ኢስራኤሌ ናጋራኔ ጾሳ ኣይሌ ኣዛዜቴ
1 ጎዳይ፥ «ታኒ ኢንቴ ኣዮ
ኣንጃ ዬዲዳ ዋራቃታይ
ኣዋን ዲዜ?
ዎይኮ ታ ኢንቴና
ኣይ ታልኣ ኤኪዳዴስ ባይዛዲና?
ቤኢቴ ኢንቴ ኢንቴ
ናጋራ ጊሻስ ባይዜቲዴታ፤
ኢንቴ ሞሮ ጊሻስ
ኢንቴ ኣያ ኣንጄታ ባዱስ።
2 ታኒ ዪዛ ዎዴ ሄን
ኣሲ ኣይስ ይዴ?
ታ ጼይጊዛ ዎዴ
ዛሮ ኢሚዛ ኣሲ
ሄን ዋኒ ይዴ?
ኢንቴና ዎዛና ሚሽ ጪጋናስ
ታ ኩሼይ ቃማዴ?
ዎይኮ ኢንቴና ኣሻናስ
ታስ ዎልቃይ ጉ?
ቤኢቴ ታ ሃንቆን
ኣባ ሜሊሳይስ፤
ሻፋታካ ባዞ ኬሳይስ
ኢስታን ዲዛ ሞሌቲ
ሳሞን ሃይቂዲ ዜቄቴስ።
3 ታኒ ሳሎ ሚሳና፤
ታኒ ኢዛ ማቃ ማይዛና» ጌስ።
4 ኡባ ሃሪዛ ጎዳይ ታስ
ኢንጻርሳ ኤራቴ ኢሚዴስ፤
ሄሳ ጊሻስ ዳቡራንቻታስ
ታ ኣይ ጋና ቤሲዛኮ ታ ኤራይስ፤
ማላዶ ማላዶ
ታና ቤጎስ፤
ታማርሼ ዲዛ ታማሬ ማላ
ሲያናስ ታ ሃይ ዶዬስ።
5 ኡባ ሃሪዛ ጎዳይ
ታ ሃይ ዶይዴስ፤
ታኒ ማካላንቻ ዲኬ፤
ጉዬካ ባቃታቤኬ።
6 ታ ዞኮ ሾጪዛይታስ፥
ታ ቡቻ ሾዲዛይታስ
ኣ ኢማዲስ፤
ታ ኣይፌሶ ጩቻፌ
ጌንቤኬ።50፡6 ማቶ 26፡67፤ ማር 14፡65
7 ኡባ ሃሪዛ ጎዳይ
ታና ማዲዛ ጊሻስ
ታኒ ካዉይኬ፤
ሄሳ ጊሻስ ታ ኣይፌሶ
ዳልዳቻ ሹቻ ማላ
ኦዲስ፤
ታኒ ዬላቶንታይሳ ኤራይስ።
8 ታ ጺሎቴ ቆንጪሲዛዴይ
ታ ማታን ዴስ፤
ሂስቲን ታና ሞታና
ዳንዳይዛይ ኢዚ ኦኔ?
ኣኔ ኢሲፌ ቲራን ጋይቶስ!
ታ ባልጋራይ ኦኔ?
ኣኔ ሃዮ!
9 ቤኢቴ፥ ኡባ ሃሪዛ ጎዳይ
ታና ማዴስ፤
ሂስቲን ታ ቦላ ፒርዳናይ ኦኔ?
ቤኢቴ፥ ኢስቲ ኡባይካ
ማይኦ ማላ ጬጋና፤
ቢላይ ኢስታ ማና።50፡8-9 ኦሮ 8፡33-34
10 ኢንቴ ጊዶፌ ጎዳስ ያዪዛይ፥
ኢዛ ኣይላ ቃላስ
ኣዛዜቲዛይ ኦኔ?
ሄሳዴይ ማን
ቢዛ ጊዲኮኔ
ፖኦይ ኢዛስ ባይንዳ ኣጊኮ
ኢዚ ጎዳ ሱንን
ኣማኔቶ፤
ባ ጾሳንካ ዜምፖ።
11 ሃኢ ጊዲኮ ኢንቴ ታማ ኤዲ፥
ላጪዛ ኢንቴ ጾምፔ ጾምፔ
ኦይኪዳ ኡባቲ
ኢንቴ ፖኦን ቢቴ፤
ኢንቴ ኦይዳ ጾምፔ
ፖኦን ሲሜሬቲቴ፤
ኢንቴ ታ ኩሼፔ
ኤካናይሲ ሃይሳ፤
ኢንቴ ኢታ ሜቶን ኩንዳና።