1 Duuchchi Woddik Goottinna Muuse hiyyee qici: 2 «Edise ilemeeka duuchcha ani'a woyyoonsi; Isira'eelike ardi giddo hore manjokenaa'n gorommummatee'n ilemeek angaf anken» hiyye.

3 Muusenna arda hiyyee qici, «Tinni barra garbumma galdinammake Gibtseke boganaa'n fuldineexxe kaddemmaxxee tennee barra qalli hiyye; Duuchchi Woddiki Gootti lumoxxe ifixxe hunnan ha'no'o fulcheeki tenne barra'niten; gamami e'yeechcho itinoqqe'e. 4 Ha'no telcho Abiibike agenjo'n Gibtseke boganaa'n fuldineen. 5 Duuchchi Woddiki Gootti ha'no'aa uwwo'a edike ha'nooke annuwwi wodda kakatemmaka ado callikanna malbi callika, Kenaanitotike, Hiititotike, Amooritotike, Hiwaatichchinkenna Iyyaabusitotike boga'n ha'noo iyyedagaa wodda tenne magenoonfachcho kone agenjo'n assitinaan. 6 Torbaane barra gamami e'yebaaxxe bulleka xalta ittinaan; torbaxxe barra Duuchchi Woddike Gootti'a ayyaanxe kaddaan. 7 Tenne torbaane barra'n gamami e'yebaaxxe bulleka xalta itte; ha'noo giddo gamami e'yeechchi mittilchinna afemoqqe'e; atike bogixxe gabala'n, hoone boncho'ninna gamami leelloqqe'e. 8 Eettene barra'n belto atike'n ‹Tenne assaannechchi Gibtsee'n fullenne wodda Duuchchi Woddiki Gootti ani'a assemmaxxe yaanexxeeten› hite kul. 9 Duuchchi Woddiki Gootti, lumoxxe ifixxe hirrenni ha'noo Gibtse'n fulchemmaxxee, kunni seeri ha'nooke afo'o'n hedho'a kunni ayyaani anga ha'nooxxe'n ussudhitineeke beessissishsha, xiyyo ha'nooxxe'ninna hedheeke qalli sanjisanjo ha'no'a kadaan. 10 Konne ayaana murendexxe yanna'n wogga wogga'ninni ulfeesse.

11 «Duuchchi Woddiki Gootti ha'no'anna ha'nooke edike annuwwi'a uwwatee kakoti addachchiisema qicinni Kenaanike boga'n ha'no iyyedageexxi ookkonee boga ha'no'a uwwaa wodda, 12 Gorommummate'n ilemaaka duuchcha Duuchchi Woddike Gooti'a utinaan; iittanni hori ha'nook edise ilaak duuchchi Duuchchi Woddike Goottike kadaan.✝ 13 Yaane kinni edisse ilendeexxa harretixxa beltanjo gedhebiinke buruusinni wodde; ookkone harrichchonna woda gophphinoole kinni gooba isika micciirre; ha'nooxxe oose giddii'n angaffa kadeeka duuchcha wodde.

14 «Edi'a dagaake baro'n, belti atik, ‹Tennee aada, maa hiyyotte› hiyye atee qoroole, ‹iso'ninna Duuchchi Woddik Gootti lumoxxe ifixxe hirrenni no'oo garbummatike boganaa'n, Gibtsee'n fulcheen. 15 Feri'oon goodoba jabeessedheexxi me'inona'a no'oo wocci assa gibee wodda Duuchchi Woddiki Gootti Gibtseke boga'n ilmeeka hori manjika edise ilemeeka duuchcha shiye; tennexxeten ani Duuchchi Woddike Gootti'a gorommummati ilemeeka labbaka angafa tolchannechchi, edise ilendeexxa anxa labbaxxa oose duuchchanna woda'eennechchi› 16 Duuchchi Woddiki Gootti lumoxxe ifixxe hirrenni no'oo Gibtsee'n fulchemmaxxee tinni aada anga no'oxxe'ninna xiyyo no'ooxxe'n no'aa beessisake kadaan» hine.

17 Mageni, «Isira'eeliki ardi naaphiki futti hiyye'e yaada jijiidhdhe Gibtse'a ilee iima higaaxxe hexxeen» hiyye hedemmaxxee, Feri'oon me'ino'a insa'ne'e wocci assee wodda shiqike ora kadeexxe kaddoolenna midde Filisixeemi giddika ora me'ino'a insa'ne'e akeekeba'a. 18 Tennexxee Magen ardi qiilla gammoojjexxe dowweka ora Diimmoxxe Abbaayyabaa me'inaashsha akeeke; Isira'eelik ardinna lolakee googeesse'e Gibtseke boganaa'n fule.

19 Yooseefinna, «Mageni ha'no'a dagaaxxi kokaken; ookkone wodda miqe anxa aaxine konne boganaa'n fulle» hiyyeexxi Isira'eelika arda kakachchiiseemmaxxee Muuse Yooseefixxa miqe aadhe fule.

20 Insa'nenna Sukootinaa'n ke'neexxi Eetaami qiilla gammoojjeke kasa'n qecence offolle. 21 Tennexxe'e hashsha barra me'a dandeennaashsha Duuchchi Woddiki Gootti insa'ne'e ora akeeko'a barra dimma duumachchinni hashsha kinni ifiso'a giiratike ifinjinni insa'ne edo me'aamman. 22 Hashshanna kadi barra giiratik ifinji insa'ne edi edii'n gargar higeexxi yanna hexxemmabaan.