1 ጺሮሴ ቦላ ዮቴቲዳ ሚኖ ዮኦ፤

ጺሮሴይ ዲፒ ጊ ይዳ ጊሻስ

ታርሴሴ ማርካቤቶ ዋሲቴ፤

ኬኔ ዎዴቤይ

ባይንዳሶ ጊዳዱስ።

ቆጲሮሴ ቢታፌ

ዎሬይ ኬዚዴስ።

2 ኢንቴኖ ሃሩሮቶ!

ኢንቴኖ ዱሬቲዳ

ሲዶና ዛልኣንቻቶ!

ጮኡ ጊቴ!

3 ጊታ ኣባራ ሺሆሬፔ

ጺሮሴስ ካ ዬስ፤

ጺሮሴ ኣቆታይ

ኣባዬፔ ቤቴስ፤

ኢዛ ካዎቴታስ

ዛልኤ ባች ጊዳዱስ።

4 ሃኔ ሲዶና ካታማዬ!

ሃኔ ኣባ ሚጻዬ ኔኒ ዬላታ፤

ኣባይ፥ «ታኒ ሚጻታቤኬ፤

ናካ ዬላቤኬ፤

ኣቱማ ናይታኔ ማጫ ናይታ

ዲቻቤኬ» ጊዴስ።

5 ጺሮሴፔ ኬዚዛ ፓፑንይ

ጊብጼ ቢታን ሲዬቲዛ ዎዴ

ኢስቲ ጬጫና።

6 ኢንቴኖ ሃሩሮቶ! ዚላሊቴ፤

ታርሴሴ ፒኒቴ።

7 ኢዚ ቶሆይ ኢዞ ሃኮ ዴሬ ኤፊዳራ

ሄን ኢዛ ኡታና ማላ

ኦዳራ፥

ካሴ ቤኒ ካታማያ

ኢንጄኔ ኡፋይሳ ካታማያ ሃኒ?

8 ካላቻ ጎጺሲዳሪ ቦላ፥

ባ ዛልኣንቻታ

ዳናሲዳሪ ቦላ፥

ቢታ ቦላ ቦንቼቲዲ

ባይዚዛይቲኔ

ላሚዛይቲ ኢዚን ዲዛ

ጺሮሲ ቦላ

ሃይሳ ቆፒዳይ ኦኔ?

9 ኦቶሬቲዛይታ ኡባ

ቦንቾ ካዉሻናስ

ቃሴ ቢታ ቦላ

ቁ ቁ ጊዳይታ

ዚቂ ሂስታናስ

ጎዳይ ኡባፌ ዎልቃማ

ጾሳይ ሃልቺዴስ።

10 ኢንቴኖ ታርሴሴ ቢታ ኣሳቶ!

ኢንቴና ቴቂዛይ ባይንዳ ጊሻስ

ኣባዬ ሻፋ ማላ ኢንቴ

ቢታ ቦላን ኩሚዲ ጎጊቴ።

11 ጎዳይ ባ ኩሼዛ

ኣባ ቦላ ሚጪዴስ፤

ኢዚ ካዎቴታካ

ዳጋንዴስ፤

ካናኔ ሚጻቲ

ላሌታና ማላ ኣዛዚዴስ።

12 ቃሴካ፥ «ሃኔ ቆጼቲዳ

ሲዶና ጌላኦዬ!

ሃይሳፌ ጉዬ ኡፋዬቶፋ፤

ዴንዳ ቆጲሮሴ ፒና፤

ሄንካ ኔ ሳሮ ዴማካ» ጊዴስ።

13 ኣኔ ባቢሎኔ ቢታ ቤኢቴ፤

ሄ ቢታ ኣሳይ

ፓንታ ኣስ ጊዲዴስ፤

ኣሶሬ ኣሳይ ኢዞ ባዞ ዶኣስ

ጉፋሶ ኬሲዴስ፤

ኢስቲ ባንታ ሻኮታ

ኢዚ ቦላ ጊምቢዳ፤

ኢዚ ሚጻታ ላሊዳ፤

ቡቶይሲ ዶሬ ጊዲዴስ።

14 ኢንቴኖ ታርሴሴ

ማርካቤቶ፥ ዋሲቴ!

ኢንቴ ሚጻይ ላሌቲዴስ።

15 ሄ ዎዴ ጺሮሴ ካታማይ ኢሲ ካዎስ ዴኦ ላይ ኬና ላፑን ታሙ ላይ ዶጌታና፤ ሄሳፌ ጉዬ ላይማ ማጫሳይ ጊሻስ ዬጼቲዳ ዬ ጺሮሴ ቦላ ዬጼታና።

16 ኢስቲ፥ «ሃኔ ዶጌቲዳ

ላይማ ማጫሳዬ!

ባጋና ዴን፤

ካታማይ ጊዶን ዩያ፤

ኔ ሃሳኤታና ማላ

ባጋና ሎኤ ሾጫ፤

ዳሮ ማዛሙሬ ዬጻ» ጋና።

17 ላፑን ታሙ ላይ ፖሌቲዳፔ ጉዬ ጎዳይ ጺሮሴ ቆፓና፤ ጊዶ ኣቲን ኢዛ ካሴ ባ ላይማ ኦሶን ሲማና፤ ሳኣ ቦላ ካዎቴታ ኡባራ ባ ላይማቴ ዛልኤ ዛልኣና። 18 ጊዲኮካ ኢዛ ዴሚዳ ኡባይኔ ዎይ ጎዳስ ዱማታና፤ ዳጋቴናኔ ሱዴና፤ ኢዚ ዎይ ጎዳ ሲንን ዴኢዛይታስ ፓላሂዳ ካኔ ሎኦ ማይኦ ጊዳና።✝