ጾሳ ዴራ ኣሺዛዴ
1 ሃኢ ጊዲኮ ያቆቤ፥
ኔና ሜዳይ፥
ኢስራኤሌ! ኔና ጊግሲዳ ጎዳይ፥
«ታኒ ኔና
ዎዚዳ ጊሻስ ያዮፋ።
ታኒ ኔና ኔ ሱንን ጼይጋዲስ፤
ኔኒ ታሳ።
2 ኔኒ ሃ ጊዶራ ፒኒዛ ዎዴ፥
ታኒ ኔናራ ጊዳና።
ኔኒ ፒኒሺን
ሻፋይ ኔና ሚቴና፤
ኔኒ ታማ ጊዶራ ቢሺን
ኔና ጹጌና፤
ታማ ላጮይካ ኔና ሜና።
3 ጋሶይካ ታኒ ጎዳ ኔ ጾሳይ፥
ኢስራኤሌ ጌሻይ ኔስ ሌ፤
ታ ኔ ጊሻስ
ጊብጼ ዎዞ ኢማና፤
ቶጵያኔ ሴባ
ኔ ጊሻስ ኣ ኢማና።
4 ኔኒ ታ ሲንን ኣልኦኔ
ቦንቾ ጊዲዳ ጊሻስ፥
ታኒ ኔና ሲቂዛ ጊሻስ፥
ኣሳ ኔ ጊሻስ፥
ካዎቴታ
ኔ ሼምፖ ጊሻስ
ላሜ ኢማና።
5 «ታኒ ኔናራ ዲዛ
ጊሻስ ያዮፋ፤
ታኒ ኔ ናይታ ኣርሼይ
ሞኪዛ ባጋፌ ኤሃና፤
ኔና ኣርሼይ ዉሊዛ ባጋፌ ሺሻና።
6 ታኒ ፑዴሃ ባጋ፥ ‹ሃማ›
ዱጌሃ ባጋካ፥ ‹ዬዳ› ጋና፤
ታ ኣቱማ ናይታ ሃሆፔ፥
ታ ማጫ ናይታካ
ቢታ ጋጻፔ፥
7 ታ ሱንን ጼይጌቲዳ ኡባ፥
ታ ቦንቾስ ታ ሜዳይታ፥
ታኒ ጊግሲዳይሳኔ
ታ ኦዳይሳ
ሃሚቴ» ጋና።
8 ኣይፌይ ዲሺን ቆቂዳይታ፥
ሃይካ ዲሺን
ቱሊዳይታ ኬሳ።
9 ካዎቴቲ ኡባይ
ኢሲፌ ሺቄቶ፤
ኣሳይካ ኢሲ ቦላ ሺቆ፤
ኢስታፌ ካሴቲዲ
ሃይሳ ኑስ ዮቲዳይ ኦኔ?
ቤኒ ሚሽ ኑስ ኣዋጂዳይ ኦኔ?
ሃራቲ ሲዪዲ፥
«ሃይሲ ቱማ» ጋና ማላ፥
ኢስታ ቱማቴይካ
ቆንጫና ማላ
ባንታ ማርካታ ኤሄቶ።
10 «ኢንቴ ታና ኤራና ማላኔ
ኣማናና ማላ፥
ኢዚ ታና ጊዲዳይሳ
ኢንቴ ኣኬካና ማላ፥
ታ ማርካቲኔ ታ ዶሪዳ
ታ ኣይሌቲ ኢንቴና።
ታፔ ካሴ
ሃራ ጾሲ ኦሴቲቤና፤
ታፔ ጉዬንካ
ሃራ ጾሲ ዴና።
11 ታና፤ ታኒ ጎዳ፤
ታፔ ኣቲን ሃራ ኣሺዛይ ዴና።
12 ታኒ ቆንጪሳዲስ፤
ኣሻዲሲኔ ዮታዲስ፤
ኢንቴ ጊዶን ሃራ
ኣላጋ ጾሲ ዴኢቤና።
ታኒ ጾሳ ጊዲዳይሳስ
ኢንቴ ታ ማርካታ።
13 ቤኒሶፌ ዶማዳ ታኒ ታና፤
ታ ኩሼፔ
ኬሲ ኤካናይ ዴና፤
