1 Qeese woyyitte bakka'ni ergatendaa wodda oddo'witaaxxa hara danchoondeexxa qeesetixxa seemma layino iimatixxe bifanni, hamiraawwi hiyyendaaxxe bifaninna diimmooxxe horiinxe ordanni ganne giissine; Aarooni'a qeessummatixxa seemma Duuchchi Woddiki Gootti Muuse ajajemmashshanni giissine.

2 Efuudi hiyyendaaxxa seemma worqetike shimalinni, eloxxa layino iimatixxe bifanni, hamiraawwi hiyyendaaxxe bifaxxenninna diimmooxxe horiinxe ordanni giissine ganne; 3 worqetanna tumme qa'linse shimalishsha assine kukkunte eloxxa layino iimatixxe bifann, hamiraawwite hinaaxxe bifaninna diimmooxxe horiinxe ordanni mitteba ganne giissine. 4 Efuudite hinaaxxe seemma'a lame sabbata giissine, lamiin darree'ni dugummotibaa'ni butti'a dirraashsha assine seemmati welti abidinseemman. 5 Duuchchi Woddiki Gootti Muuse ajajemmashshanni worqe shimaliinsha assine, eloxxa layino iimatixxe bifann, hamiraawwite hinaaxxe bifaninna diimmooxxe horiinxe ordanni seense giissine sabbata efudite hinaaxxe seemmanni welti mitteba gonbe. 6 Fiixeeka kinjuwwa qixxeessineexxi worqeti giissineechcho'ni hana uggine; tommenna lame Ya'iqoobixxe ooseka summa kinjuwwa ookkonne'ni hana borro giissine seenseemman; 7 kinjuwwa ookkonneenna, Duuchchi Woddiki Gootti Muuse ajajemmashshanni tommenna lame Isira'eelixxi gosa kassi hiyyendaashsha gosa gosatixxa bakka dugummotenaa'ni butti'a dirra'neeke efuudite hinaaxxe seemmake sabbata'ni uggine.

8 Efuudete hinammaxxa seemma gannemmaxxe yanuwwanninni qomati boonnixxa kiise seense ganne; 9 iseenna lameba enqine shoole qixxe kasa kade qeerrinni 22 santi meetire, godobi 22 santi meetiremman; 10 fiixeeka kinjuwwa shoole dala'ni uggine; siretike dala'ni serdiyooni, tophphaaziyonenna cala cala hiyyaaka fiixeeka kinjo, 11 langake dala'ni beluuri, senperinna almaazi, 12 sakkake dala'ni yakiiniti, Kelqeedoninna Ameetisiixxinoosi, 13 sholgake dala'ni birille, meregidinna iyyasphidite hinaaka; konne duuchcha worqeti giissineechcho'ni hana uggineemman. 14 Fiixeki kinjuwwi tommenna lame Isira'eelixxa gosa kassi hiyyatee gosatixxa bakka tommenna lame kinjo'ni mitte mitte Ya'iqoobixxe ooseka summa borreessineemman.

15 Laphpheti boonixxe kiise'aanna haachchabiinsha wodarreexxa worqe giissine. 16 Lame worqeti giissineechchonna lame worqetixxa qube giissine, lame qubuwwa qomati boonixxe kiiseke iimike kasa'ni abidinse. 17 Lame worqetika haachchabanna qubuwati welti abidemaashsha assine; 18 wele haachchabiinxa qacce lame worqeti giissineechchinni afensinse; efuudixxe seemmaka dugummotenaa'ni butti'a dirrammake sabbata'ni edii'ni abidinse. 19 Lame worqetixxa qubuwwa lenbe giissine efuudite hinaaxxe seemma'ni qomatiba hexxeexxe kiiseke giddi darreke kasa'ni abidinse. 20 Lame worqetixxa qubuwwa giissine dugummotenaa'ni butti'a dirra'neeke lame efuudixxe seemmake sabbati butti darree'ni abidinse; qubuwwatanna abidinseeki elo qicinni seense abidinseeke hidha ka'linammake sabbati biraani. 21 Duuchchi Woddiki Gootti Muuse ajajemmashshann qomati boonnixxe kiise'ni hexxeexxanna efuudite hinaaxxe seemma'ni hexxeexxa qubuwwa haanjake shimalinni abidinse; konne qicini qomatixxi kiise sabbatake'ni hana hexxemmaxxe sholla qicinni tikendaaxxebaan.

