1 ኢንቴኖ ሃሩሮቶ፥

ታ ጊዛይሳ ሲዪቴ።

ኢንቴኖ ሃሆን ዲዛ

ካዎቴቶ፥

ሃይሳ ኤዝጊቴ።

ታኒ ታ ኣዪ ኡሎን ዲሺን

ጎዳይ ታና ጼይጊዴስ፤

ታ ዬሌቶንታ ዲሺን ታና

ታ ሱንን ጼይጊዴስ።✝49፡1 ኤር 1፡5

2 ታ ኢንጻርሳ

ጊ ማሻ ማላ ቃራሲዴስ፤

ባ ኩሼ ኩዋን

ታና ጌንዴስ፤

ኢዚ ታና ሆጼ

ዪሻ ማላ ኦዴስ፤

ሂስቲዲ ባ ኮሆ ጊዶን

ታና ቆቲዴስ።✝49፡2 ኢብ 4፡12፤ ኣጁ 1፡16

3 ኢዚ ታና፥ «ኢስራኤሌ

ኔ ታ ኣይሌ፥

ታኒ ታ ቦንቾ

ኔናን ቆንጪሳና» ጊዴስ።

4 ጊዶ ኣቲን ታኒ፥

«ታኒ ሜላ ጮ ዳቡራዲስ፤

ጎኣይ ባይንዳ

ጮ ሃዳ ሚሻን

ታ ዎልቃ ዉርሳዲስ፤

ጊዲኮካ ታ ኦሶዛስ

ኩሼ ዛራናይ ጎዳ፤

ታ ዋጋይካ

ታ ጾሳ ማታና» ጋዲስ።

5 ሃኢ ታኒ ጎዳ ኣይፌ

ሲንን ቦንቼታዲስ፤

ጾሳይ ታስ ዎልቃ ጊዲዴስ፤

ታኒ ያቆቤ

ኢዛኮ ዛራና ማላ፥

ኢስራኤሌ ኢዛኮ ሺሻና ማላ

ኦዳ ጎዳይ

ሃኢካ ዛሪዲ፥

6 «ኔኒ ታስ ኦሳንቻ ጊዴ፥

ያቆቤ ቆሞታ

ኔ ዛራናይሲኔ

ታ ናጊዳ ኢስራኤሌ ዛራዳ

ኔ ኤሃናይሲ

ሄሲ ኔና ዴጼና፤

ቃሴካ ታ ኣቶቴ

ቢታ ጋጻ ኔ ጋና ማላ፥

ታኒ ኔና ካዎቴታስ

ፖኦ ሂስታና» ጌስ።✝49፡6 ኢሳ 42፡6፤ ሉቃ 2፡32፤ ሃዋ 13፡47፤ 26፡23

7 ካቲዳይሳሲኔ

ካዎቴን ኢጼቲዳይሳስ፥

ዴሬ ሃሪዛይታ

ኣሽካራ ጊዲዳ ኔስ፥

ጎዳይ፥ ኢስራኤሌ

ኣሺዛ ጌሻይ፥

«ካዎቲ ኔና ቤኢዲ ዴንዲ ኤቃና፤

ካዎ ናይቲ ኔና ቤኢዲ

ኔስ ዚጋና፤

ጋሶይካ ኔና ዶሪዳ ጎዳይ፥

ኢስራኤሌ ጌሻይ

ኣማኔቲዳዴ» ጌስ።

8 ጎዳይ፥ «ታኒ ዶሪዳ ዎዴ

ኔ ኦይሻ ዛራና፤

ኣቶቴ ጋላስ

ታኒ ኔና ማዳና፤

ዴራስ ጫቆ ቃላ ጊዳና ማላ፥

ቢታዮካ ኔ ዛራ ኤሳና ማላ፥

ካሴ ቢታ ዬጊ ይዳይታስ

ኢስታ ጺንጾ

ኔ ዛራ ኢማና ማላ፥

ታ ኔና ማዳና፤

ታ ኔስ ኦና።✝49፡8 2ቆሮ 6፡2

9 ኔኒ ዲኤቲዳይታ፥

‹ሃ ኬዚቴ!›

ማን ዲዛይታ፥

‹ፖኦን ኬዚቴ›

ጋና ማላ ታ ኦዲስ።

ኢስቲ ኦጌይ ዲዛሶን ዲዛሶን

ካ ማና፤

ኣይኮይ ባይንዳ ዙምቡላ ቦላ

ሄሜቲዛሶ ዴማና።

10 ኢስቲ ጋፌቴቴና

ዎይኮ ሳሜቴቴና፤

ኢስታ ባዞ ቢታ ሴላይ

ዎይኮ ኣዋ ሴላይ ቆሄና።

ኢስታስ ቃቲዛይ

ኢስታ ካሌና፤

ሃ ፑልቶይ ዲዛሶን

ኢስታ ሄማና።✝49፡10 ኣጁ 7፡16-17

11 «ታ ዙማታ ኡባ

ኦጌ ኬሳና፤

ታ ዎጋ ኦጌቲካ ቁ ጋና።

12 ሄኮ ኢስቲ ሃሆ ዴሬፔ ያና፤

ኢሲ ኢሲኔቲ ፑዴሃፔ፥

ባጋይቲ ኣርሼይ ዉሊዛ ባጋፌ፥

ሃንኮ ኣቲዳይቲ ሲኒሜፔ

ያና» ጌስ።*49፡12 ሲኒሜ ጌቴቲዛይ ሃኢ ዎዴን ኣሴዋ ጌቴቲዛ ጊብጼ ካታማኮ።

13 ሳሎቶ ኢንቴ፥ ኢሊሊ ጊቴ፤

ቢታዬ ኔኒ ኡፋዬታ።

ኢንቴኖ ዙማቶ ኡፋይሳን ዬጺቴ፤

ጋሶይካ ጎዳይ

ባ ዴራ ሚንስ፤

ሜቶታንቻታስ ቃቴስ።

14 ጺዮና ጊዲኮ፥

«ጎዳይ ታና ኣጊዴስ፤

ጎዳይ ታና ባሊዴስ» ጋዱስ።

15 ጎዳይ፥ «ኣያ ባ ንዛ ና

ባላናስ ዳንዳያዜ?

