1 ጎዳይ፥ «ጊዶ ኣቲን

ታ ኣሽካራ ያቆቤ፥

ታ ዶሪዳ ኢስራኤሌ፥ ሲያ።

2 ኔና ሜዳይ፥

ኔ ኣዬይ ኡሎን ኦዳይ፥

ኔና ማዲዛ ጎዳይ፥

‹ታ ኣሽካራ ያቆቤ!

ታኒ ዶሪዳ ዪሹሩኔ! ያዮፋ።

3 ታኒ ሳሜቲዳ ቢታን

ሃ ጉሳና፤

ሜላ ቢታንካ ሻፋ ጎጊሳና።

ታኒ ታ ኣያና ኔ ዜሬ ቦላ፥

ታ ኣንጆ ኔስ

ና ና ቦላ ጉሳና።

4 ኢስቲ ዴምባን ጪሊላ ማታ ማላ፥

ሻፋ ዶናን ዲዛ ሚ ማላ

ሞካና› ጌስ።

5 ኢሶይ፥ ‹ታኒ ጎዳሳ› ጋና፤

ሃራይ ባና ያቆቤ

ሱንን ጼይጋና፤

ሃራይ ቃሴ ባ ኩሼ ቦላ፥

‹ታኒ ጎዳሳ› ጊ ጻፋና፤

ኢዚ ባና ኢስራኤሌ ሱንን

ጼይጋና» ጌስ።

6 ኢስራኤሌ ካዎይኔ ኢስታ ዎዚዛይ፥

ጎዳይ ኡባፌ

ዎልቃማ ጾሳይ፥

«ኮይሮይ ታና፤ ዉርሴካ ታና።

ታፔ ሃራ ጾሲ ባዋ።✝

7 ታ ማላይ ኦኒ ዲዜ? ኣኔ ዮቶ፤

ኮይሮ ታ ዴራስ ታ ዮች ዬጊሺን

ኣዚ ሃኒዳኮ፥

ሲንፌካ

ኣዚ ሃናናኮ ዮቶ፤

ኣኔ ታስ ቆንጪሶ፤

ቡሮ ሃናና ሚሻ ጊሻስ

ሲንቲ ዮቶ፤

ቡሮ ያናይሳ ካሴቲ ዮቶ።

8 ያዮፍቴ፤ ዳጋሞፍቴ።

ሃይሳ ታኒ ኢንቴስ

ዮታቤኪና?

ቤኒሶፌ ታ ኢንቴና

ኤሪሳቤኪና?

ሄሳስ ኢንቴ ታ ማርካታ።

ታፔ ኣቲን ሃራ ጾሲ ዲዜ?

ሙሌካ ዴና፤

ዎይኮ ሃራ ዛላይ ዲዜ?

ዴና፤ ታ ኦናካ ኤሪኬ» ጌስ።

9 ኤቃ ሚስሌታ ሜዛይቲ

ኡባቲ ሃዳ፤

ሚስሌታ ኢስታፌ

ኦዛ ሚሻቲካ ሃዳ፤

ኢስታስ ዮቲዛይቲካ ቆቄ፤

ኢስታስ ኤራቴ ዴና፤

ኢስቲ ዬላታና።

10 ኣይኮካ ጎኦንታ ኤቃ ጾሳ

ማሲ ጊግሲዛይ ኦኔ?

