1 Baatsili'eelinna waaccotike haqichchinni Kakotika Taabota giisse; qeerrini 110 santi meetire, godobi 66 santi meetiri, hojja 66 santi meetiremman. 2 Giddii'ninna gadhii'ni ca'itte worqenni buqe; isika kasa duuchcha worqetixxe kifafenni giisse; 3 Taabota dulkate kaddaaxxa shoole worqetixxa fanno giisse; iseenna lame fanno mitte darre'ni lame wele darre'ni ugge shoolinxe lekka'ni abidisse; 4 Taabota dulkinaaka haqichchuwwa waaccotike haqichchinni giisse worqeti buqe. 5 Taabotiinke kasa kasa'ni abidisemmaxxe fannuwwa'ninna e'yishshe. 6 Qeerrini 110 santi meetire, godobi 66 santi meetire kadeeka Taabotiinka buyyisanjo ca'itte worqenni giisse; 7 keela affeexxa lame dada tummeexxe worqenni giisse, 8 Taabotiinke buyyisanji hana mitte mitte darre'ni langaxxa wele darre'ni ugge; buyyisanjiki welti mitteke asse giisse. 9 Keela affeexi daduwwa keela iimi'a bande'e Taabotiinka buyyisanjo buqqeexxi weli uuddaashsha asse.

10 Qeerrine 88 santi meetiri, godoba 44 santi meetire, hojja 66 santi meetire kadaaka beera waaccotike haqichchini giisse. 11 Ca'itte worqenni bunqe, beerinke kasa'ni worqeti kifafe giisse. 12 Qarqara beerake'ni 75 miilii meetireka ba'linne afeeka kasanna kasa okkone'ni worqeti kifafe giisse. 13 Shoole worqetixxa fanno giisse shoolinxe lekkake kasa'ni abidinse. 14 Beera dukatee kadaaka haqichchuwwa e'yinshaaxxa fannuwwa kifafeti bira abidinseemman. 15 Dunkaaka haqichchuwwanna waaccotike haqichchinni giisse worqeti buqe. 16 Beerake'ni hedhaaka gargar gargar hedheeka miya ca'itte worqenni giisse; miyikinna: hixaana ugginaaxxa ba'laxxa qorenna buudaa, mooqqoo, woyinetika bulbulo shiqinshaaka qoonjonna hubbuqqitte qoreemman.

17 Torbaane dhankoka xassa ca'itte worqenni giisse; xassi uurrammachchonna zange isixxa tummeexxe worqenni giisse; issoonna seesake kadaake daraarixxe, luuphphisiinxenninna kichchotixxe fakkenni mitteke asse giisse.

18 Mitte darre'ni sase, wele darre'ni sase asse jaane dame giisse. 19 Jaaniniinxe dame'ni mitti mittingi daraarii, kichchonna luuphphisa afeeke lewizetike daraarishsha hedheeka sase sase daraariinka seesa afeemmani. 20 Xassiinxe siqqo'ninna shooli lewize hiyyemaake daraarixxi kichchonna luuphphisiinki seesi hedheemman. 21 Mitti mittenge sase dameke daraari hunda mitte kichcho hexxemman; 22 kichcho, dametinna xassiinxi siqqo tummeexxe worqeni mitteba mitteke assine giissineemman. 23 Torbaane dhanko'a torbaane xassa, xassa xassinaachchonna xassa xassinaachcho ugginaaxxa qore ca'itte worqen giisse. 24 Xassiinxa siqqonna iseka miya duuchcha giissatee birreexxi worqe sase tommenna onde kiilo giraaman.

25 Qeerrinne 45 santi meetire, godoba 45 santi meetire, hojja 90 santi meetire kadeeka shoole kasika hixaana gunbaachcho waaccotike haqichchinni giisse; shoolinge kasa'ni hedheeki cunichchuwi mitteba hunjeekemman. 26 Qacce, shoolinga kasanna cunichchuwwa duuchcha ca'itte worqenn buqe; qarqaaraake'nina worqeti kifafe giisse. 27 Kifafeti hundanna lame worqetixxa fanno ugge; lamiin darre'ni, middanna bita'ake'ni abidisse; isenna ixaana gunbaachcho dunkaaki haqichchi e'yaaxxe fannuwwamman. 28 Ixaana dulkinaachchonna waaccotike haqichchinni giisseexxi worqeti buqe.

29 Woyyitte hariitetixxa zayitenna eloxa fishshe afeeka ixaana shittotishsha karse giisse.