1 ኔስ ዮንታ ዳሼ

ሃራ ይሲዛይሶ!

ኔስ ኣዬ ኣና!

ኔና ኣ ኢሞንታ ዲሺን

ሃራ ኣ ኢሚዛይሶ!

ኔስ ኣዬ ኣና!

ኔኒ ይሶ ኣጊዳ ዎዴ

ኔ ያና፤

ኔኒ ኣ ኢሞ ኣጊዳ ዎዴ

ኔና ኣ ኢማና።

2 ኣቤት ጎዳዉ! ኑና ማራ፤

ኑኒ ኔና ሂዶታ ኦዶስ፤

ማላዶ ማላዶ ኑስ

ዎልቃ ጊዳ፤

ሜቶ ዎዴካ

ኑና ኣሺዛዴ ጊዳ።

3 ኔ ጬንጉርሳይ ዳዳ ማላ

ጉሚዛ ዎዴ ዴሬይ ባቃቴስ፤

ኔኒ ዴንዳ ኤቂዛ ዎዴ

ካዎቴቲ ላሌቴቴስ።

4 ካዎቴቶ!

ቦሌይ ሺቂዛ ማላ

ኢንቴፌ ዲኤቲዳይሲ ሺቃና፤

ጉምባሮይ ጉፒዛ ማላ

ኣሳይ ኢዛ ቦላ ዲርባታና።

5 ጎዳይ ቦላ ሳሎን ዴኢዛ ጊሻስ፥

ቁ ቁ ጊዴስ፤

ኢዚ ጺዮኖ ሱሬ ፒርዳኒኔ

ጺሎቴን ኩንና።

6 ኢዚ ኔ ዲዛ ላይ ኡባን

ኣማንዛ ዮች፥

ኣቶቴ፥ ኣ ኤራቴኔ

ኤራቴ ጊዳና፤

ጎዳስ ያሻቴ

ሃይሳ ሃ ኣቆታታስ

ቁልፔ ጊዳና።

7 ቤኢቴ፥ ኢስታ ጎባ ኣሳቲ

ኦጌታን ዋሴቴስ፤

ሲጋቴስ ኪቴቲዳይቲካ

ጫሞ ዬሆ ዬኬቴስ።

8 ዎጋ ኦጌቲ ሳሚዳ፤

ኦጌራ ካንዛይ ዴና።

ቃቺዳ ቃላይ ላሌቲዴስ፤

ዞሪዛይቲ ካቲዳ፤

ቦንቼቲዛይካ ዴና።

9 ቢታያ ዬካዱሲኔ ጊልቃዱስ፤

ሊባኖሴይ ዬላቲዲ ሹሊዴስ፤

ላሻሮኔይ ኣራቤ ማላ

ባዞ ጊዳዱስ፤

ባሳኔይኔ ቃርሜሎሴይ

ባንታ ሃይ ቆቆፊዳ።

10 ጎዳይ ካዎቴታሲ፥

«ሃኢ ታኒ ዴንዳና፤

ሃኢ ታኒ ቦንቼታና፤

ሃኢ ታኒ ቁ ቁ ጋና።

11 ኢንቴ ኡቱላ ሻሪዲ ሱላ ዬሊዴታ።

ኢንቴ ሼምፒዛ ሼምፖይ

ኢንቴና ሚዛ ታማ።

12 ዴሬይ ቦቂንታ ኬዚዛ ሹቻ ማላ

ታማን ጹጌታና፤

ቃሴካ ኣጉን ቱሻ ማላ

ታማን ኤጻና።

13 ኢንቴኖ ሃኮን ዴኢዛይቶ!

ታኒ ኦዳይሳ ሲዪቴ፤

ማታን ዲዛይቶ!

ታ ዎልቃ ኤሪቴ» ጌስ።

14 ጺዮኔን ዲዛ

ናጋራንቻቲ ዳጋሚዳ፤

ጾሲ ኢስታስ ባይንዳይቲ ባቢዲ፥

«ኑ ጋርሳፌ ጹጊዛ ታማራ

ዳና ዳንዳይዛይ ኦኔ?

ሜርና ታማራ

ዳና ዳንዳይዛይ ኦኔ?» ጊዳ።

15 ጺሎቴን ሄሜቲዛይ፥

ሱሬ ሃሳይዛይ፥

ባሌን ቤቲዛ

ዎ ካዛይ፥

ጉቦ ኤኬናፔ

ባ ኩሼ ሺሺ ኤኪዛይ፥

ኣስ ዎና ዙፔቲዛይታ ዞሬ

ሲያናፔ ባ ሃይ ቱጪዛይ፥

ኢታ ቤያናፔ

ባ ኣይፌ ቂሊምኢዛይ፥

16 ሄሳዴይ ቃሶሆን ዳና፤

ዙማ ሚጻይ ኢዛስ ሺቂ

ኣቲዛሶ ጊዳና፤

ኢዛስ ቁማይ ኢሜታና፤

ሃካ ኢዛስ ፓጬና።

17 ኔ ኣይፌቲ ካዎዛ ፑላቴ ቤኣና፤

ሃኮን ሚጬቲ ዲዛ

ቢታካ ቤኣና።

18 ቤኒ ዋዬይ ኔስ ቆፌቲሺን ኔኒ፥

«ዋና ሃላቃዚ ኣዋ ቢዴ?

ጊራ ኤኪዛይሲ ኣዋ ቢዴ?

ሻኮዛ ኣላፌዚ

ኣዋን ዲዜ» ጋና።

19 ሄይታንቲ ቃታይ ባይንዳ ኣሳ፤

ኢስታ ሃሳያይ

ኣሳስ ጌሎንታይታኔ

ኢስታ ኢንጻርሲ ዴዶቲዛይታ፤

ሃይሳፌ ጉዬ

ኢንቴ ኢስታ ቤዬኬታ።

20 ኑ ባኣሌታ ኢዚን ቦንቺዛ

ጺዮኔ ካታማዮ ቤኢቴ!

ሳሮን ዲዛሶሆዮ፥

ቃጾንታ ዱንካኔ ጊዲዳሮ፥

ኢዚ ቶሌይ ሾዴቶንታሮ፥

ኢዚ ዎዶሮታፔ

ኢሲናካ ዱጾንታሮ

ዬሩሳላሜ ካታማዮ

ኔ ኣይፌይ ቤኣና።

21 ሄን ጎዳይ ኑስ ዎልቃ ጊዳና፤

ሄ ሶሆይ ዳልጋ ሻፋኔ

ካንቼ ጊዳና፤

ዎጎሎይ ኢዛ ቦላራ

ባናስ ዳንዳዬና፤

ጊታ ማርካቤቲካ

ኢዛ ቦላራ ቤቴና።

22 ጎዳይ ኑስ ፒርዲዛ ዳና፤

ጎዳይ ኑስ ዎጋ ኢሚዛዴ፤

ጎዳይ ኑስ ካዎ፤

ኑና ኣሻናይካ ኢዛ።

23 ኔ ቶሌ ዎዶሮይ ሌፒዴስ፤

ቱሳይ ሚኒ ኤቂቤና፤

ሻራዚ ቶሌቲቤና፤

ሄ ዎዴ ዲኤቲዳ

ጊታ ሚሺ ጊሼታና፤

ዎቤይካ ኣቶንታ ዲኦ ኤካና።

24 ጺዮኔን ዲሼ፥ «ታ ሳኬታዲስ»

ጋና ኣሲ ዴና፤

ሄን ዴኢዛ ኣሳታ ናጋራይ

ኣቶ ጌቴታና።