ኢሳያሳ ቲንቢቴ 16

ሞኣቤስ ሂዶታ ዮ

1 ባዞ ቢታፌ ሄ ፒንን ዲዛ ሴላፔ

ጺዮኔ ማጫ ናይ ዙማን

ዴራ ሃሪዛይሳስ

ዶርሳ ላቃ ዬዲቴ።

2 ባንታ ኬፌ ጎዴቲዲ

ዋዬቲዛ ካፎታ ማላ

ሞኣቤ ማጫሳቲ

ኣርኖኔ ሻፋ ፑርዴን

ሄሳ ሃናና።

3 ሞኣቤ ኣሳይ ዩሁዳ ኣሳስ፥

«ኑስ ዞሬ ኢሚቴ፤

ኑስ ፒርዲቴ፤

ሴታ ጋላስ ኢንቴ ኤሾን

ኦማርሳ ማ ማላ

ኑና ካሚቴ።

ባቃቲዳይታ ቆቲቴ፤

ጎዴቲዳይታካ

ኣ ኢሞፍቴ።

4 ሞኣቤፔ ጎዴቲዳይቲ

ኢንቴኮን ታኬቶ፤

ኢስታ ይሲዛይታፔ

ኢስቲ ቆቴቲ

ኣቲዛሶሆ ጊዲቴ» ጌስ።

ኡንኤዛይሳስ ዉርሴ ያና፤

ባሺ ኣታና፤

ኦቶራንቻይ

ቢታ ቦላፌ ያና።

5 ኣራታይ ሲቆን ሚኔስ፤

ሄ ኣራታን

ዳዊቴ ኬፌ ጊዲዳይ፥

ሱሬ ፒርዳ ኣሞቲዛይ፥

ጺሎቴ ኤሶሲዛይ

ኢሲ ኣሲ ኣማኔቴን

ኢዛ ቦላ ኡታና።

6 ዩሁዳ ኣሳይ፥ «ሞኣቤታ ሃላጫ፥

ኦቶሬቴኔ ሞቴ፥

ጬቄቴኔ

ካዛ ሲዪዶስ፤

ጊዶ ኣቲን ኢስታ ኦቶሬቴ

ሃዳ» ጋና።

7 ሄሳ ጊሻስ ሞኣቤቲ ዋሳና፤

ኢሲ ቦላ ሞኣቤስ ዬካና፤

ቂሬ-ሄሬሴቴ ካታማ

ኣሳ ጊሻስ

ዩሺ ቆፒዲ

ካዮቲሼ ዬካና።

8 ሃሴቦኔ ጎሻ ጋዴቲ

ሴባማ ዎይኔ

ሚቲ ሹሊዳ፤

ካዎቴታ ሃሪዛይቲ

ኢያዜሬ ኣ ቢዲ

ባዞ ቢታ ካንዲ

ባንታ ጻጶ

ኣባ ጋካናስ ዬዲዳይታ

ዶሬቲዳ ዎይኔ ሚታ

ዬቲዳ።

9 ሴባማ ዎይኔ ሚ ጊሻስ

ኢያዜራ ዬኪዛ ማላ

ታኒካ ዬካይስ፤

ሃሴቦኔ! ኤልኤሌ!

ታኒ ታ ኣፉንን

ኢንቴና ሎጺኪሳይስ።

ጋሶይካ ኢንቴስ ሚ ኣይፌቲ

ጋኪዳ ዎዴ ዲዛ ሆምቦጫይኔ

ካ ሺሺዛ ዎዴ ዲዛ

ኡፋይሲ ኣቲዴስ።

10 ኡፋይሳይኔ ኢሊሊሳይ

ኔ ኣታኪልቴይ

ዲዛሶፔ ኪቺዴስ፤

ዎይኔ ቶኪዛሶሆን ዬጺዛ

ዬይ ዴና፤

ኢሊሲካ ኣቲዴስ።

ዎይኔ ቴራ

ጉምኢዛሶሆይ ዴና፤

ጉምኢዛይታ ሆምቦጫካ

ታ ይሳዲስ።

11 ሄሳ ጊሻስ ታ ዎዚናይ

ሞኣቤ ጊሻስ

ቃታ ሚላስ ሲሳዉስ፤

ቂሬ-ሄሬሴታ ጊሻስ

ታ ማራጬያ ዬካዉስ።

12 ሞኣቤይ ፑዴ

ባ ዙምቡላ ቦላ ኬዚኮካ

ዳቡራ ጻላ፤

ኢዛ ዎሳስ

ባ ኤቃ ኬ ጌሊኮካ

ጎኣይ ዴና።

13 ጎዳይ ሞኣቤ ጊሻስ ካሴቲ ዮቲዳ ቃላይ ሃይሳ። 14 ሃኢ ጊዲኮ ጎዳይ፥ ቃጻሬቲ ኦዛ ኦሳንቻይ ጋላስ ቆዲዛ ማላ ሞኣቤ ቦንቾይኔ ኣሳ ጮራቴይ ሄ ላይ ጊዶን ካዉያና፤ ሄን ኣቲዳ ኣሳቲ ጉታኔ ዎልቃይ ባይንዳይታ ጊዳና።