፔ ቱሊቤና።
2 ጊዶ ኣቲን ኢንቴ ቆሆይ ኢንቴና
ኢንቴ ጾሳፌ ሻኪዴስ፤
ኢንቴ ናጋራይ ኢዛ ኣይፌሶ
ኢንቴፌ ጌንዴስ።
ሄሳ ጊሻስ ኢዚ ሲዬና።
3 ኢንቴ ኩሼይ ሱን፥
ኢንቴ ቢራይካ
ቆሆን ሙሌቲዴስ፤
ኢንቴ ዶናይ ዎርዶ ሃሳይዴስ፤
ኢንጻርሳቲ ኢታ ዮኦ ሲሲዳ።
4 ጺሎቴን ሞቲዛይ ባዋ፤
ቱማቴን ፒርዲዛይ
ኦኒካ ዴና።
ሃዳ ዮኦን ኣማኔቴቴስ፤
ዎርዶ ሃሳዬቴስ፤
ሺሮ ቃንቲዲ ኢታቴ ዬሊዳ።
5 ኢስቲ ሾሻ
ጱጱሌ ሃጵዳ፤
ኣቻሮ ኬ ኬጺዳ፤
ኢስታ ጱጱሌታ
ሚዛ ኣሲ ሃይቄስ፤
ኢስታፌ ኢሶይ ሜቂኮ
ፑኪዛ ሾሺ ኬዜስ።
6 ኢስታ ቃጪናይ ማይኦ ጊዴና፤
ኢስቲ ኦዳይሳን ባንታ ቦላ
ካማና ዳንዳዬቴና፤
ኢስታ ኦሶይ ኢታ፤
ኢስታ ኩሼታን
ማካላ ኦሶይ ኩሚዴስ።
7 ኢስታ ቶሆቲ ናጋራኮ ዎጼቴስ፤
ጺሎ ሱ ጉሳናስ ኤሶቴቴስ፤
ኢስቲ ኢታ ቆፋ ቆፔቴስ።
ባሺኔ ቆሆይ
ኢስቲ ኣዳ ኦጌ ኡባስ ማላታ።
8 ኢስቲ ሳሮቴ ኦጌ ኤሬቴና፤
ኢስቲ ቢዛ ኦጌን
ሱሬ ፒርዳይ ባዋ፤
ኢስቲ ባንታ ኦጌ ጌላሲዳ፤
ሄ ኦጌራ ቢዛይ ሳሮ ዴሜና።59፡7-8 ኦሮ 3፡15-17
9 ሄሳ ጊሻስ ሱሬ ፒርዳይ ኑፔ ሃኪዴስ፤
ጺሎቴካ ኑኮ ጋኬና።
ኑኒ ፖኦ ኮዪዶስ፤
ጊዶ ኣቲን ኡባይ ማ ጊዲዴስ፤
ዋጋጋ ፖኦ ኮዪዶስ፤
ጊዶ ኣቲን ሳካና
ማ ጊዲዴስ።
10 ቆቄ ማላ
ጊምቤዛ ቦላ ጋንዲጋርዶስ።
ኑ ሄሜታይ ኣይፌይ ባይንዳ
ኣሳ ማላ ታታፌቴ ጊዲዴስ፤
ኣርሼይ ዉሊሺን ሃኒዛ
ሴታ ጋላስ ጴቲዶስ።
ቃሴ ሚኖ ኣሳታ ጊዶን ኑኒ
ሃይቂዳ ኣሳ ማላ ጊዲዶስ።
11 ኑኒ ኡባይ ዛርዶ ማላ ላዎስ፤
ሃራጴታ ማላካ
ጬጪሼ ጉጉሞስ፤
ኑኒ ሱሬ ፒርዳ ኮዪዶስ፤
ጊዶ ኣቲን ዴሚቤኮ፤
ኣታና ኮዪዶስ፤
ጊዶ ኣቲን ኢዚ ኑፔ ሃኪዴስ።
12 ጋሶይካ ኑ ቆሆይ
ኔ ሲንን ዳሪዴስ፤