ባ ዬሊዳ ናስ ቃቴኬ?

ኦኔ ኤሪዛይ

ኢዛ ባላና ዳንዳያዉስ፤

ታኒ ጊዲኮ ኔና ባሊኬ።

16 ሄኮ ታኒ ኔና

ታ ኩሼ ቃኣን ጻፋዲስ፤

ኔ ዲርሳ ጊምቤቲካ ኡባቶ

ታ ሲንን ዴቴስ።

17 «ኔ ኣቱማ ናይቲካ

ኤሶን ሲማና፤

ኔና ላሊዳይቲ ኔፔ ባቃታና።

18 ኣኔ ቁ ጋዳ

ኔ ዩሾ ጼላ፤

ኔ ናይቲ ኡባይ ኢሲፌ ሺቂዲ

ኔኮ ያና።

ታኒ ጎዳይ ታ ዴኦን ጫቃይስ፤

ኔኒ ኢስታ ኡባ

ኣሌቆ ማላ ማይኣና፤

ኔ ኢስታ ሚሺራ ማይኦ ማላ

ማይኣና» ጌስ።

19 «ኔ ላሌታዳ ቡላ ጊዲኮካ፥

ኔ ቢታይ ሙሌራ ይኮካ፥

ሃች ኔኒ ኔ ዴሬዛስ

ጹን ጊዲኮካ፥

ኔና ሚቲዳይቲ

ኔፔ ሃካና።

20 ጬጬ ዎዴ ኔ ዬሊዳ ናይቲ፥

ኔ ሃይ ሲዪሺን፥

‹ሃይሲ ጋዴይ

ኑስ ኬሂ ጹሚዴስ፤

ኑ ዳናስ ኑስ

ጊዲዛሶ ኢማ› ጋና።

21 ኔኒ ኔ ዎዚናን፥

‹ሃይታ ታስ ዬሊዳይ ኦኔ?

ታኒ ጬጪዛዴኔ ማይኔ፤

ታኒ ጎዴቲዳዴኔ

ኢጼቲዳዴ ጊዳ ዲሺን

ሃይታንታ ዲቺዳይ ኦኔ?

ታኒ ታርካ ኣታዲስ ሺን

ሂስቲን ሃይታንቲ

ኣዋፔ ዪዶ?› ጋሳ» ጌስ።

22 ኡባ ሃሪዛ ጎዳይ፥ «ቤኣ፥

ታኒ ካዎቴታ

ማላታን ጼይጋና፤

ታኒ ታ ባንዲራ ኣሳስ

ቁ ሂስታ ኤሳና፤

ኔ ኣቱማ ናይታ

ኢስቲ ኢዲሚ ኤሃና፤

ኔ ማጫ ናይታካ

ባንታ ሃሼን

ቶኪዲ ኤሃና።

23 ካዎቲ ኔና ዲቺዛ

ኣዋታ ጊዳና፤

ኢስታ ማቼቲ ኔና ዲቺዛ

ኣዬታ ጊዳና፤

ኢስቲ ጉፋኒዲ ኔስ ጎይናና፤

ኔ ቶሆ ቦላፌ

ባናካ ላጫና፤

ኔካ ታኒ ጎዳ

ጊዲዳይሳ ኤራና፤

ታናን ሂዶታ ኦዛይቲ

ዬላቴቴና» ጌስ።

24 ዲኢ ኤኪዳ ሚሽ ኦላንቻታፔ

ጉዬ ዛራናስ፥

ዲኤቲ ቢዳይታ

ሜንጼ ኢታታ ኩሼፔ

ኣሻናስ ዳንዳዬቲዜ?

25 ጊዶ ኣቲን ጎዳይ፥

«ቱሙካ ኦላንቻቲ

ዲኢ ኤፊዳ ሚሽ

ኬሲ ኤካናስ፥

ሜንጼ ኢታታ ኩሼፔ

ዲኤቲዳይታ ኣሻናስ

ዳንዳዬቴስ፤

ኔናራ ኦሌቲዛይታራ ታ ኦሌታና፤

ኔ ናይታካ ታኒ ኣሻና።

26 ኔና ኡንኤዛይቲ

ባንታርካ ባ ኣሾ ማና፤

ዎይኔ ኡሻን

ማቲዛ ማላ

ባንታርካ ባ ሱን

ማታና፤

ሄሳፌ ጉዬ ኣሳ ዜሬ ኡባይ፥

ታኒ ጎዳ፥ ኔና ኣሺዛይሳ፥

ኔና ዎዚዛይሳኔ

ያቆቤ ዎልቃማ ጊዲዳይሳ

ሄሳን ኤራና» ጌስ።