Fulatikaa 8

Raachchuwinxa Bala

1 Duuchchi woddiki Goottinna Muuse’e hiyyee qici, «Feri’ooniba martettexxi, ‹Duuchchi Woddiki Gootti hiyya’nee qic: Ardi anki mare anee magenoonfato’a arda anka wocci assi. 2 Me’ino’a insa’nee wocci assa gibbottole, boga atika duuchcha raachchuwwik ganannon. 3 Abbaayik galaanake’ninna raachchuwwi wo’maan; raachchuwwikinna fule dageexxi atike mootommatike mine’n, atixxe diiphiinxe kuta’n, atixxe taqe’n, atike ja’laabuwwiinke minuwwa’ninna atike ardike minuwwa’n, booso atixxe’ninna atike ra’issiinke miya duuchcha’n e’yaan. 4 Raachchuwwikinna ate’ni arda atike’ninna atike ja’laabuwwi hana timaan› » hiyye.

5 Duuchchi woddiki Goottinna Muusee, «Aaroonii’i, ‹Siqqichcho atixxa aaxxettexxi muummuwwate’n dareeruwwake’ninna baleessuwwake’n anga atixxa diriirsati raachchuwwi Gibtseke boga’n dagaashsha assi› hiyyi» 6 Tennexxe Aaroon Gibtseke bogike wodu’uwwi hana anga ifixxa diriirse; raachchuwwikinna fule dageexxi boga duuchcha buqe. 7 Yaane kinni gojaaleeyyetinna ifixxe gojjonni tennenni assite; Gibtsike boga’n raachchuwwi dagaashsha assine.

8 Feri’ooninna Muusenna Aaroonii ye’eexxi, «Raachchuwwa anenaa’ninna anke ardinaa’n fuggussaashsha Duuchchii woddika Gootta soodatte; Duuchchi Woddike Gootti’aanna tolcha tolcho’a arda me’o’a wocci assannon» hiyye.

9 Muusenna Feri’ooni’i, «Raachchuwwi atenaa’ninna atike minuwwinaa’n ba’eexxi Abbaayike galaan giddo calla gataashsha ati’a, atike ja’laabuwwi’aanna arda atikee soodatannoxxa yanna ani’a muri» hiyye.

10 Feri’ooninna, «Soodo» hiyye.

Muuseenna hiyye hiissee qici, «Duuchchi Woddika Gootta no’oke Magenishsha hedheek hedhebaaxxa egendota’a ati hitetteshshanni kadduun hiyye. 11 Raachchuwwikinna atenaa’ninna atike minuwwinaa’n, atike ja’laabuwwinaa’ninna atike ardinaa’n fuggussemmeexxi Abbaayike galaan giddo calla gataani» hiyye. 12 Muusenna Aaroon feri’oonibaa’n fulle; Muusenna Duuchchii woddiki Gootti Feri’ooni’n idagemmake raachchuwwixxe Duuchchi Woddike Goottiba’a raare. 13 Duuchchi woddik Goottinna Muuse hiyyemnashshanni asse. Raachchuwwikinna mini mini giddo, dalla’uwwi giddonna diida diidange’n reye. 14 Ardikinna raachchuwwa mitteba tuulle; bogi duuchchinna bobe. 15 Feri’ooninna yaane folowwi hiteexxa uude wodda higgeen qalbe jabeessedhe; Duuchchi woddiki Gootti hiyyemmashshanni Muusexxanna Aaroonixxa laqa gibe.

Woraanchiinxa Bala*8:16 WoraanchaWele tikuwwa’n ibbe hiyyende’een.

