1 ኣጁታ ዙሌ ቦላ ዮቴቲዳ ሚኖ ዮኦ፤

ኢንቴና ኣዚ ሜቲን ኡባይ

ፖቄ ቦላ ኬዚዴቲ?

2 ሃኔ ዎጫማይ ኩሚዳ

ካታማዬ!

ሺሮይኔ ዲርባይ

ኩሚዳ ካታማዬ!

ኔፔ ሃይቂዳይቲ

ማሻን ሃይቂቤቴና፤

ዎይኮ ኦላን ሃይቂቤቴና።

3 ኔና ኣይሲዛይቲ ኡባይ

ኢሲፌ ባቃቲዳ፤

ዎንዳፌ ዴንንታ

ዲሼ ዲኤቲዳ፤

ሞርኬይ ሃሆን ዲሺን

ባቃቲዳ ኡባቶ!

ኢንቴ ኦይኬቲዲ

ኢሲ ቦላ ቃሼቲዴታ።

4 ሄሳ ጊሻስ ታኒ፥

«ታፔ ሃኪቴ፤

ኣኔ ጫሞ ዬሆ ታ ዬካይስ፤

ይዳ ታ ኣሳ ጊሻስ

ታና ሚንና ቆፖፍቴ» ጋዲስ።

5 ጎዳይ ኡባፌ ዎልቃማ

ጾሳይ ኣጁታ ዙሌን ዎጫማ፥

ዲርባኔ ሺሮ፥

ዲርሳታ ላሌኔ ዙማታኮ

ዋሶ ጋላሲ ዴስ።

6 ኤላሜይ ዎንዳፌ ዪሻ ኮሆ፥

ባ ፓራታኔ

ፓራ-ጋሬታ ጊግሲዴስ፤

ቂሬይካ ባ ጎንዳሌ ኦይኪዴስ።

7 ሎኦ ዙሌቲ ፓራ-ጋሬታን ኩሚዳ፤

ቶጋ ኣሳቲ ካታማይ

ፔንጌን ኤቂዳ።

8 ዩሁዳ ሚጻታ ላሊዳ፤

ሄ ዎዴ ዎራ ጊዶን

ሚንጃ ኬን ዲዛ

ኦላ ማሳራ

ኔ ጼላዳሳ።

9 ዳዊቴ ካታማይ

ዳሮ ላሌቲዳይሳ ቤኢዴታ፤

ዱጌ ባጋራ ሃ ኤሊሲዴታ።

10 ዬሩሳላሜን ዲዛ

ኬታ ቆዲዴታ፤

ዲርሳ ኦራናስ

ኬታ ላሊዴታ።

11 ካሴ ጋልኣ ኤሌ ሃ ዛሪዲ፥

ኢዛ ሚንጂዛሶ ናምኡ ጊምቤታፔ

ጊዶን ጊግሲዴታ።

ጊዶ ኣቲን ኢንቴ ሄሳ ኦዳይ

ኦናኮ ኤሪቤኬታ፤ ኮይሮ ሃልቺ

ኦዳይሳ ኣኬኪቤኬታ።

12 ሄ ጋላስ

ጎዳይ ኡባፌ ዎልቃማ ጾሳይ

ኢንቴ ዬካና ማላኔ

ዋሳና ማላ፥

ኢንቴ ሁኤ ቢናና

ቡጫና ማላኔ

ማቃ ማይኣና ማላ ጼይጊዴስ።

13 ጊዶ ኣቲን ኢንጄኔ ኡፋይስ፥

ቦራኔ ርሾ ሹካይ፥

ኣሾ ሙሲኔ

ዎይኔ ኡሺ ዴስ፤

«ኑኒ ዎንቶ ሃይቃና ጊሻስ

ኣኔ ሞሲኔ ኡዮስ» ጊዴታ።✝

14 ጎዳይ ኡባፌ ዎልቃማ ጾሳይ ሃይሳፌ ካሊዛይሳ ታስ ቆንጪሲዴስ፤ ኢዛካ ታ ሃይን ሲያዲስ፤ «ሃይሲ ሃ ናጋራዚ ኢንቴ ሃይቃና ጋካናስ ዉርሲን ዉሬና።»

15 ጎዳይ፥ ጎዳይ ኡባፌ

ዎልቃማ ጾሳይ፥

«ባዳ ካዎ ኬ

ኣላፌ ሼቢና፥

16 ሃይሳን ኣይ ኦይ?

ሃይሳ ኔስ ዱፎ ጊጊሳናስ፥

ቃሶሆን ኔ ሞጌታናሶ

ዎጫናስ፥ ኔ ኣሃይ

ኡታናሶ ዛላ ዎጫናስ

ኦኒ ኔና ኣዛዚዴ?

17 ሃይሶ ሚኖ ኣዴዞ! ናጌታ፤

ጎዳይ ኔና ሚን ኦይኪዲ

ባ ኩሼን ጩጩሚ ኦይኪዲ

ኦላና ሃኔስ።

18 ኔና ያንባርሻ ማላ ዩሺዲ

ኣኮ ቢታን ኦላና፤

ኔ ጎዳ ኬስ

ኔ ዬላ ጊዳዳሳ፤

ኔ ሄን ሃይቃና፤

ኔ ቦንቾ ፓራ-ጋሬቲካ

ሄን ኣታና።

19 ኔ ቦንቼቲዳሶፔ

ታ ኔና ካዉሻና፤

ኣላፌቴፌካ

ኔ ጎዴታና» ጋ።

20 «ሄ ጋላስ ታኒ ኪልቂያሳ ና ታ ኣሽካራ ኤልያቄሜ ጼይጋና። 21 ኔ ሴሎዛ ታ ኢዛ ማይዛና፤ ኔ ጊ ኢዛ ጊጺሳና፤ ኔ ዳናቴካ ታ ኢዛስ ኣ ኢማና። ኢዚ ዬሩሳላሜን ዲዛ ኣሳሲኔ ዩሁዳ ኣሳስ ኣዋ ጊዳና። 22 ታኒ ዳዊቴ ኬ ቁልፔ ኢዛ ሃሼን ዎና፤ ኢዚ ዶዪን ኦኒካ ጎርዴና፤ ኢዚ ጎርዲን ኦኒካ ዶዬና።✝ 23 ታኒ ኢዛ ኣማኔቲዛሶሆን ሽኬ ማላ ኤሳና፤ ኢዚ ባ ኣዋ ኬስ ቦንቾ ኣራታ ጊዳና። 24 ቄሪ ጻሮፔ ቢዲ ባ ጋካናስ ሶን ዲዛ ሚሽ ኡባ ኮጫን ካቂዛ ማላ ኢዛ ኣዋ ኬ ቦንቾ ኡባይ ናይታፔ ቢዲ ና ና ጋካናስ ኢዛ ቦላ ቃጴታና» ጊዴስ።

25 ጎዳይ ኡባፌ ዎልቃማ ጾሳይ፥ «ሄ ጋላስ ኣማንዛሶን ኤቂዳ ሽኬይ ሾዴታና፤ ሜቂ ዎና፤ ኢዛ ቦላ ካቄቲዳ ኡባይ ኩንዲዲ ሜቄሬታና» ጊዴስ፤ ሃይሳ ጎዳይ ዮቲዴስ።