1 «Ejjuma sase ciqile kade'eka waaccotike haqichchika tolchimalcho ijaar; isinna qeerrinni onde ciqile, godobikinna onde ciqile kadeexxi shoole kasike kadowwaal. 2 Konne shoolinge kasa'n gaafa giissi; gaafuwwikinna tolchimalchik abidemeekeme kadowwaal; isonna sageettotike sibljinn buqi. 3 Bululo cammammaxxa meshuwwa, faafasunjuwwa, hubbuqitte distuwwa, otisanjinxa mooqquwwanna giira adhdhinaachchuwwa, kunnichchi duuchchi sageettotike sibiljike kadowwaal. 4 Marabe labaka sageettotike sibiljika gola isi'a giissi; ookkone shoolinge kasa'n sagettotike sibiljixxa qube giissi. 5 Kunni golinna tolchimalchiinke gamisi qico iimi'a dagaashsha tolchimalchinke irgi hunda uggi. 6 Tolchimalchoke waaccotike haqichchixxa murguwwa giissitettexxi sageettotike sibiljinni buqi. 7 Dukati wodda lamii darreke tolchimalchiinke kasuwwa'n gatto'a iitti murguwwa eettene qubuwwa giddo e'yishendowwaal. 8 Xabbendeexxe haqqeka tolchimalcho giiss; giddonna duwwike kadowwaal; isoonna koobat hana ate'n leellishennashsha giiss.

9 «Taabotinke dunkaani'a baxxe giiss; bita'i darre'n qeerinn mitte dhibba ciqile kaddowwaal; isenna eloxxe suqemeeke layinotixxe seemmaka golo, 10 lame tomme utuphuwwa, lame tomme sageettotika sibljika lekkanjuwwa, bireti sibljixxi hookkuwwanna ookkone utuphuwwa'ninna zanguwwa hexxowwaal. 11 Middi darre'ninna mitte dhibba ciqile qeerredhaak seemmatike goluwwa kadowwaal; lame tomme utuphuwwi, lami tomme sagettotik lekkanji, birretike sibljixxi hookkuwwanna ookkone utupuwwa'ninna zanguwwa hexxowwaal.

12 «Dhidhimi darrexxe baxxek godob onde tomme ciqile kadeexxi tomme utuwwanna tomme lekkanjuwwa afeeka seemmatika goluwwa afe'eke kadowwaal. 13 Borote'n arishsho fuldamma darre'n hexxeexxi baxxenna onde ciqile qerrexxowwaal. 14 Sase utuphuwwanna sase lekkanjo afe'eek, qeerrinnikinna tommenna onde cile kade'eek goluwwi mitte darre'n hexxeexxe baxxe'n hedhowwaal. 15 Sase utuphuwwikinna sase lekkanjo afe'ek qeerrinnikanna tommenna onde ciqile kade'ek seemmatik goluwwi wele darrexxe baxxe'n hedhowaal.

16 «Eettene baxxexxe hula'a shoole utuphuwwika shoole lekkanjuwwa iimatixxe bifanni, baddeessittetika dhiille shimalikanna eloxxa suqendeexxe layinoka angatixxe ogek hujall itti gobe giisseeka lame tomme ciqile qerredhaake seemmati golo kadowwaal. 17 Eetene baxxexxe qarqara'n hedheeke utuphuwwi duuchchi birrete sibiljixxa zanguwwa hookkuwwanna sageettotika lekkanjo afowwaal. 18 Eettene baxxek qeerrinni mitte dhibba ciqile, godoba onde tomme ciqile kadeexxi eloxxe suqendeexxe layinoka qeerrinnikinna ejjuma onde ciqile kadeek goluwwanna sageettotika lekkanjo afeeke kadowwaal. 19 Heene la'onna uwwaake kadeexxi afenshatika dunkaanixxe erga'n hosaak miyi duuchchi, ookone dunkaanikinna eettene baxxek kaaso duuchchik mittikinna sagettotike sibljike kadowwaal.

20 «Atinna ifuwwa duuchchi wodda ifo'a ookkone ifi'a kaddaaxxa tumendeexxi qullotteexxa ejersiinxa zayite ati'a iyyedangaahshdha Isira'eelika arda ajaji. 21 Afenshatike dunkaan giddo, seemmatike goli gadhi darre, kunninna dhuga kulatike taabot edi darre Aarooninna oose isixxi labbaxxi, ifuwwi galgalinaa'n soodimari qico'n Duuchchi Woddike Gootti ifaashsha assinowwaal; tinninna Isira'eelike ardi'a ila ila duuchcha'n duuchchi woddixxe aada kaddaan.