ኑ ናጋራይካ
ኑ ቦላ ማርካቲዴስ።
ኑ ሞሮይ ኑፔ
ሻኬቲቤና፤
ኑ ማካላቴካ
ኑኒ ኤሮስ።
13 ኑኒ ጎዳ ቦላ ማካሊዲ
ዎርዶ ሃሳይዶስ፤
ኑ ጾሳ ካሎ ኣጊዲ
ሼርኢ ጊዶስ፤
ማካላቴኔ
ጌኔ ዮኦ ሃሳይዶስ።
ኑ ዎዚናይ ሻሪ ኡቲዳ
ዎርዶ ሃሳይዶስ።
14 ሄሳ ጊሻስ ሱሬ ፒርዳይ
ጉዬ ሱጌቲዴስ፤
ጺሎቴካ ኑፔ ሃኪዴስ፤
ቱማቴ ኦጌ ቦላ
ጴቲዴስ፤
ሱሬቴካ ጌላናስ
ዳንዳይቤና።
15 ቱማቴ ኣዋንካ ቤቴና፤
ኢታቴፌ ሃኪዛይ
ቆሄቴስ፤
ጎዳይ ቤኢዲ ሱሬ ፒርዳይ
ይዳ ጊሻስ ጬጪዴስ።
16 ኦኒካ ባይንዳይሳ ቤኢዴስ፤
ኢዛኮ ጋናቲዛይ ባይንዳይሳ
ቤኢዲ ማላሌቲዴስ፤
ሄሳ ጊሻስ ኢዛ ቄሴይ
ኢዛስ ኣቶቴ ኤሂዴስ፤
ኢዛ ጺሎቴ ኢዛ ካፊ ኦይኪዴስ።59፡16 ኢሳ 63፡5
17 ኢዚ ጺሎቴ ጹሩሬ ማላ
ቲራን ማይኢዴስ፤
ኣቶቴ ቢራታ ቆቤ ማላ
ባ ሁኤ ቦላ ዎዴስ።
ማይኦ ጋርሳራ ማይኢዛ ማላ
ሃሎ ኬሶ ማይኢዴስ፤
ማይኦ ጎጲ ማይኢዛ ማላ
ቃናቴ ቦላራ ጎጲዴስ።59፡17 ኤፌ 6፡14፥17፤ 1ታሶ 5፡8
18 ኢስታ ኦሶ ማላ
ሃንቆ ባ ባልጋራታስ፥
ፒርዳ ባ ሞርኬታስ ኢዚ ቃንጻና።
ሃሩሮ ቢታታስ ኢስታ
ኦሶ ኦሶ ማላ ኢማና።
19 ጎዳ ፔኖይ ሱጊ ኤኪ ቢዛ
ዎልቃማ ዲኦ ማላ ያና።
ሄሳ ጊሻስ ኣርሼይ
ዉሊዛ ባጋራ ዲዛይቲ
ጎዳ ሱንስ ያያና፤
ኣርሼይ ሞኪዛ ባጋራ ዲዛይቲ
ኢዛ ቦንቾስ ሃሬታና።
20 ጎዳይ፥ «ዎዚዛዴይ ጺዮኔሲኔ
ያቆቤ ዛሬታን ባንታ ናጋራ
ፓጺዳይታኮ ያና» ጌስ።59፡20 ኦሮ 11፡26
21 ቃሴካ ጎዳይ፥ «ታ ባጋራ ታሲኔ ኢስታስ ዲዛ ጫቆ ቃላይ ሃይሳ፤ ኢንቴ ቦላ ዲዛ ታ ኣያናይኔ ታኒ ኢንቴ ዶናን ዎዳ ታ ቃላይ ሃቺፌ ዶሚዲ ሜርና ጋካናስ፥ ኢንቴ ዶናፔ፥ ኢንቴ ናይታ ዶናፔኔ ኢንቴ ዜሬ ዶናፔ ሻኬቴና» ጌስ።