ጺዮኒስ ሜርና ኣቶቴ
1 «ኢንቴኖ ጺሎቴ ካሊዛይቶ፥
ጎዳ ኮይዛይቶ ሲዪቴ።
ኢንቴ ኢዛፔ ጳልቄቲ
ኬዚዳ ዛላዛኔ
ኢንቴ ቦኬቲ ኬዚዳ
ኦላ ጼሊቴ።
2 ኢንቴ ኣዋ ኣብራሃሜኮ፥
ኢንቴና ዬሊዳ ሳራኮ ጼሊቴ።
ኢዚ ባርካ ዲሺን
ታኒ ኢዛ ጼይጋዲስ፤
ታኒ ኢዛ ኣንጃዲሲኔ ዳርሳዲስ።
3 «ጎዳይ ጺዮኖ
ቱሙ ሚንና፤
ኢዚ ላሌቴ
ቃታን ጼላና፤
ኢዚ ባዞ ቢታዛ ኤዴኔ ማላ፥
ኢዚ ባዞ ቢታዛ
ጎዳ ኣታኪልቴሶሆ ማላ
ኦና፤
ኢሻሎይኔ ኡፋይሲ፥
ጋላታይኔ ዬ ጬንጉርሲ
ኢዚን ሴቴታና።
4 «ታ ባጋቶ ታ ጊዛይሳ ሲዪቴ፤
ታ ዴሬዞ ታ ጊዛ ኤዝጋ፤
ዎጋይ ታፔ ኬዛና፤
ታ ፒርዳይ ካዎቴታስ
ፖኦ ጊዳና።
5 ታ ጺሎቴይ
ኤሶቲ ዬ ቦላ፥
ታ ኣቶቴይ ማቲሼ ዴስ፤
ታ ቄሴይ ካዎቴታስ
ቱማ ፒርዳ ኤሃና፤
ሃሩሮቲ ታኮ ጼላና፤
ታ ቄሴካ ሂዶታ ኦና።
6 ፑዴ ቁ ጊዲ ሳሎታ ጼሊቴ፤
ዚቂ ጊዲ ዱጌ ሳኣካ ጼሊቴ።
ሳሎቲ ጩዋ ማላ
ቲምኢ ጊ ያና፤
ሳኣይካ ኣፋላዳን ጬጋና፤
ኢዚን ዴኢዛ ኣሳይ ኡዱንጼ ማላ
ኤሶን ያና፤
ታ ኣቶቴይ ሜርናስ ዳና፤
ታ ጺሎቴስካ
ዉርሴ ዴና።»
7 ጎዳይ፥ «ኢንቴኖ
ጺሎቴ ኤሪዛይቶ፥
ታ ዎጋ ኢንቴ ዎዚናን
ዎዳ ኣሳቶ
ታ ጊዛ ሲዪቴ።
ኣሳይ ኢንቴና ካሺን ባቦፍቴ፤
ኢስቲ ኢንቴና
ጫዪሺን ዳጋሞፍቴ።
8 ቢላይ ማይኦ ሚዛ ማላ
ኢስታ ማና፤
ኢስቲ ጉጹኔይ ሚዳ
ሱፌ ማላ ጊዳና፤
ታ ጺሎቴ ጊዲኮ ሜርናስ፥
ታ ኣቶቴ ዬሌታፔ
ዬሌታ ጋካናስ ዳና» ጌስ።
9 ኣቤት ጎዳ ቄሴይ ዴንዳ፤
ዎልቃ ማይኣ፤
ካሴ ኣዳ ዎዴታን፥
ሚሚንቴ ቃንጼሬዳይ፥
ጊታ ዳዌዛ ጫዲዳይ
ኔና ጊዲኪ?
10 ዎዜቲ ኣቲዳይቲ ፒናና ማላ፥
ኣባኔ ጪማ
ሃ ሜሊሲዳይ፥
ጪማ ጊዶራ ኦጌ ጊግሲዳይ
ኔና ጊዲኪ?
