1 «Qeesete kandeexxi ani'a ergatemmo'a Isira'eelike ardi giddii'n dayyo atika Aarooniinna isixxa labbaxxa oose Naadabi'i, Abihuu'u, Ali'aazaarinna Itamaarii'i atibaa dangaashsha assi. 2 Woyyitte seemmanna isi'a gaachchanna uute danchoossito'a dayyo atike Aarooni'a giissi. 3 Qeesete kadeexxi ani'a ergatemo'a foyemo'a beekkuma insa'ne'a uwweek tenne yaanne'ni beekake kadeeke manna duuchcha'n, Aarooni woyyitte seemma giissino'a kuli. 4 Insa'nenna giissinaaxxi seemmuwwa: qomatixxa seemma, Efuude, qamise, seesi gobemeexxa qolo, ruufanna hiito, qeesete kande ani'a ergatemmo'a Aarooni'anna isixxe labbaxxe oose'a tinni woyyitte oddoonuwwa giissendaan. 5 Worqe, iimatixxa bifa, baddeessitte, dhiille shimalanna eloxxa layino la'ooffantowwaal.

6 «Gobe seesaak manni Efuude worqetixxa iimatixxe bifaxxa, dhiille shimalixxanna suqendeexxe eloxxe layinoxxa seema giissowwaal. 7 Efuudenna dugummotik lamii darri mitteek kadaasha lamiinxa dugummo mitteba gence assaaka teepha affuun. 8 Gobeme giissemeek efuudik sabat worqetike iimatixxe bifake baddeessittetike, dhiille shimalakenna suqendeexxe eloxxe layinoke kadeexxi Efuudeti abidisemeke kadowwaal. 9 Lame meregidixxa fiixa kino aaxxettexxi ise hana Ya'iqobixxe labbaxxe ooseka summa xabbati borreess. 10 Weli iima ilendemma qicinni jaane summa mitte kinji hana wele gateeka jaane weleke'n xabbati borreess. 11 Angatixxe ogek hujalli maxxansa xabbe giissammashsha Ya'iqoobixxe labbaxxe ooseka summa lame kinno hana xabbati borreessi. Ookkoneechchi uduma kinonna worqetixxe dooqa giddo uggi. 12 Isira'eelixxe labbaxxe ooseke summi'anna qallitixxe kinno kaddo'a efuudixxe dugummo'n hedheeke teephuwwa'n abidis; Duuchchi Woddike Gootti edo qallitee kado'a Aaroon konne summuwwwa dugummote'n dulkowwaal. 13 Lame misechcho ugginaachcho worqeti giissi; 14 Ca'itte worqe wodarotishsha wodarte lame haachchaba giissi; isoonna ookkone dooqatishsha hedheechinni abidis.

15 «Murtetixxa qomatixxa kiise angatixxe ogek hujalli giissammashsha assite giiss; isenna eettene efuudeshsha, worqetixxa, iimatixxe bifanni, dhiille shimalixxanna suqendeexxe eloxxe layinoxxa giiss. 16 Isenna qeerrinn mitte taakko, godoba mitte taakko kadeexxi shoole kasikenna lameba dachchaasemeeke kadowwaal. 17 Ookkoneechchi uduma isi hana shoole dala'ni fiixa kino iso'n uggi; siretike dala'ni serdiyooni, tophphaaziyoni yo'oshsha wacaaka kinjo: 18 langake dala'n beluur, senperinna almaaze, 19 sakkake dala'n, yaakinti, kelqedooninna ameetisixinoosi, 20 sholgake dala'n biriille, merigidinna iyasphidi'i worqetixxe ferxe giddo uggemaan. 21 Ookkone tommenna lame Isira'eelike gosat minuwwike summuwwi maxxansishsha itti maxxansemeek, mitte mittende Iisira'eelixxe labbaxxe ooseke summinni tommenna lame kino kaddowwaal.