11 ኤቃ ጾስ ሜዛይ ኣስ ኣቲን

ሃራ ጊዴና፤

ኢዚኔ ኢዛ ሚሳቲዛይቲ ዬላታና፤

ኡባይካ ሺቂዲ

ኢሲ ቦላ ኤቄቶ፤

ኢስቲ ዳጋማናኔ ዬላታና።

12 ቢራታ ቆጺዛይ ናሪቃ ኦይኬስ፤

ጺፋ ቦንቆ ቦላ

ዎ ኦስ፤

ኤቃ ጾስ ናሪቃን ቆጺዲ

ሚስሌ ጊጊሴስ፤

ባ ሚኖ ቄሴን ጊጊሴስ።

ሄሳፌ ጉዬ ጋፌስ፤

ዎልቃ ዬስ፤

ሃ ሳሜቴስ፤ ዳቡሬስ።

13 ማሲዛይ ዎዶሮን ዋስ፤

ቾኬን ማላታ ዎስ፤

ማርሳራ ዎጬስ፤

ኢርሳሴን ኢዛ ቦላ

ማላታ ዎስ፤

ኣሳ ሚሳቲሲ ጊጊሴስ፤

ኣሳ ማላ ፑላሴስ፤

ጎይኖሶን ኤፊ ዎስ።

14 ዚጋ ሚ ቃንጼስ፤

ዎላ ዎይኮ ሞቆ ዶሬስ፤

ዎራን ዲዛ ሚታራ

ኢሲፌ ዲጫና ማላ ኣጌስ፤

ዎይኮ ጺዳ ቶኬስ፤

ኢዛካ ኢራይ ዲቼስ።

15 ኣሲ ኤሶስ ጎኤቴስ፤

ኢዛፔ ጉ ኤኪዲ

ታማን ኤ ሆኤስ፤

ኡኬካ ኢዛን ኡኬስ፤

ኢዛፔ ማሲዲ

ኤቃ ጾስ ጊጊሴስ፤

ኢዛስካ ጎይኔስ።

ኤቃ ጾስ ኦስ፤

ኩንዲዲካ ኢዛስ ዚጌስ።

16 ባጋ ሚ ኤስ፤

ኢዛ ቦላካ ቁማ ካስ፤

ኣሾ ኢዛን ጺጺዲ ካሊ ሜስ፤

ታማዛ ሆኢሼ፥

«ኤሮሾ ታና ሆኢዴስ፤

ታማዚካ ታስ ቤቴስ» ጌስ።

17 ቃሴ ኣቲዳ ሚዛ

ባስ ኤቃ ጾስ ጊጊሴስ፤

ሆኪዲ ኢዛስ ዚጌስ፤

ኢዛካ ጎይኔስ፤

ኢዛ ዎሲሼ፥

«ኔኒ ታ ጾሳ ጊዲዳ ጊሻስ

ታና ኣሻ» ጌስ።

18 ኢስቲ ኣይኮካ ኤሬቴናኔ

ኣኬኬቴና፤

ኢስቲ ጼሎንታ ማላ

ኢስታ ኣይፌይ ጎዜቲዴስ፤

ኢስቲ ዩሺ ቆፖንታ ማላ

ኢስታ ዎዚናይ ጎርዴቲዴስ።

19 ኦኒካ ታኪ ጊ ቆፒቤና፤

ኤራቴ ዎይኮ

ኣኬካይ ባይንዳ ጊሻስ፥

«ባጋ ታማን ኤዲስ፤

ኢዛ ቦንቆን ካ ካዲስ፤

ኢዛን ኣሾ ጺጻዳ ማዲስ፤

ሂስቲን ኣቲዳይሳን ዎስታዳ

ታኒ ሃራሲዛ ሚሽ ኦኔ?

ሚ ኣኖስ ታኒ

ጎይናና ቤሲዜ?»

ጋናስ ዳንዳይቤና።

20 ኤያ ዎዚናይ ኢዛ ባሌን

ኢዚ ቢዲን ቃምኤስ፤

ባና ኣሻና ዳንዳዬና፤

«ሃይሲ ታስ ኡሻቻ ኩሼን

ዲዛይ ዎርዶ ጊዴኔ?

ጋናስ ዳንዳይቤና።»

21 ጎዳይ፥ «ኢስራኤሌ ኔኒ

ታ ኣሽካራ ጊዲዳ ጊሻስ፥

‹ያቆቤ ሃይሳ ቆፓ፤

ታኒ ኔና ኦዲስ፤

ኔኒ ታ ኣሽካራ።

ኢስራኤሌ ታኒ ኔና ዶጊኬ።

22 ታኒ ኔ ሞሮ ሻራ ማላ፥

ኔ ናጋራካ ማላዶ ቱላላ ማላ

ቁጫ ይሳዲስ፤

ታኒ ኔና ዎዚዳ ጊሻስ

ሃ ታኮ ሲማ› » ጌስ።

23 ጎዳይ ሃይሳ ኦዳ ጊሻስ

ሳሎቶ ዬጺቴ፤

ጪማ ቢታቶ ኡፋይሳን ኢሊሊቴ።

ኢንቴኖ ዙማቶ፥

ኢንቴኖ ዎራቶ፥

ሚቶ ኡባይ ኢሊሊቴ፤

ጋሶይካ ጎዳይ

ያቆቤ ዎዚዴስ፤

ባ ቦንቾ

ኢስራኤሌ ቦላ ቆንጪሲዴስ።

24 ኔና ኣዪ ኡሎን ሜዲ

ዎዚዳ ጎዳይ፥

«ኡባ ሜዳ

ሳሎታ ታርካ ፒዲሲዳይ፥

ሳኣካ ሚጪዳይ ታና ጎዳ።

25 ታኒ ዎርዶ ናቤታ ማላታ

ሃዳ ኦና፤

ቢቲዛይታካ ኤያ ኬሳና።

ታኒ ኣ ኤራንቻታ

ሺራ ዬጋና፤

ኢስታ ኤራቴካ

ሃዳ ኦና።✝

26 ታ ኣሽካራዛ ቃላ ታ ፖላና፤

ታ ኪቲዳይታ ዞሬ ታ ሚንና፤

ታኒ ዬሩሳላሜ፥

‹ኔኒ ኣሲ ዲዛሶ ጊዳና›፥

ዩሁዳ ካታማታካ፥

‹ኢስቲ ኬጼታና›፥

ኢስታ ላሌካ፥

‹ታኒ ኦራጺሳና› ጋና።

27 ታኒ ጪማ ሃካ፥

‹ኔ ሜላ ጊዳ!

ኔ ሻፋታካ

ታ ሜሊሳና› ጋና።

28 ቂሮሴካ፥

‹ኢዚ ታ ሄንንቻ፤

ኢዚ ታ ሼኔ ፖላና› ጋና፤

ዬሩሳላሜይካ፥

‹ሲማ ኤቁ› ጋና፤

ጾሳ ኬስ፥

‹ኢዛ ዮቺ ዬጌቶ› ጋና» ጌስ።✝