16 Ookkoneechchi uduma Duuchchi woddik Gootti Muuse’e, «Aarooni’i ‹Siqqichcho atixxa diriirsite’e bogiinxa buko gani› hiyye; Gibtsek bogi giddo duuchcha’n buko woraancha kaddaan» hiyye. 17 Insa’nenna hiyyendemmashshanni assine; Aarooninna anga diriirseexxi siqqichcho ifixxenni buko gane; woraanchikinna manjo hore duuchcha’n time; Gibtseke bogi giddi duuchchiinxi bukonna woraanchake kadde. 18 Yaane kinni gojameeyye ifixxe gojjonni woraancha idagatee wo’laande; yaane kinni dandeetteba’a; woraanchikinna manjo horenge’n hedhemman. 19 Gojaameeyyetinna Feri’ooni’n, «Tinni Duuchchi woddike Goottixxe angan» hite. Feri’oon kinni godoba ifika jabeessedhe; Duuchchi Woddiki Gootti hiyyemmashshanni Muusexxanna Aaronxa laqeba’a.

Woraancha

20 Duuchchi woddiki Gootti Muuse’n, «Soodo gorsanni ke’i; Feri’oon lagi’a me’a wodda isi edo shiqettexxi, Duuchchi Woddik Gootti hiyya’neen hitatto qici: ‹Ardi anki anee magenoonfato’a wocci assi. 21 Ardi anki me’o’a wocccassa gibbaattole, ani ate’n, atike ja’laabuwwa’n atike arda’ninna atike minuwwa’n tiitichchiinka haagana wocci assanon; tiitichchuwwikinna Gibtseke ardike minuwwa’ninna boga insa’neeke duuchcha’n wo’maan. 22 Yaane kinni konne boga’n ani Duuchchi woddiki Gootti hedhennexxa egendino’a eettene barra’n ardi anki hedha’neeke Geesemike boga’n gargarunte hexxaashsha assannon; tiitichchiinki haagan ookko hedhabaan. 23 Anke ardixxe’ninna atike ardixxe oddo’n gargarunte hexxaashsha assannon; kunni manbe’iink beessis soodo kadaan› » hiyye. 24 Duuchchi woddiki Gootti ha’ureeka tiitichchiinka haagana Feri’oonike mootomatike mine’ninna isike ja’laabuwwike mine’n dagaashsha asse; Gibtsek bogi duuchchi tiitichchiinke haagananaa’n kexxeexxa gara gopheemman.

25 Feri’ooni Muusenna Aaroonii’i ye’eexxi, «Martineexxi konne boga’ninni Mageno ha’nooke’e tolcha tolche» hiyye.

26 Muusenna «Tinni assemiyyo hassissabaan; Duuchchi woddike Gootta no’oke Mageni’a tolchinannok tolchi Gibtseka manna diqachchiisaken; ille insa’nexxe’n diqachisaaka tolcha tolchinonnoleta no’oo cancaqa gonphaa? 27 Duuchchi Woddik Gootti no’ok Magen tolcha isi’a tolchinannoshsha ajajemmashshanni qiilla gammoojje giddo sase barraka ora me’inannon» hiyye.

28 Feri’ooninna, «Duuchchi Woddike Gootta ha’nooke Mageni’a tolcha tolchitino’a ha’noo wocci assaannen yaane kinni bayyattine me’itinoqqe’e. Ani’anna soodate» hiyye.

29 Muusenna hiyyee qici, «Ta’a kunnise ani ati edii’n gargar higenneshshanni Duuchchi Woddika Gootta soodatannon; atenaa’ni atike ja’labuwwinaa’ninna arda atikenaa’n soodo tiitichchiinki haagan gataan. Yaane kinni ardi Duuchchi woddike Gootti’a tolcho’a me’a hoyyatee baseessitoxxe» hiyye hiisse.

30 Ookkoneechchi uduma Muuse Feri’oonibaa’n gargar higeexxi Duuchchi woddika Gootta soodatte. 31 Duuchchi woddiki Goottinna Muuse soodateemmashshanni asse: tiitichchiink haaganinna Feri’ooninaa’n, isike ja’labuwwinaa’ninna isike ardana’n mitti tiitichchinna midde gatebaan. 32 Feri’ooni eettene yanna’ninna qalbe jabeessedhee malee me’o’a arda wocci assebaan.