1 Ookkoneechchi uduma Duuchchi Woddik Gootti Muuse'e, «Ati, Aarooni, Naadabi, Abihunna Isira'eelike ardik sooreesuwwa'ni torbaane tomme mannin welti ani hedhennexxe kooba hana amme; ha'noo bayyanni hexxine magenoonfatte. 2 Yaane kinni Duuchchi Woddike Gootti shiqa dande'aak Muuse callaan. Insa'ne kinn shinqoqqe'e; ardikinna isinni welt qabatoqqe'e» hiyye.

3 Muusenna mareexxi ardake'n Duuchchi Woddike Goottika hiyyichchonna seera kulee wodda, ardikinna mitteba «Duuchchi Woddiki Gootti hiyyeexxa duuchcha assinannon» hiyye. 4 Muusenna Duuchchi Woddike Goottika hiyyichcho duuchcha borreesse; langaxxa barra gorsa ke'eexxi tolchimalcho koobati hunda ijaare; tommena lame Isira'eelike gosatike mini'a tommenna lamme sooddo uurrise; 5 Ookkoneechchi uduma isinna Isira'eelito ka'uma dargageeyye erge; insa'nenna ciincatika tolcha tolchine; iittani mittoominke tolchi'a jibootta Duuchchi Woddike Gootti'a tolchine. 6 Muusenna eettene mundenaa'n gamisa aadheexxi qorete'ni ugge; gatteexxa gamisanna tolchimalchoke'n fiffixe. 7 Kakotika maxaafanna aadheexxi ardakee haasosse; insa'nenna, «Duuchchi Woddike Gootti hiyyeexxa duuchcha assinannon; ajajemmannon» hine.

8 Muusenna eettene munde aadhe ardake'n fiffixeexxi, «Tinni Duuchchi Woddiki Gootti konne hiyyichchuwwa duuchcha uwwe wodda ha'no'a aageexxe kakoxxe munden.»✝

9 Muusenna, Aarooninna, Naadabinna, Abihunna Isira'eelike ardixxi torbaane tomme akeekisanjuwwi koobati han'a qabante; 10 insa'nenna Isira'eelika Mageno uunde; lekka isixxi hunda iimatishsha xassa'nek fiixaka kinjo senperk ba'linni hedhemman. 11 Yaane kinni Magen Isira'eelike ardike akeekisanjuwwa'n hobbi hiyyebaan; insa'nenna Mageno uunde; inde ha'wine.

12 Duuchchi Woddik Goottinna Muusee'e, «Koobati hana anibaa amo; kabanna hekki hiyyi; aninna insa'nee akeekaaka seeranna ajaja itti borreessenneka kinjinka bidiro ate'ni uwwannon» hiyye. 13 Ookkoneechchi uduma Muuse erganjo ifike Iyyaasunni welt me'e; Muusenna Mageniinxe koobaa hana qabate; 14 Muusenna akeekiisanjuwwa, «Ha'noba'a illeema hinge dangano qico'ni kabanni hekki hyye; Aarooninna Huuri ha'nonninni he'neen; weli gopheek insa'neba marowwaal» hiyye.

15 Muusenna koobati hana qabatee wodda duumanchi kooba eettene buqe. 16 Duuchchi Woddik Goottik gaachchanninna Siinaxxe kooba'n qubate; duumanchikinna jaane barra qico kooba eettene buqe; torbaxxa barra Duuchchi Woddiki Gootti duumanchi giddii'n Muuse ye'e. 17 Eettene koobaxxe xungo hana Duuchchi Woddike Goottik gaachchanni Isira'eelitote'n ittaammaxxee giirashsha hedhe'e leellaamman. 18 Ookkoneechchi uduma Muuse koobati hana qabate'e duumanchi giddi'a e'ye; ookkonna shoole tomme barranna shoole tomme hashsha ture.✝