1 «Waaccotike haqichchike hixaanika tolchimalcho giissi. 2 Qeerrinni isikinna mitte ciqile godobiink ba'linninna mitte ciqileke kadeexxi ejjumi isiki lame ciqile kadeexxi shoole kasike kadowwaal; gaafuwwikinna iso'n abidisemeeke kadowwaal. 3 Tolchimalchiinka iimi gama kasuwwa isika duuchchanna gaafuwwa isika ca'itte worqenni buqi; qarqara isike duuchcha'n worqetixxa kifafe giissi. 4 Tolchimalcho dukatixxa la'o uutaaxxa murguwwa giddo uggendaaxxa worqetixxa lame qubuwwa kifafeti buttidarre'n elqe kayyike ookkone tolchimalchike kasa'n giiss. 5 Eettenne murguwwanna waaccotike haqichchinni giissite worqeti buqi. 6 Ookkone tolchimalcho seemmatike goli edi darre kunninna dhugaa kulatike Taaboti edi darre, ani atinni afemannoke cubbo bidhdhatike ookkone tuphanji ali darre uggi. 7 Aarooni ifuwwa qophpheessaaxxa yanna gorsa gorsa'ninni fishshaake foolika hixaana tolchimalchi hana gubowwaal. 8 Galgala ifuwwa xassaa wodda hixaanakanna guba hasissaan; tinninna daggaaxxe ila ila duuchcha'n hixaan Duuchchi Woddike Gootti edo duuchchi woddi'a wiliilaashshaten. 9 Konne tolchimalchi hana wele hixaana yookaan wele ciincatika tolcha yookaan midhatika tolcha iso'n tolchitoxxe'e; ha'watika tolchanna iso'n dhangalaasoxxe'e. 10 Aarooni wogga wogga'ni mittele gaafuwwa isik hana cubbo biraan; kunni woggatixxi cubbo bira daggaaxxe ila duuchcha'n cubbo biratike tolchixxe mundenni assema hassissaan; kunninna Duuchchi Woddike Gootti'a hara woyyichchaken.»

11 Duuchchi Woddik Goottinna Muuse hiyyee qici, 12 «Isira'eelike ardika duuchinga laakkossa afatee'e insa'ne laakkottatto wodda mitti mitting manji laako'emmaaxxa yanna ifixxee hedho'a woda kadaaka hiraa Duuchchi Woddike Gootti'a uwwiyyo hasissaan; ookkoneechchi uduma insa'ne'e laakkottottole insa'ne bala geltabaan. 13 Ayyinna Isira'eelike ardike Laakkoss giddo e'yeek galmiinxe biretike sibiljixxe mikexxe qixxe'n mitte biretika sibiljo uwwa hassissaan; kunni mitti biretik sibilji Duuchchi Woddike Gootti'a shiqaake tolchan.✝ 14 Wogga isixxe lame tomme wogga yookaan lame tomme wogga kade laakkossake sa'eek duuchchi Duuchchi Woddike Gootti'a tolcha shiqisha hasissaan. 15 Hedho ha'nooxxa wodatika hira Duuchchi Woddike Gootti'a tolcha shiqishshinaaxxa yanna dureessi mitti biretika sibiljo sa'isseexxi hiyyeessikinna xe'iyshe uwwoqqe'e. 16 Cubbo bidhdhatika maallaqanna Isira'eelike ardinaa'n aaxxettexxi afenshatike dunkaanixxe ergatensha'n hosisi; isinna ha'noxxee hedho'a woda kadati Duuchchi Woddike Gootti edo Isira'eelike ardi'a qallite kadaan.»

