1 ሞኣቤ ቢታ ጊሻስ ጎዳይ ዮቲዳ ቃላይ ሃይሳ፤✝

ቂሬ-ሞኣቤን ዲዛ

ኤሬያ ላሌታዱስ፤

ኢሲ ጋላሳ ኦማርሳን ዲፒ ጋዱስ፤

ቃሴ ቂሬ-ሞኣቤን ዲዛ

ቂሬያ ላሌታዱስ፤

ኢሲ ጋላሳ ኦማርስ ዲፒ ጋዱስ።

2 ዲቦኔ ኣሳይ ጾሳ ኬ ኬዚዴስ፤

ዬካናስ ፑዴ

ዙምቡላታ ቦላ ኬዚዴስ፤

ሞኣቤ ኣሳይ ኔቦ ጊሻሲኔ

ሜዴባ ጊሻስ ዋሴስ፤

ሁኤይኔ ቡቻይ

ሚልጺ ጊ ሜዴቲዴስ።

3 ኦጌይ ዲዛሶ ኡባን

ማቃ ማይኤቴስ፤

ፖቄታ ቦላኒኔ

ዳባባይ ዲዛሶን ዬኬቴስ፤

ኣፉን ጉሴቴስ።

4 ሃሴቦኔይኔ ኤልኤሌይ ዋሲዳ፤

ኢስታ ዋሶይካ

ያሃጼ ጋካናስ ሴቴቲዴስ።

ሄሳ ጊሻስ

ሞኣቤ ኦላንቻቲ ዋሲዳ፤

ኢስታ ዎዚናይካ ኮኮሪዴስ።

5 ታ ዎዚናይ ሞኣቤ

ጊሻስ ዬኪዴስ፤

ኢዚፔ ጎዴቲዳ ኣሳቲ

ዞኣሬ ጋካናስ፥

ኤጊላቴ-ሻሊሺያ

ጋካናስ ባቃቲዳ፤

ኢስቲ ኣፉን ጉሲሼ

ፑዴ ሉሂቴ ኬዚዳ፤

ቃሴ ሆሮናይሜ

ኤፊዛ ኦጌራ ቢሼ

ባንቲ ያናይሳስ ዋሲዳ።

6 ኒሚሪሜ ሃቲ ሚጪዳ፤

ማታይ ሹሊዴስ፤

ጫሬቻይካ ይዴስ፤

ጪሊላ ሚሺካ ቤቴና።

7 ሄሳ ጊሻስ

ኢስቲ ሃሪዳ ኣቆታኔ

ኢስቲ ሺሺዳ ሃሮ

ኣሃያ ሻፋ

ቶኪ ፒንቴስ።

8 ኢስታ ዋሶይ

ሞኣቤ ዛዋ

ጋካናስ ሴቴቴስ፤

ኢስታ ዋሶይ ኤጊላይሜ ጋካናስ

ኢስታ ዚላሳይካ

ቢኤሪ-ኤሊሜ ጋኬስ።

9 ዲሞና ሻፋቲ

ሱን ኩሚዳ፤

ጊዲኮካ ታኒ ዲሞና ቦላ

ሄሳፌ ኣዛዝ ኤሃና።

ሞኣቤፔ ባቃቲዛይታ ቦላ

ቢታይን ጫሻ ኣቲዳይታ ቦላ

ጋሞ ዬዳና።