22 «Eettene qomatixxe kiise'a wodarotishsha wodaremeeka ca'ite worqetika haachchaba giiss. 23 Eettene qomatixxe kiise'a, lame worqetixxa qubuwwa giissitettexxi iseke lame kasuwwa welt abidis. 24 Ookkone lamiinga worqetika haachchaba eettene qomatixxe kiiseke kasuwwa'n hexxeexxe qubuwwan abidis. 25 Wele haachchabinxa qaccuwwa edi darreke efuudixxe dugummoke teepha'n gencassitettexxi lame worqetixxe dooqa'n abidis. 26 Lame worqetixxa qubuwwanna giissitettexxi giddi darreke efuudike hundike kasa'n hexxeexxe qomatixxe kiiseke lame kasuwwinni welt abidis. 27 Lame wele worqetixxa qubuwwa giissitettexxi efuudike sabbati iimi darre welt abidisende bira edi darrexxe efuudixxe dugummo'n hedheeke teephuwwa'n butti darrenni welt abidis. 28 Qomatixxi kiisexxi qubuwwa qomatixxi kiise efuudinaa'n gargar higgabaashsha isek sabbatinni welt afensisiyyot iimatixxe bifaxxe wodaronni efuudixxe qubuwwanni welt usuraan.

29 «Aarooni woyyichcha booncho'n e'yaxxa yanna Duuchchi Woddike Gootti edo duuchchi woddixxe qalli'a Isira'eelixxe labbaxxe ooseka summuwwa murtetixxe qomatixxe kiise giddo qalbe ifixxi hana ba'edhaan. 30 Duuchchi Woddik Gootti edo e'yaa wodda Aaroon qoma hana hexxaashsha eettene Uriiminna Tumiimi eettene qomatixxe kiise giddo uggi; tennexxe Aaroon duuchchi wodda Isira'eelitote ookkone murte uwwatichcho Duuchchi Woddike Gootti edo qoma ifixxi hana ba'edhaan.✝

31 «Efuuditixxe qamise hexxeeshshanni iimatixxe biffaxxe kaddowaal. 32 Umo e'yilshatixxi bakkanna iimi darre'n oddote'n ise'n fulchi; darendabaashshanna giddi'a enqende goodendowwaal. 33 Iseke hundi darreke kuulixxe dowwe'n iimixxe bifaxxa, baddeessittetixxanna dhiille shimalixxa roomaanuwwa giiss, ookko giddonna worqetika qililisuwwa giiss. 34 Worqetik qililsuwwinna roomaanuwwa, weli worqetik qililsuwwinna roomanuwwa eettene qamiseke kuulixxe dowwe'n hedhaan. 35 Aarooninna ergatemaaxxa yanna ise oddo'wa hassissa. Duuchchi Woddike Gootti edo woyyitte bakka'a e'ya woddanna fula wodda reyabaashsha ookkone qililisuwwixxa qillilleette laqaan.

36 «Ca'itte worqeka sahina giiss; isi hananna maxansi hanixxishsha ‹Woyyumma Duuchchi Woddike Gootti'a› hite xabbat borreess. 37 Isinna ruufat gence hiyyo'a iimatixxe bifaka shimalinni usur; isinna eettene ruufake albi edi darre'nite kaduun. 38 Isinna Aaroonike kallachcha'n usuremowwaal; isinna Isira'eelik ardi foyeexxi uwwaaxxe woyyitte uwwa duuchcha giddo hexxeexxa balleessa ba'edhaan; Duuchchi Woddike Gootti edo adhdhemeeke kandaashsha kunni beessisi duuchchi wodda Aaroonke xiyyo'n hedhaan.

39 «Qoluwwanna eloxxe layinoke shimalixxa giiss; ruufatanna eloxxe layinoxxa giissi; sabbatakanna angatixxe ogeki hujalli gobe giisseeke kadowwaal.

40 «Aaroonixxe labbaxe oose'aanna ulfinnakeenna danchummatee qoluwwa, sabbattuwwakanna gulluwwa giissi. 41 Tenne seemmuwwa dayyo atike Aarooni'ninna labbaxxe oose isixxe'n oddeessitettechchi uduma insa'nee hariir, qeesoons; ani'aanna qeesummat ergatemmaashsha foyi.

42 «Hidhakenaa'n gudeedii qico'n geyaaka saala buqaaka layinotika giddika qoonxa giissi; 43 Aaronnina isixxi labbaxxi oose afenshatike dunkaan giddi'a e'yinaaxxa yanna yookaan woyyichcha booncho'n ergatemo'a tolchimalchiba shinqaa wodda cubbo hunjeexxi rennabaashsha insa'ne tenneera oddo'wa hasissaan.

«Tinni Aarooni'anna isixxe horte'a duuchchi woddixxe aada kaddaan. Booncho'ni ani'a qeesummati erganto'a tolchimalchibaa shinqaa wodda oddo'winaan; konne qicinni giddiki bisi insa'neeki leella gophammaxxee reyotenaa'ni gantaan; tinni yoona Aarooni'aanna isixxe ila duuchchi'a duuchchi wodda hedhaake seeran.