17 Duuchchi Woddiki Goottinna Muuse hiyyee qici, 18 «Ansheccate sageettotike sibiljixxanna iseke sageettotike ofo'lisanjixxa qore giiss; isenna afenshatike dunkaanixxenna tolchimalchiinxe oddo'n uggitettexxi ise giddo wode'e uggi.✝ 19 Aarooninna labbaxxi isixxi oose ookkone ise giddo hedheeke wode'inni anga ifixxanna lekka ifixxa anshe'naan. 20 Afenshatike dunkaan giddi'a e'yinaaxxa yanna duuchcha rennabaashsha wode'ik anshe'nowwaal; iittanni Duuchchi Woddike Gootti'a giiratika tolcha shiqishatee tolchimalchiinba ergatemate'e shinqaaxxa yanna, 21 Rennabaashsha anga ifixxanna lekka ifixxa anshe'nowwaal; tinninna daggaaxxe ila duuchcha'n Aarooni'anna horte isixxe duuchchi'a duuchchi woddixxe aada kaddaan.»

22 Ookkoneechchi uduma Duuchchi Woddik Goottinna Muuse hiyyee qici: 23 «Konnneechchi butta hexxeexxa filendeexxa qurunfudduwwa aadhi: jaane kiilo giraama wode'eenxa karbe; sase kiilo giraama fishshaka qarafa, sase kiilo garam ha'nashsho, 24 jaane kiilo giraama dakkadha kunniichchi duuchchi woyyichcha galmixxe ege'nendeexxe kiiloshshanna shoole liiter zayite kaddowwaal. 25 Konneechchuwwa Shittotike giissalli giisseexxe fishshaxxe qurunfuudeshsha woyyitte hariirtetixxa zayite giiss; woyyitte hariirtetixxe zayite kaddaan. 26 Ookkonechchi uduma ise'e Afenshatika Dunkaana'inna isike dhuga kulatika taabota'n, 27 ookkone beeruwwa'ninna isike miya duuchcha'n xassinka ofo'lisanjo'ninna isike mi'uwwa'n, hixaaniike tolchimalcho'n, 28 ciincatike tolchike tolchimalcho'ninna isike miya duuchcha'n, iittanni eettene ansheccatixxe qore'ninna iseke lekkanjo'n hariirtatton. 29 Hara woyyichcha kaddaashsha konneechcho duuchcha woyyoonsitatton; konne mi'uwwa tuqaaki duuchchinna woyyichchake kadaan. 30 Qeesete kandeexxi ani'a ergatemmo'a Aarooninna isixxa labbaxa oose hariir, woyyoons. 31 Isira'eelike arda'n hite kuldatto qici, ‹Daggaaxxe ila duuchcha'n tinni anxe woyyitte zayite kaddaan. 32 Hoone manjike biso'ninna ise cossendoqqe'e; iittanni ise giissendee qicinni wele zayite giissitinoqqe; ise woyyitteten; woyyittete kaddeexxanna qalbeeffatte. 33 Isexxe fakke'n giisseekinna qeesete'ni malee wele manjo'n cosseek duuchchi arda ifik giddii'n fuggussemowwaal.› »

34 Duuchchi Woddik Goottinna Muuse hiyyee qici, «Duuchchiinxa welqixxe assati fishshaxxa qurunfuduwwa: wode'iinxa cophphissallo, zaagolike giddo afendaaxxa shitto, fishshallo dhaphphassallonna ca'aka hixaana aaxxettexxi, 35 shittotik giissalli giiseexxe fishshake foolika hixaana karsat giissi; isi maxine itti uggendeeke ca'ichchakenna woyyichchake kadowwaal. 36 Isonaa'n shiixxoka aaxxe, tundettexxi bulleessati silliiqqettexxi isoo ani atinni afemannoxxe bakka'n afenshatike dunkaan giddo dhugaa kulatike taaboti edi darre uggi; isinna ati'a hara woyyichchake kadaan. 37 Isi giissemeeqicinna giissemeeka hoone hixaananna ati ifi'a giissexxoxxe; isinna Duuchchi Woddike Gootti'a woyyoomeeke kadeexxa qalbeefat. 38 Isike fishshake foole'n gammado'a isi giissemee qicinna wele isishsha hedheeka giissaak duuchchi arda ifik giddii'n fugussemowwaal» hiyye.✝