ኢሳያሳ ቲንቢቴ 39

ባቢሎኔፔ ኪቴቲ ዪዳ ኣሳታ

1 ሄ ዎዴ ባቢሎኔ ካዎይ ባሊዳኔ ና፥ ማሮዶኬ-ባልዳኔይ ሂዝቂያሲ ሃርጊ ፓጺዳ ጊሻስ ዳብዳቤኔ ኢሞታ ኢዛስ ዬዲዴስ። 2 ሂዝቂያሲ ኪቴቲዳይታ ኡፋይሳን ሞኪ ኤኪዴስ፤ ሂስቲዲ ካዎ ሚንጃ ኬን ዲዛ ቢራ፥ ዎርቃ፥ ዱማ ዱማ ሳዎታ፥ ዶሬቲዳ ዛይቴ፥ ቃሴ ኦላ ሚሻ፥ ኢዛስ ዲዛ ሚሽ ኡባ ኢሲኖካ ኣሾንታ ዲሼ ቤሲዴስ። ኢዛ ሚንጃ ኬን ዲዛ ሚሽ ጊዲን ኢዛ ካዎቴ ጋርሳን ዲዛ ሚሽ ኡባ ቤሶንታ ኣሺዳ ሚሺ ዴና።

3 ሄሳፌ ጉዬ ናቤ ኢሳያሲ ካዎ ሂዝቂያሳኮ ዪዲ፥ «ሃ ኣሳቲ ኔና ኣይ ጊዶ? ኢስቲ ኔኮ ኣዋፔ ዪዶ?» ጊ ኦይቺዴስ።

ሂዝቂያሲካ ዛሪዲ ኢዛስ፥ «ሃ ኣሳቲ ታኮ ሃኮ ቢታፌ ባቢሎኔፔ ዪዳ» ጊዴስ።

4 ኢሳያሲ ቃሴካ፥ «ኔ ካዎቴ ኬፌ ኣይ ቤኢዶ?» ጊዴስ።

ሂዝቂያሲ፥ «ታ ካዎቴ ኬን ዲዛ ኡባ ቤኢዳ፤ ታ ቤሶንታ ኣሺዳ ኢሲ ሚሺካ ዴና» ጊዴስ።

5 ሄሳፌ ጉዬ ኢሳያሲ ሂዝቂያሳስ፥ «ኡባፌ ዎልቃማ ጎዳይ ጊዛይሳ ሲያ፤ 6 ‹ኔ ካዎቴ ኬን ዲዛ ኡባይ፥ ካሴ ኔ ኣዋቲ ሃች ጋካናስ ሺሺዳ ኡባይ ዲኤቲዲ ባቢሎኔ ባና ዎዴይ ያና፤ ኢሲኖካ ኣሾንታ ማጺ ኤፊዛ ዎዴይ ያና› ጌስ ጎዳይ። 7 ኔፔ ዬሌቲዳይቲኔ ኔ ዜሬፌ ዬሌቲዳይቲ ዲኤቲ ቢዲ ባቢሎኔ ካዎ ኬን ጉንዱላ ጊዲዲ ኦና» ጊዴስ።✝39፡7 ዳኔ 1፡1-7፤ 2ካዎ 24፡10-16፤ 2ታሪ 36፡10

8 ሂዝቂያሲ ዛሪዲ፥ «ኔኒ ዮቲዳ ጎዳ ቃላይ ሎኦ» ጊዴስ። ሂዝቂያሲ፥ «ታኒ ዴኢዳ ላይን ታስ ሳሮኔ ዎፓ ጊዶ» ጊ ቆፒዳ ጊሻሳ።