Fulatikaa 31

Basili’eeliinna Oholi’aabii’i

1 Ookkoneechchi uduma Duuchchi Woddiki Gootti Muuse’e hiyyee qici: 2 «Yihudaxxe gosanaa’ni Uurika beltonna Huurika akka’o kadeeka Baatsili’eeli fi’leennen. 3 Heeneenna ogetixxa huje hujo’a galchecca, ege’natanna dande’a afaashsha Hafuuri anki iso’ni hedhaashsha assenneni; 4 Tennexxee maliki hunjaaqico qixxeessati worqeti, birretike sibiljininna sageetotike sibiljinni gargar gargariti hedheeka miya giissaan. 5 Seesa ugginaaka kinjo shate giissatee haqqetanna xabbatee wele ogetixxa huje hujaaka beekkuma uwweennen. 6 Isinni welti hujaashsha Daanixxe gosanaa’ni Oholi’aabika belto Ahisaamakii’i fi’leennen; hujendaashsha ajajenexxa yaane duuchcha hunjaashsha mise yaane giissatixxa dande’a duuchchingee angatixxa huje hujaake duuchchi’a uwweenen. 7 Hunjaashsha ajajenneechchuwwi: ulfinniki leellannoka dunkaane, Kakotika Taabotanna buyyisanjo isikenni welti la’o uwwaaka wele dunkaani giddika miyuwwa duuchcha, 8 Beerakanna isi’a hasisaaka miya, torbaane dhankoka xassana isi’a hasisaachcho duuchcha, hixaana gunbaachcho, 9 Ciincatike tolchi’a kadaaka qephphinna giissine hasisaachcho duuchcha, ansheccatixxa kooriinxa qore, 10 Aarooninna labbaxxi oose isixxi qeesummati ani’a ergatemati wodda oddo’winaaxa danchchalama seemmuwwa, 11 hariirtetixxa zayitenna woyyichcha boonchi’a kadaaka fishshaaka hixaana; konne duuchcha ani atee ajajenneshshann giissinaan» hiyye.

Sanbata, Hafuura Adhdhatixxa Barra

12 Ookkoneechchi uduma Duuchchi Woddiki Gootti Muuse’e hiyyee qici: 13 «Isira’eelixxe oose’ni, ha’noo arda anke assedhennexxa leellishaashsha ha’nooxxe oddo’ninna anxe oddo’ni beessisa kadaashsha anxe hafuura adhdhatixxe barra asse filenneka sanbata heqqedhdhe. 14 Woyyoondeexxe barra kaddemmaxxe’e sanbata hafuura adhdhatixxa barra ulfeese; ayinna ulfeessa gibe eettene barra huje hujaaki manji ardi giddii’n shiyeme fulowwaal. 15 Huje ha’nooxa duuchcha hujjinaaxa jaane barra affine’en; torbaxxi barra kinni ani’a gargar foyende woyyite barran; tenne barra’ni hujaaka duuchcha shinnowaal.✝31:15 Fula. 20:8-11; 23:12; 34:21; 35:2; Lew. 23:3; Lew. 5:12-14. 16 Isira’eeliki ardi tinni barra aagennexxe kakoke beesisa kaddemmaxxe’e heqqedhowwaal; 17 Ani Duuchchi Woddiki Gootti iimatanna butta jaane barra giddo dade bire’e torba baro huje uurrise hafuura adhdhennexxe barra kaddemmaxxee’e anxenna Isira’eelike ardixxe oddo’ni duuchchi woddi’a hedhaake beessisan» hiyye.✝31:17Fula. 20:11.

18 Mageni Muusenni Siinaxxe kooba’ni haaso’ammaka haaso’a bireechchi uduma Mageni umi ifingenninni ifika seera itti borreessemmaaxxa lame kino uwwe.