1 ሄ ዎዴ ካዎ ሂዝቂያሲ ሃርጊዲ፥ ሃይቃና ማቲዴስ። ሂስቲን ኣሞጼ ና ናቤ ኢሳያሲ ኢዛኮ ቢዲ፥ «ጎዳይ ኔና፥ ‹ኔኒ ሃይቃናፔ ኣቲን ሃርጌዛፔ ፓጻካ፤ ሄሳ ጊሻስ ኔ ኬ ጊጊሳ› ጌስ» ጊዴስ።

2 ሂስቲን ሂዝቂያሲ ኬ ጎዳኮ ሲሚዲ ጎዳ ዎሲዴስ። 3 ዎሲሼ፥ «ኣቤት ጎዳዉ፥ ታኒ ኔ ሲንን ኣማኔቴኒኔ ኩሜ ዎዚናፔ ኔና ኡፋይሲዛ ሚሽ ኦሼ ታ ዋና ዴኢዳኮ ኔኒ ኣኬካና ማላ ታኒ ኔና ዎሳይስ» ጊ ዎሲዴስ፤ ሂዝቂያሲካ ኬሂ ጫሞ ዬሆ ዬኪዴስ።

4 ሄሳፌ ጉዬ ጎዳ ቃላይ ኢሳያሳኮ ዪዴስ። 5 ሂስቲዲ፥ «ኔኒ ባዳ ሂዝቂያሳ፥ ‹ጎዳይ ኔ ኣዋ ዳዊቴ ጾሳይ፥ ታኒ ኔ ዎሳ ሲያዲስ፤ ኔ ኣፉንካ ቤኣዲስ። ኔ ላይ ቦላ ታኒ ኔስ ታማኔ ኢቻሹ ላይ ጉጃና። 6 ኔናኔ ሃ ካታማዮ ኣሶሬ ቢታ ካዎዛ ኩሼፔ ኣሻና፤ ታኒ ሃ ካታማይ ቦላ ዪዛይሳ ቴቃና› ጌስ» ጊዴስ።

7 ኢሳያሲ ጉጂዲካ፥ «ጎዳይ ኔስ ጊዳ ቃላ ፖላናይሳስ ማላታይ ሃይሳፌ ካሊዛይሳ፤ 8 ቤያ፥ ኣካዜይ ፑዴ ኬኣናስ ጊግሲዳ ኬቻታ ቦላ ዎዛ ኣዋ ኩዋይ ታሙ ኬች ጉዬ ሲሚ ባና ማላ ታኒ ኦና» ጊዴስ። ሂስቲን ኩዋይ ታሙ ኬች ጉዬ ሲሚዲ ቢዴስ።

9 ዩሁዳ ካዎ ሂዝቂያሲ ሃርጊ ፓጺዳፔ ጉዬን ጻፊዳ ቃላይ ሃይሳፌ ካሊዛይሳ፤ 10 ታኒ፥ «ታ ዴኦ ላይስ ቡሮን ባጋ ጋኪዛ ዎዴ፥ ሃይቆ ፔንጌራ ጌላና ቤሲዜ? ታስ ኣቲዳ ላይይ ታፔ ቦንቄታናስ ቤሲዜ?» ጋዲስ።

11 ቃሴካ፥ «ታኒ ሼምፖራ ፓጻ

ዴኢዛይታ ቢታን

ኔና ጎዳ ዛራ ቤኢኬ፤

ሃይሳፌ ጉዬን

ታ ኣሳ ዜሬ ቤኢኬ፤

ሃ ሳኣን ዴኢዛይታ

ጊዶንካ ዴኢኬ።

12 ታ ኬ ሄንንቻታ

ዱንካኔ ማላ ሾዴቲዴስ፤

ታፔካ ኤኬቲዴስ፤

ሼማኔይ ኣፋላ ዎንዲራሼን

ጻጺዛ ማላ፥

ታኒ ታ ዴኦ ጻጻዲስ፤

ኢዚካ ታና ዎንዲራሼፔ

ዱዴስ።

ማላዶፔ ኦማርስ ጋካናስ፥

ኔኒ ታና ይሳናስ ኤሶታዳሳ።

13 ሳኣይ ዎንታና ጋካናስ

ታኒ ኔና ዳንዳያን ናጋዲስ፤

ጊዶ ኣቲን ጋሞ

ማላ ኢዚ

ታ ሜቄ ኡባ ሜንሬዴስ።

ቃሴ ማላዶፔ ኦማርሲ ጋካናስ

ኔኒ ታና ይሳናስ

ኤሶታዳሳ።

14 ታኒ ጪራሻኔ

ሃ ካፎ ማላ ዋሳዲስ፤

ሃራጴ ማላካ ጉጉማዲስ።

ታ ኣይፌቲ ፑዴ ሳሎ

ጼሊዲ ዳቡርዳ።

ኣቤት ጎዳዉ፥ ታኒ ኡንኤታዲስ፤

ኔኒ ታና ሃኒፌ ኬሳ!» ጋዲስ።

15 ሂስቲን ታ ኣይ ጋኔ?

ኢዚ ባ ሁኤራ ታስ ዮቲዴስ፤

ቃሴካ ባ ሁኤራ

ሃይሳ ኦዴስ፤

ታ ሼምፖያ

ኬሂፔ ጬጪዳ ጊሻስ፥

ታ ዴኦ ላይ ኡባን

ኣሽኬቴን ባና።

16 ኣቤት ጎዳዉ ሄይታንታ ማላ

ዮኦታን ኣሳይ ፓጻ ዴስ።

ታ ኣያናይካ ሄይታንታን

ዴኦ ዴማና።

ኔ ታና ፓዳሳ፥

ታና ሼምፖራ ፓጻ ዎዳሳ!

17 ሄኮ ታ ሜቶን ጬጪዳይሲ

ታስ ጎኣስ ጊዲዴስ።

ኔኒ ታ ሼምፖ ባሻ ኦላፌ

ኔ ሲቆን ናጋዳሳ፤

ኔኒ ታ ናጋራ ኡባ

ኔፔ ጉዬ ዛራዳ ኦላዳሳ።

18 ዱፎይ ኔና ጋላቴና፤

ሃይቆይካ ኔና ሳቤና።

ዱጌ ኦላን ዎዛይቲ

ኔ ኣማኔቴ ሂዶታ ኦሴቴና።

19 ታኒ ሃች ኔና ጋላቲዛይሳ ማላ

ሼምፖራ ፓጻ ዴኢዛይቲ ጻላ

ኔና ጋላታና፤

ኔ ኣማኔቴ ጊሻስ

ኣዋቲ ባ ናይታስ ዮቴቴስ።

20 ጎዳይ ታና ኣሻና፤

ሄሳ ጊሻስ ኑኒ

ኑ ዴኢዛ ላይታ ኡባን፥

ጎዳ ኬን

ዋጼቲዳ ዲን ዬጻና።

21 ኢሳያሲ ካሴ፥ «ባላሴ ሚ ኣይፌ ዳጺዲ፥ ኢዛ ኪጻ ቦላ ዎቴ። ሂስቲኮ ኢዚ ፓጻና»

ጊ ዎዴስ።

22 ሂዝቂያሲካ፥ «ታኒ ፓጻዳ ጎዳ ኬ ፑዴ ኬዛናይሳስ ማላታይ ኣዜ?» ጊዲ ኢሳያሳ ኦይቺ ዎዴስ።