1 ዴሬዚ፥ «ኑኒ ዮቲዳይሳ

ኦኔ ኣማኒዳይ?

ጎዳ ቄሴይ ኦናስ ቆንጪዴ?✝

2 ኢዚ ኢዛ ሲንን ጫሬቻ ማላ፥

ሜላ ቢታፌ ሞኪዛ

ጻጶ ማላ ሞኪዴስ፤

ኑ ኢዛ ጼላናስ ሺጫቴ

ዎይኮ ቴማይ ዴና፤

ኑ ኢዛ ዶሳናስ

ኢዛ ማላይ ሎኤና።

3 ኢዚ ኣሳን ካቲዳዴኔ

ኢጼቲዳዴ፤

ኢዚ ሃርጌፌኔ ሜቶፔ

ሻኬቲ ኤሮንታ ኣሳ፤

ኢዚ ኣሲ ኢዛ ቤኣናፔ

ባ ኣይፌሶ ሃራሶ ዛሪዛ ኣሳ ማላ

ካቲዳዴ ጊዲዴስ፤

ኑኒካ ኢዛ ቦንቺቤኮ።

4 «ቱሙካ ኢዚ ኑ ሃርጌ

ባስ ኤኪዴስ፤

ቃሴ ኑ ሳኮካ ኢዚ ቶኪዴስ።

ኑኒ ጊዲኮ ኢዛ ጋኪዳ ሜቶይ፥

ዴሼቴይኔ ዋዬይ

ጾሳፌ ኢዛስ ኢሜቲዳዛ

ጊዲ ቆፒዶስ።✝

5 ጊዶ ኣቲን ኢዚ

ኑ ሞሮ ጊሻስ ጫዴቲዴስ፤

ኑ ቆሆ ጊሻስ ሊቂዴስ፤

ኢዛ ቦላ ዎዳ ቂጻቴይ

ኑስ ሳሮ ኤሂዴስ፤

ኢዛ ማዱንን ኑ ፓጺዶስ።✝

6 ኑኒ ኡባይ ዶርሳ ማላ

ቶይላቲ ይዶስ፤

ኑኒ ኢሶይ ኢሶይ ኑ ኦጌ ቢዶስ፤

ጎዳይ ኑ ኡባ ቆሆ

ኢዛ ቦላ ዎዴስ።✝

7 «ኢዚ ኡንኤቲዴሲኔ ዋዬቲዴስ፤

ጊዶ ኣቲን ዶናካ ፖጊቤና።

ዶርሳ ላቃ ማላ

ሹኬታናስ ላጌቲዴስ፤

ባ ኢስኬ ቃንጺዛይታ ሲንን

ጮኡ ጊዛ ዶርሳ ማላ

ኢዚ ዶናካ ጶቂቤና።✝

8 ኢዛ ሜቶኒኔ ፒርዳን ኤፊዳ፤

ኢዚ ታ ዴራ ሞሮ ጊሻስ

ዴሼቲዲ፥ ፓጻይ ዲዛ ቢታፌ

ዲጌቲዳይሳ ኢዛ ዜሬፌ

ኣኬኪዳይ ኦኔ?✝

9 ኢዚ ኣይኮ ጌኔ ሃሳዮንታ፥

ኣይ ሞሮካ ኦንታ፥

ኢዛ ሃይቆይ ኢታታራ

ኢሲፌ ቆዴቲዴስ፤

ጊዶ ኣቲን ኢዚ ዱሬታ

ዱፎን ሞጌቲዴስ።✝

10 «ኢዛ ሊቄኔ ዋዬዚ

ጎዳ ሼኔ ጊዲዴስ፤

ጎዳይ ኢዛ ሼምፖ

ናጋራ ያርሾ ኦኮካ

ኢዚ ባ ዜሬ ቤኣና፤

ጎዳ ሼኔይ

ኢዛ ኩሼን ፖሌታና።

11 ኢዛ ሼምፖይ ዋዬቲዳፔ ጉዬ

ኢዚ ዴኦ ፖኦ

ቤኣናኔ ኡፋዬታና።

ታ ጺሎ ኣይሌዚ ባ ኤራቴን

ዳሮታ ጺሊሳና፤

ኢስታ ሞሮካ ቶካና።

12 ሄሳ ጊሻስ ኢዛ ጋኪዛ ጊሻ

ጊታ ኣሳታ ጊሻራ ኢሲፌ ሂስታና፤

ዲኢ ኤሂዳይሳ ዎልቃማታራ

ኢዚ ኢሲፌ ጊሼታና፤

ኢዚ ባ ሼምፖ

ሃይቆስ ኣ ኢሚዲ፥

ኢታ ኦዛይታራ

ኢሲፌ ቆዴቲዳ ጊሻስ፥

ዳሮታ ናጋራ ቶኪዴስ፤

ቆሂዳይታ ጊሻስ

ጋናቲዴስ» ጋና።✝