ታ ኦዛይሳ ላማናዉ
ዳንዳይዛይ ኦኔ?» ጌስ ጎዳይ።
ኣማኔቶንታ ኢስራኤሌስ ጾሳ ማሮቴ
14 ጎዳይ ኢንቴና ዎዚዛ
ኢስራኤሌ ጌሻይ፥
«ኢንቴ ጊሻስ ባቢሎኔ ቦላ
ኦላንቻታ ኪታና፤
ኢስቲ ጬቄቲዛ ማርካቤታን፥
ባቢሎኔታ ኡባ
ቤታና ማላ ኦና።
15 ታኒ ጎዳይ ኢንቴ ጌሻይ፥
ኢስራኤሌ ሜዳ
ኢንቴ ካዎ» ጌስ።
16 ኣባ ጊዶራ ኦጌ፥
ዎልቃማ ሃ
ጊዶራ ኣዛሶ
ኬሲዳ ጎዳይ፥
17 ፓራ-ጋሬታኔ ፓራታ፥
ኦላንቻታኔ
ሚኖ ኣሳታ ኡባ ኤሂዲ፥
ኢስቲ ዛሪ ዴንዶንታ ማላ
ዛቁሊሲዳ ጎዳይ፥
ሙቃዳ ቢድን ማላ
ኢስታ ይሲዳ ጎዳይ፥
18 «ቤኒ ዮኦታ ሃሳኦፒቴ፤
ካሴ ኣዳይሳ ባሊቴ።
19 ሄኮ ታ ኦራ
ሚሽ ኦና፤
ኢዚካ ሃኢ ሃናና፤
ኢንቴ ዩሺ ቆፔኬቲ?
ታኒ ባዞን ኦጌ ጊጊሳና፤
ታኒ ኣይኮይ ባይንዳ ባዞንካ
ሻፋታ ኬሳና።
20 ባዞ ዶኣቲ፥
ዎራካናቲኔ ጉቶቲ
ታና ቦንቻና።
ታኒ ባዞ ቢታን ሃ፥
ኣይኮይ ባይንዳ ባዞንካ
ፑልቶ ኢማና፤
ታ ዶሪዳ ታ ዴራስ
ሃ ኢማና።
21 ታኒ ታስ ጊግሲዳ ዴሬይ
ታ ጋላታ ኣዋጃና ማላ
ታ ሃይሳ ኦና።
22 «ያቆቤ፥ ኔ ታና ጼይጋቤካ፤
ኢስራኤሌ፥ ኔ ታና ሳሌታዳሳ።
23 ኔኒ ታስ ጹጌቲዛ ያርሾስ
ዶርስ ኤሃቤካ፤
ኔ ያርሾንካ
ታና ቦንቻቤካ።
ታኒ ኔና ካ ያርሾን
ዋዪሳቤኬ፤
ኤጻኔ ያርሾንካ
ሳሌቤኬ።
24 ኔኒ ታስ ሎኦ
ሳዊዛ ኤጻኔ ሻማቤካ፤
ሞ ያርሾን ታና ካልሳቤካ።
ጊዶ ኣቲን ኔ ናጋራ ቶሆ
ታና ቶሳዳሳ፤
ቆሆን ታና ዳቡርሳዳሳ።
25 «ታ ጊሻስ ጋዳ
ኔ ቆሆዛ ይሲዛይ ታኒ ታና፤
ኔ ናጋራ ታ ቆፒኬ።
26 ኣኔ ካሴ ኣዳይሳ
ታና ቆፍሳ፤
ኣኔ ኢሲፌ ሺቂዲ ቆቶስ፤
ኔ ቱማቴ ኣኔ ኤሪሳ።
27 ኔ ኣዋ ኮይሮይሲ
ናጋራ ኦዴስ፤
ኔ ኣስታማሬቲካ
ታ ቦላ ማካሊዳ።
28 ሄሳ ጊሻስ ታኒ ኔ
ጾሳ ኬ ሃላቃታ ካዉሻና፤
ያቆቤ ባሻስ፥
ኢስራኤሌካ ጫሻስ
ኣ ኢማና» ጌስ።