11 ጎዳይ ዎዚዳይቲ ሲማና፤
ዬጺሼካ ጺዮኔ ጌላና፤
ሜርና ኡፋይሳ ካላቻ
ሁኤን ጎጻና፤
ኢስቲ ኢንጄኔ ኡፋይሳ
ዱስ ዴማና፤
ጬጬይኔ ዬሆይ
ኢስታፌ ባቃታና።
12 ጎዳይ፥ «ኢንቴና ሚንዛይ
ታኒ ጻላ ኢዛ፤
ሃይቂዛ ኣሳ ዜሬ፥
ማታ ማላ ሹሊዛ ኣሳ ናስ
ኣይስ ባባይ?
13 ኔና ሜዳይሳ፥
ሳሎታ ቶሊዳይሳ፥
ሳኣስ ዮች ዬጊዳይሳ ኔ ባላዳሳ፤
ኔና ይሳናስ ጊጌቲዳ
ሜንጼ ኢታዛ ጋሶፔ
ዴንዲዳይሳን
ኡባ ጋላስ ሺሮን ዳሳ፤
ሂስቲን ሄ ሜንጼ ኢታዛ ሃንቆይ
ሃኢ ኣዋን ዲዜ?
14 ቃሼቲዳይቲ ኤሶን ቢርሼታና፤
ኢስቲ ባ ቃሼቲዳ
ኦላ ጊዶን ሃይቄቴና፤
ካ ኢስታስ ፓጬና።
15 ጋሶይካ ዳምባላይ ዴንዳና ማላ
ኣባ ቃዛ
ታኒ ጎዳይ ኔ ጾሳ፤
ታ ሱን ጎዳ
ኡባፌ ዎልቃማ ጾሳ።
16 ታኒ ታ ቃላ
ኔ ዶናን ዎዲስ፤
ታ ኩሼ ኩዋን ካማዲስ፤
ሳሎታ ኢስቲ ዲዛሶን ዎዳይ፥
ቢታስ ዮች ዬጊዳይ፥
ጺዮኖ፥ ‹ኔ ታ ዴሬ›
ጊዳይ ታና» ጌስ።
ጎዳ ሃንቆ
17 ጎዳ ኩሼፔ ሃንቆ
ኡሹ ኡዪዳሬ፥
ኦርጮካ ኣሾንታ፥
ኣስ ጋንዲጋርሲዛ ኡሹ
ጺጺ ሂስታ ኡዪዳሬ፥
ሃኔ ዬሩሳላሜ ዴንዳ!
ዴንዳ፥ ዴንዳ ኤቃ!51፡17 ኣጁ 14፡10፤ 16፡19
18 ኢዛ ዬሊዳ ናይታ ኡባፌ
ካሌዛይ ኢሶይካ ባዋ፤
ቃሴ ኢዛ ዲቺዳ
ናይታ ኡባፌካ
ኢዚ ኩሼ ኦይኪዛይ
ኢሶይካ ባዋ።
19 ቤኣ ባሻ ቦላ ባሺ
ኔ ቦላ ዪዴስ፤
ሂስቲን ኔና ኦኔ
ሚንናይ?
ኢስቲካ ላሌቴኔ ይስ፥
ኮሻኔ ማሻ።
20 ኔ ኣቱማ ናይቲ ዳቡርዳ፤
ዎጺማዴን ኦይኬቲዳ
ጌኔሳ ማላ
ኦጌ ጋጻን ኡባን ኢቺዳ።
ጎዳ ሃንቆይኔ
ኔ ጾሳ ሴራይ
ኢስታ ቦላ ኩሚዴስ።
21 ሄሳ ጊሻስ ዎይኔ
ኡሻን ጊዶንታ
ጮ ማቲዛሬ ሃይሳ ሲያ
22 ባ ዴራ ኣሺዛ ኔ ጎዳይ
ኡባፌ ዎልቃማ ጾሳይ፥
«ቤኣ፤ ኔና ጋንዲጋርሲዛ
ኡሻ ኔ ኩሼፔ
ታ ኤካዲስ፥
ታ ሃንቆ ጹኣፔ
ናምኣን ኡያካ።
23 ታኒ ሄሳ ኔና ኡንኤዛይታ
ኩሼን ዎና።
ኢስቲ ኔና፥ ‹ኑኒ ኔ ቦላራ
ሄሜቲዲ ኣና ማላ ዛቁላ› ጊዳ።
ሂስቲን ኢስቲ ኣና ጋካናስ
ኔ ዞኮ ኢስታስ ቢታ ማላኔ
ኦጌ ማላ ኦዳሳ» ጌስ።