1 ቶጵያ ሻፋታ ማታን ዲዛ

ጊሬቲዛ ቄፌይ ዲዛ ቢታይስ

ኣዬ ኣና!✝

2 ሄ ቢታያ ቃስታኔታ

ሻጫፌ ኦሴቲዳ ዎጎሎን

ኣባ ቦላራ ሻፋፔ ሄ ፒን

ኪታ ዬዲዛሮ።

ኢንቴኖ ፒላታ ቃስታኔቶ!

ኣዱሳኔ ቦላ ሹጎ ኣሳታኮ፥

ሃኮኒኔ ማታን ዲዛይ

ኢስታስ ያዪዛ ዴሬታኮ፥

ዎልቃማኔ ቃላይ

ኤሬቶንታ ዴሬታኮ፥

ሻፋ ሃቲ

ኢዛ ዴሬ ሻኪ ቢዛ

ካዎቴኮ ቢቴ።

3 ኢንቴኖ ሳኣ ቦላ ዲዛ ኣስ ኡባቶ!

ዙማታ ቦላ ማላታይ ካቄቲሺን

ኢንቴ ቤኣና፤

ዛዬይ ፑኔቲሺን ኢንቴ ሲያና።

4 ጎዳይ ታስ፥ «ታ ጮኡ ጋ ኡታና፤

ሴታ ጋላስ ኣዋ ሴላን

ጾልቄቲዛ ሚሻ ማላ

ቦኔ ሆምቤ ማላ፥

ሻራፔ ቡኪዛ

ኢራ ማላ ጊዳዳ

ታ ጼላና» ጊዴስ።

5 ካ ማጺዛ ዎዴፔ ካሴ

ጪሻ ዎዴይ ኣሺን፥

ጪሻይ ጋኪዲ ዎይኔይ

ኣይፌ ኣይፋና ጊሺን፥

ዎይኔ ቦላ ዲዛ

ኮሾንታይሳ ጹንቃና፤

ዳዪዳ ሃጋታካ

ቃንጼሬ ዲጋና።

6 ኢስቲ ኡባይካ ዙማ ቦላ ዲዲ

ባቂ ሚዛ ካፎታሲኔ

ባዞ ዶኣታስ ኣታና፤

ካፎቲ ቦኔ ኩሜ

ሚሼ ሻጫና፤

ባዞ ዶኣቲ ባልጎ ኡባን

ሚሼ ሻጫና።

7 ሄ ዎዴ ጎዳስ

ኡባፌ ዎልቃማ

ጾሳስ ኣዱሳኔ

ሊቆ ኣሳፔ፥

ማታፔ ሃሆፔ

ያዪዛ ዴሬፔ፥

ዎልቃማኔ ኢዛ ቃላይ

ኤሬቶንታ ዴሬፔ፥

ሻፋቲ ሻኪ ቢዛ

ካዎቴፌ

ኢሞታይ ያና፤

ሜቴ ጎዳይ ዲዛሶ

ፑዴ ጺዮኔ ዙማ ቦላ ያና።