ኢሳያሳ ቲንቢቴ 47

ባቢሎኔ ቦላ ያና ፒርዳ

1 ጎዳይ፥ «ሃኔ ባቢሎኔ ጌላኦዬ፥

ጉዱላ ቦላ ዎ ኡታ፤

ሃኔ ባቢሎኔታ ናዬ፥

ኔ ኣራታፔ ዎ፤

ቢታን ኡታ፤

ሃይሳፌ ጉዬ

ኔኒ ማላ ሎኦኔ ዳልቂዳልቃ

ጌቴታ ጼይጌታካ።✝47፡1-15 ኢሳ 13፡1—14፡23፤ ኤር 50፡1—51፡64

2 ዎጻ ኤካዳ ካ ጋጫ፤

ኔ ጎሳ ቃራ፤

ኔ ቃሚሳዛ ቃራ፤

ኔ ጺፋ ቤሳ፤

ጋዲጋዳሼ ሻፋ ፒና።

3 ኔ ካሎቴ ቆንጮ፤

ዬላቺዛ ኔ ካሎይ ቤቶ፤

ታኒ ሃሎ ማካና፤

ታ ኦናካ ኣጊኬ» ጌስ።

4 ኑና ዎዚዛ

ኢስራኤሌ ጌሻስ፥

ሱንይ ጎዳ ኡባፌ

ዎልቃማ ጾሳ።

5 «ሃኔ ባቢሎኔታ ናዬ፥

ማሶ ጌላዳ ጮኡ ጋ ኡታ፤

ሃይሳፌ ጉዬ ኔ ካዎቴታ

ጎዳቴዮ ጌቴታ ጼይጌታካ።

6 ታኒ ታ ዴራ ሃንቄታዲስ፤

ታኒ ጺንጾዛካ ቱኒሳዲስ፤

ታኒ ኢስታ ኔ ኩሼን

ኣ ኢማዲስ።

ኔኒ ጊዲኮ

ኢስታስ ቃታቤካ፤

ጪሚዳይታ ቦላካ

ኬሂ ዴጾ ቃምባራ

ዎዳሳ።

7 ኔኒ፥ ‹ታኒ ሜርናስ

ጎዳቶ ጊዳና› ጋዳሳ።

ጊዶ ኣቲን ሃይታንታ

ኣኬካቤካ፤

ኢስታ ዉርሴ

ኣይ ጊዳናኮ ቆፓቤካ።

8 «ሃኔ ኢሻሎ ዱስ ዲዛሬ!

ኔርካ ኔናን

ኣማኔታ ኡቲዳሬ!

ኔ ዎዚናን፥ ‹ታና፤

ታፔ ኣቲን ሃራይ ባ።

ሃኒፌ ጉዬ ታኒ ኣምኦ ጊዲኬ፤

ዬላዳ ሚዳሮ ጊዲኬ›

ጊዛሬ ሲያ!

9 ሃ ናምኡ ዮኦቲ፥

ኣምኤቴኔ ዬሊ ን

ቆፋይ ባይንዳ ኢሲ ጋላስ

ኔ ቦላ ጋኪ ዎና፤

ኔ ኣይ ኬና ቢቲኮካ፥

ኔ ኣይ ኬና ሙሬኒኮካ

ኢስቲ ኔ ቦላ

ኩሜ ዎልቃራ ያና።✝47፡9 ኣጁ 18፡7-8

10 ኔኒ ኔ ኢታቴን ኣማኔታዳ፥

‹ታና ኦኒኔ ቤኤና› ጋዳሳ።

ቃሴ፥ ‹ታና፤

ታፔ ኣቲን ሃራይ ዴና

ኔ ጊዳ ዎዴ

ኔ ኣ ኤራቴይኔ

ጪንጫቴ

ኔና ባሌዳ› ጋዳሳ።

11 ባሺ ኔ ቦላ ያና፤

ኔኒ ዎስታ ሙሬና

ዛራናኮ ኤራካ፤

ኔ ቃንጾ ኢማዳ

ኔ ዳንዳዮንታ ቆሆይ

ኔ ቦላ ጋካና።

ኔ ቆፖንታ ሜቶይ

ኔ ቦላ ዲንጋቴ ያና።

12 ሄኮ ቤኣ፤

ኔኒ ናቴፌ ዶማዳ

ኦሼ ዳቡርዳ ቢታታኔ

ዳሮ ሙሬኖታ

ጉጃ ጉጃ ኦ፤

ኦኔ ኤሪዛይ ኔስ ሃናናኮ፥

ኦኔ ኤሪዛይ ኔኒ

ኔ ሞርኬታ ሺሮሳናኮ?

13 ኔ ኤኪዳ ዞሬ ኡባይ

ኔና ዳቡራራ ኣሺዴስ፤

ኣጊናፔ ኣጊና ጋካናስ

ጾሊንቴ ጼሊ ካዪዛይቲ፥

ጾሊንቴ ታይቢዛይቲ

ኣኔ ሃ ዬቶ፤

ኔና ጋኪዛ ሜቶፔ

ኣኔ ኢስቲ ኔና ኣሼቶ።

14 ሄኮ ኢስቲ ሃፓ ማላ፤

ታማይ ኢስታ ማና።

ታማ ላጮፔ ዴንዲዳይሳን

ባና ኣሻናስ

ዳንዳዬቴና።

ኣሲ ሆኣና ቦንቆይ ዴና፤

ኡቲዲ ሆኣና

ታማይካ ዴና።

15 ናቴፌ ዶማዳ

ኔ ኢስታራ ዳቡርዳይቲ፥

ኔ ኢስታራ ዛልኢዳይቲ፥

ኢስቲ ኦና ዳንዳይዛይ

ሃይሳ ጻላ፤

ኢሶይ ኢሶይ ባ ሞሮ

ጉጂ ጉጂ ባና፤

ጊዶ ኣቲን ኔና

ኣሻናይ ዴና» ጌስ።