22 Efuudite hinnaxxe seemma'ni itti iima oddo'winaaxxi seemma giissendeeki iimatixxa bifa affeexxe horiinxe ordanniten; 23 goobiinba umo e'yinshaa wodda darendabaashsha giddi'a enqine goondeexxemman; 24 seemmatike kasa'ni lekkatibaa'ni layino iimatixxe bifanni, hamiraawwite hinaaxxe bifaninna diimoxxa bifa affeexxe horiinxe ordanni roomanite hinaake hiddichchixxe gummaxxa fakke borreessine gonbe. 25 Eloxxe worqeni handaaruwwa giissine; handaruwwakanna seemmatike buttike kasa'ni roomanite hinaake hiddichchixxe gummaxxa fakke giissine gombeemmake seesixxe oddo'ni uggine. 26 Duuchchi Woddiki Gootti Muuse ajajemmashshanni handaaruwwakanna seemmatike buttike kasa'ni mittekenaa'ni mitte itti aanchina'ni uggine.

27 Aarooni'aanna isixxe oose'a shaamize, 28 ruufuwwa, gulluwana layinotika gonfuwa, 29 sabbatakanna layino iimatixxe bifanni, hamiraawwite hinaaxxe bifaninna diimoxxe gedhebiinxe ordanni giissine Duuchchi Woddiki Gootti Muuse ajajemmashshanni shimaliki gonbe. 30 «Duuchchi Woddike Goottixxe huje'a gargari foyeemeeke» hiyyaaka beessisa ca'itte worqenni borro giissine. 31 Isoonna Duuchchi Woddiki Gootti Muuse ajajemmashshanni ruufati iima iimatixxe bifake shimalinni usurre.

32 Udumii'ni Duuchchi Woddiki Gootti ulfiniki leellammake dunkaaniinxi huje muuxende; Isira'eelik ardinna duuchchiinxa yaane Duuchchi Woddiki Gootti Muuse ajajeeshshanni asse; 33 insa'nenna konneechchi butta hedheeka miyuwwa Muuseba iyyedange; dunkaanetanna isika miyuwwa, hookkuwa, lumolla utuphuwwa, danqarsanjuwwa, utuphuwwa, utuphuwwiinxa lekkuwwa, 34 gedhebiinke goginni giissine diimoxxa qalame itti buurreeka buyyisanjo, hallinseeka gogiinka buyyisanjo, woyyitte kutanna hara woyyitte kuta gargari hiissaaka golo, 35 Tommi ajaji borreessemeeki kinjuwwi hedheeka Kakotika Taabota; isoo dunkaaka haqichchonna, buyyisanjo isika, 36 beerakanna isika miyuwwa duuchcha, Magenoke shiqqaaxxa woyyitte midhatixxa kebbo, 37 ca'itte worqenni giissineeka torbaane dhankoka xassanna isika miyuwwa, xassake kaddaaxxa zayite, 38 worqeti giissineeka ixaana gunbaachcho, hariirtetixxa zayite, eloka foole afeeka ixaana, dunkaaniinxe wuddummeka golo, 39 naasetike sibiljinni giissineeka hixaana gunbaachchonna diddiqqatishsha hedheechcho, isoo dunkaaka haqichchonna isike miyuwwi duuchchinninni, ansheccatixxa qorenna iseka ofo'lisanjo, 40 dunkaaniinxe hulaka golo, utuphuwwakanna isixxa lekkuwwa, dunkaanke dalla'ixxe hulaka golonna isika utupha, dunkaane dhisatika chikaala, dunkaanii giddika miyuwwa, 41 qeesichchi Aarooninna oose isixxi labbaxxi qeesummati ergatendaa wodda oddo'winaaxxa woyyittenna dancha seemmuwaman.

42 Isira'eeliki ardinna huje duuchcha Duuchchi Woddiki Gootti Muusee'e ajajeeshshanni giisse; 43 Muusenna duuchchiinxa yaane Duuchchi Woddiki Gootti isoo ajajeeshshanni giissineexxa koke; Muusenna miya duuchcha eebbise.